1-2. Nawal erkelde Got konganem ga kapil meim? (Jems 1:​22-25)

 JOHOVA kanka kanem Ngangem bol kenem kapil moramen nepisbel. Buk Song 119:2 bom ye embe nim: “Alamb olom yuwom karkar ere ala kumbol wei ngo olom kurum, enjep kapisam: “Ala Jises yu pende pra ne embe nim: alamb Got yuwom pile karkar esim enjep kapisam!”—Luk 11:28.

² Johova lotu erngom alamb kapil meim. Nal ende kapil meimen? Mem puli pande kapil meimen, ba mem kerma wei paim Got Yuwom Baibel a meim kunum kunum gere ala duwom erkanmen wal konganem esmen.—Jems 1:​22-25 gere.

3. Got Yuwom Baibel a meim gere kane, kanmen yu konganem esmen kunum, kenem nalmal pakeronom?

³ Kenem Baibel yu ger kanmen konganem esmen kunum, “wusngam puli pakeronom.” Wusngam ende kenem pilkane esmen, Baibel gere sape si konganem esmen bar erkelpe Johova kapisem. Kenem bol kapisem nepismen erkelde kapil meimen. (Ekl. 12:13) Got murmulom dongal bu ngom bonjup Yu kenem gere duwom erkanmen yu konganem esmen kunum, pilgi aijen erdongal esmen, ala pilgi ding ga senomon mem wo dongal punom eri. Wal embe mal nim bol weieri min wonda wonom. Ala wal ende Johova yuwom karkar nasim alamb ombun duwom puli kauwum mal kenem nakaumon. King Depit yu ende nim kenem kumbol ding seim. Olom golang ende kem bar Johova lo mom mambnem dulto karkar erim na alamb omukrom mal kem: “Mambnem embe mal ye ende karkar enda, olom topom kawei sinda.”—Sng. 19:​7-11.

4. Got Yuwom gere kane konganem enamen ne esmen bar, nalende pesil panda?

 ⁴ Weieri, Got Yuwom ger kane duwom esmen yu, kunum kunum duwom enamen amin napaim. Johova kenem nal enamen pilkane enem ne pinjin dal, kenem enge erse anj dunglom kele Baibel gere duwom enamen. Embe pile pi kenem wusngam pende karkar erpe pakerondo, Baibel kunum kunum gernamen mal kanamen. Ala nawal pakerondo germen mal buro yemkel pisamen mal kane, nal wusngam pende karkar ere duwom esmen wal nomolpa esmen bar konganem enamen mal pra kanamen eri.

ENGE ERSE GOT YUWOM BAIBEL A MEIM GERDEL

5. Nal kongan ende esmen anj dunglom puli keswei sinem?

⁵ Jehova alambem man puli nomolpa esim bar, enam kongan puli wei meim. Kenem anj dunglom puli kes wei kele pilgi kongan jeljel esmen. Ende embe mal, kenem puli ku kongan na kongan pende ere kenem kenem na pemili aijen kantawol enamen ne esmen. (1 Tim. 5:8) Kristen puli pende maiyam ding ga kes tonom mo tuwa sejip kantawol esim. Ala kenem porpor kes sininamen ne kenem kenem kantawol enamen ne esmen bar, anj dunglom sinem eri, ala kongrikeisen tuwalto enamen kongan pra meim. Kongan kerma wei ende pase minro punom, kumbol wei ngo Baibel yu neori keramen kongan. Nim kongan puli embe mom dal, anj dunglom nalmal kansi Baibel yu kunum kunum gere, gerdel yu buro yemkel pile duwom erkanjel wal konganem endel?

6. Nim nalmal Baibel yu gerdel wal kerma mal paksel? (Piksa pra kane.)

⁶ Kenem Kristen meimen Baibel yu gernamen wal kerma wei paim, “embe pile si wal kerma mal paksamen.” (Fili. 1:10) Kapil meim ye nalenem, Buk Song ngimba wei embe dom: “Ye e Johova lo kakanem, ala olom lo e, tangaling na emilpal kikine gernem.” (Sng. 1:​1, 2) E tadom, kenem anj dunglom kele Baibel gernamen. Nal kunum Baibel gernamen ka  paim? Ki e pundom kenem dingding ne jeljel ngonamen, ba wal kerma paim, anj dunglom ende enge ersepe pakerondo, Baibel kunum kunum gernamen. Pilgi ding angjen ende kangem Vikto embe nim: “Na komb kinimba aksal kanapis. Ba Baibel komb kinimba gernal kapis nalenem, kunum ele jeben kowol puli napaim. Na bunuman au ninde gerind yu pilpol tonal kaple enem.” Nim embe ding mal pisapisen eri? Nenem ki embe ngondol, ‘Nal kunum na Baibel gernal kapaim?’

GERNEN YU BURO YEMKEL PISEL

7-8. Baibel gere pake sinamen ne enamen bar, nawal ende kol tungnal ne enda? Yu ekin ere.

⁷ Yu weieri ninamen, kenem Baibel buk na nus puli gernamen, ba germen yu porpor pilpol tonamen ne enamen kaple nanda. Nim wal ende gernen, ba kunum apal pende bulto gernen wal porpor buro yemkel pisel kaple enem mo? Kenem porpor germen wal pel buro pisamen kaple nanem, wandil wei, Baibel gernamen bar wal embe ding mal min wonda eri. Kenem mak pakle kunum dingding ne Baibel sapta pende gernamen paninamen. Embe ninamen kawei ba mak pakismen mal ombol wei ere karkar enamen ne enamen. (1 Kor. 9:26) Ba Baibel germen e pulnom bosmon—pulnom ka bosmon, ba e pulnom mongse bosmon. Kenem Got Yuwom germen bar pake wei sinamen ne pinjin dal, wal pende enamen eri.

⁸ Wal ende ding mal paibel buro pile: Nol, komb wusngama wonom, kol meim wal bol wal kerma paim. Ba kunum apal pende tuwalto komb puli keswei tomdal, mala nol puli keswei mora. Embe pile komb puli tomdal mala kol meim wal pake kanasinam. Mal paim kunum pende wopundo, komb nol meim mane situwal kere mal kopngom moro wal bol min wonom. Embe ding mal, kenem Baibel gernamen kunum, kamkam nagernamen, kamkam gerjin dal, germen wal si bunumana kel moklo konganem enamen kaple nanda—Jems 1:24.

9. Kenem Baibel kamkam wei gergere enjin pamdal, nal enamen?

⁹ Kunum pende nenem pilkane enen, Baibel kamkam wei gernen mo? Embe gerin pamdal  nal endel? Mane gernal ne endel, ombol ere, gernen wal buro yemkel pilpol tonal ne endel. Embe endel onom paim. Yu duwom enen bar anj dunglom pende puli kele duwom enen yu mane buro yemkel pisel ne endel. Wal ende endel, Baibel wes apal pende gere anj dunglom yem panda, gernen yu buro pilpol tonal ne endel. Vikto, yero yubol tojin angjen embe nim, “Na Baibel gergere erind si tambem kele sapta dingeri gernal nepinj.” “Na Baibel komb kinimba gerind erkelnge tangaling wanj bar, gerind yu buro yemkel pilpile erind.” Nim Baibel yu puli mo apal gernal nepisel, ba wal kerma we paim, nim Baibel kikine gere gernen yu buro yemkel pake sinal ne endel.—Sng. 119:97; boks a “ Ki Meim Omuk Tondol” pane paim kane.

10. Baibel gere duwom enen konganem endel mal, yubolto. (1 Tesalonaika 5:​17, 18)

¹⁰ Nal kunum nim Baibel gerdel anj dunglom puli mo apal kerel, ba gere duwom erkanen wal, wusngam pende kansi konganem enal ne endel wal kerma paim. Nim Baibel a Got Yuwom ende gere kanjel kunum, nenem ki embe ngondol, ‘Na yu e duwom erkanj e yipe mo mand buto nalmal konganem enal?’ Yu ekin ende enamen, nim Baibel 1 Tesalonaika 5:​17, 18. (Gere.) Nim wes tal e gere pakle, bulto kunum kunum yane kumbol ngo don mal pile. Ala wal pende kansin wal buro pisel. Wal talende Johova bol kapile sangiyo nengonal ne pisel. Anj dunglom minit apal pende tuwalto, nim bunuman embe mal karkar erin dal, nim Got Yuwom eimal napisel, konganem puli enen eri. Nim kunum ding ding ne Baibel tabem ende gerdel bar, mambnem embe mal karkar ermon dal pake sindel mal buro pile! Weieri nim Got Yuwom konganem enen mem wose kerma punda. Ba Baibel yu gernen bar, puli konganem endel pamdal, nal endel?

MAK KA PAKSEL

11. Kunum pende ne Baibel gerdel bar, nalende kanapisel? Wal ende min wom mal kane.

¹¹ Kunum pende ne nim Baibel gerdel kanapisel, ala Baibel gere, gernen yu wusngam pende kansi konganem enal ne pisen bar, kanapisel eri. Wal embe mal buro pile: Yipe nim Baibel gernen bar alamb ding ende mongse kanka nakangel padom. (Jems 2:​1-8) Nim ga porpor bol mambnem ding mal endel duwom enen, embe pil nim mambnem ainem erkun enal nepisen. E kawei! Ala tangdero Baibel tambem ende gernen bar, yu don bar kantawol endel wal kerma paim mal dom. (Jems 3:​1- 12) Nim pilkane enen kunum pende ne yuka nanene erin. Embe pile nim yu kane ga pendedongal ngonal ne pisen. Ala tangdero Baibel gernen bar mala alamb mambnem aijep karkar endel, kanpol tondol padom. (Jems 4: 4-12) Nim pilkane enen wal pende ere kapisal ne endel bar, kanpol tondol paim. Kunum namba po nim yu gernen bar karkar enal wal puli meim nepisel.

12. Nim Baibel gere kane nomolpa enen bar wal pende erkun endel pamdal, nalende kes napisel? (Wal ende min wom mal kane.)

¹² Nim wal pende erkun endel pamdal, kes napisel. Nim erkun endel wal pilkane enen e kawei. Molmene kele mambnem dulto karkar enem alamb Baibel gernem kunum nomolpa enem bar, wal ende erkun enda wal panda, kanal ne enem. a Ala pilkane endel “mambnem kolsi karkar enal ne enen mem” pornadom, anjngo endel. (Kol. 3:10; stadi not “is being made new,” pane pam pra omukro kanjel.) Nawal nim pakerondo Got Yuwom anjngo karkar ere konganem endel?

13. Nim yu duwom eren nal wusngam ka ende konganem endel? (Piksa pra kane.)

¹³ Duwom erkan wal porpor, kunum ding konganem enal ne nandel. (Prov. 11:2) Wusngam ende embe endel: Wal pende erkun endel panda wal kangem bol moksol, yero ding mo tal ende erkun ere, pende moldo apal ne endel. Ba nawal yero pulnombol erkun endel?

14. Nim wal pende erkun endel paim bar, nawal yero pulnombol endel?

¹⁴ Nim wal ende erkun endel onom panda wal yero endel. Mo nim erkun endel ambsik wei panda wal. Erkun endel wal pilkane erin dal, Baibel buk na nus meim omukro kanjel, pende embe mal Watch Tower Publications Index mo the Research Guide for Jehovah’s Witnesses konganem endel. Nim mak pakil enal ne kapisen wal yane ne Johova ngo “dongal ngo erkeli kapil enal panindel.” (Fili. 2:13) Bulto duwom erkanen wal konganem endel.  Yero mak paksen wal erkaple erin dal, bulto mak pende paksel bar kapil endel. Nim nomolpa enen bar wal pende erkun ere Kristen mambnem karkar erin dal, nim dongal si wal pende erkun enal nepisel. Embe endel bar pisel onom pande, wal pende erkun endel eri.

KANKELI GOT YUWOM “NIM BOL KONGAN ENDA”

15. Got alambem man nalmal jelmal molo, alamb puli Baibel gerim alamb ngom? (1 Tesalonaika 2:13)

¹⁵ Alamb pende Baibel kunum puli gere kanjin panim, ba enjep Baibel gerjip pilgi nim mo? Enjep nomolpa esim bar gere kanjip yu karkar ere konganem esim mo? Wandil wei, alamb puli Baibel yu dom karkar nasim. Ba Johova alambem man Baibel yu omuk jelmal tom! Komna Kristen monjup enjip mal, kenem Baibel “yuwom yu weieri Got bol wonom nepismen.” Kenem nomolpa esmen bar enamen paim wal porpor Baibel kolta yu dom pilsi karkar esmen.—1 Tesalonaika 2:13 gere.

16. Nawal kenem pakerondo, Baibel yu gere duwom esmen konganem enamen?

¹⁶ Got Yuwom gere konganem enamen, kunum kunum amin napaim. Ombol ere anj dunglom kele Baibel gernamen. Mo Baibel kamkam gere, gernamen wal pilpol naronamen. Mo nomolpa esmen bar wal puli pende erka enamen pamdal, ka napisamen. Ba nal ombun ende panda nim kolwei narungda. Johova nim pakerondo ombun embe mal panda nim tomen kerel. Johova kenem pakeronda nepile Baibel yu gere duwom enamen awur ne sinakeramen, konganem enamen. Kenem bunuman tal napaim, kunum puli kele Got Yuwom Baibel a meim gere nomolpa esmen bar konganem enjin dal, kawei wei pilmoramen.—Jems 1:25.