Gerim Ga Ki Aijep
Jises pulnombolo Kerma Mokun Ponimbar olom disaipol walem bol nom kunum, yero disaipol 70 poro Baibel yu neori keiya nikem punjup ga, e pu naja monjup? Enjep olom bul ngonjup mo?
Jises disaipol walem bol Kerma Mokun Ponimbar nonjup, Jises enjep bol kanapim mo enjep olom bul ngonjup paninamen kaple nanem. Jises aposol walem pilgi dongal pam bol make e pambar tapronda kapim.
Olom disaipol 12-na 70-bol poro tapronal nepim. Olom disaipol puli monjup bar 12-mongse si aposol panim. (Luk 6:12-16) Olom Galili mom kunum, “aposol 12-poro wiro situwal kele” “pu Got Gapman yu neori kele, kes tonda alamb erkerambe wose kol punam panim.” (Luk 9:1-6) Bulto Jises se Judia pu molo “ga 70-poro makro taltal ne punam panim.” (Luk 9:51; 10:1) Embe pile ga disaipol kulu jeljel molo Jises pane yu neori kenjip.
Juda ga wo Jises disaipol monjup, pemili aijep bol kongar dingding ne, Pasopa make anjngo toro enjip. (Kis. 12:17-20) Jises togoram mandwei erim kunum, olom disaipol bol se Jerusalem punjup. Ba olom disaipol—Judia, Galili na Perea monjup porpor ne siding kelde Pasopa make kerma tonamen ne narim. Kenem pilkane esmen, Jises kunum ele ga aposol walem bol makeronda kapim. Olom enjep nengo embe nim: “Na ombun kau nganj ngimbil sinal kunum yero enem bol Pasopa mokun nonal kapinj.”—Luk 22:15.
Memka pange Jises embe nim nalerim, mand weierim olom, Got “ngalem Sipsip mal golo alamb porpor sin wakronda.” (Jon 1:29) Wal e Jerusalem min wonda nalerim, ele alamb kombe mol wonjup opa ere Got ngongo enjip bar. Israil ga Pasopa enjip kunum, enjep Isip karpos monjup Johova Siori Kem mal buro pilpile enjip. Ba Jises golo opa enda mem kerma pam, sin na gonjup mem mala alamb porpor bol pam toporninda. (1 Kor. 5:7, 8) Jises wal erim erkelde aposol 12-poro kongrikeisen Kristen meim mal moram. (Efe. 2:20-22) Walka ende pilkane esmen, Jerusalem min epen seim, “ku 12-poro mem pange” taun taujup. “Sipsip ngalem aposol aiyem man 12-poro kangjep” ku dingding ne pambar bol pakjip. (Rev. 21:10-14) Weieri, pilgi dongal pam aposol walem e, Got wal pende enal ne buropim wal enjep kongan kerma erkerambe mongom tonda, embe pile nalerenge Jises enjep bol Pasopa ai enam nepim pilkane esmen. Ala bulto—Ponimbar Kerma Mokun ai nonjup.
Disaipol 70-poro na disaipol pende, Jises bol mokun ai nanonjup ba enjep porpor pilgi pam pile Jises—Kerma Mokun Poninge nombar enjep pake sinam eri. Ala disaipol pende bulto Got oiro sim ga, kunum ele emilpal Jises yu dongal ne, Got gapmana tuwal moram panim bar enjep moram eri.—Luk 22:29, 30.
