Na kulu Saxoni kangjip, e Demokretik Ripablik Jemeni tuwalto. (DRJ). Nomolpa enjin bar kanka mem senge kapile monjin, ala dana mana na mambnem ka enal mal duwom erngonjil. Gapman Kominis kin kantawol erim, embe pile alamb pulikes kulu Saxoni monjip yu mambnem napinjip. Ala na, Got nameim nepinj. Na ngal molpu kongar 18 mond kunum, wal porpor erind bar, Kominis alamb bunuman na nanam Got nameim nepinj bu e dongal pam.

Nal ernge gapman Kominis lo pakjip na kakanj? Nal erim enjep alamb porpor dingmal moram paninjip. Ala na pilgi nind, alamb porpor dingmal moram. Ende wal puli kano seminro pu ende nangonda. Embe pile na yeamb gal dulom ende monjip bar molo, gapman Kominis pakeronam ne enjip bar pakerond. Na kongar 14 mond kunum, kunum pulikes kele sikenjip pepe nero mom, simakero sip pepe kol enam ne enjip kon gan erind. Na kongan e kumbol ngo erind pile ye nom walem kulu Awe monjip, kawei pile setifiket bolo wal pende pra si na ngonjip. Na yegal mond, ba Demokretik Ripablik Jemeni yenom pende monjip bol senond. Na wusngam ka karkar erind, bulto nabol wal kawei mine wonda nepinj.

Ba wamnam wal wose jelmal pum. Kongar 1989 kunum Belin Gul na kulu Erop gapman Kominis kantawol erim semene pum. Ombun wose kerma pum. Na pilkane erind gapman Kominis mambnem dulto naerim. Ende embe mal, alamb enjep pake naronjip alamb wal aei mal kanjip. Gapman Kominis pakeronjin alamb porpor dingmal moramen nepinjin, ba nalende gapman embe enem nepinjin. Ba kin bunuman embe pam e, wurkumbanj mal enjin mo? Na, bunuman puli wei kend.

Embe pile na bunuman kolsi, musikro image dro enal nepinj. Na musik sukul pund—ba bunuman kerma pam wei pu uniwesiti punal nepinj—Ala image-dro enal bar kawei pinj eri. Wal embe erind bar, ngal mond kunum dana mana mambnem ka endel pane duwom erngonjil aure nim. Na wal pende ere kapisal bar mongse pinj, ende ambel puli senond. Ba musikro, image dro ere, wal erka pisal ne erind, erkelnge na bunuman puli kend pornanim. Image pende dro erind erkelnge alamb kisal gonjip. Na bu puli kend. Bulto nawal mine wonda? Ala nal ende kenem kol meimen?

Ki embe mal pam pundom sind kunum na malmal erind. Kunum ende ponim bar sukul gar, na sukul ding ngal bol amine molo bulto nawal mine wonda mal yubol tonjin. Mendi na sukul ding ambel, olom Johova Witnis ende mom. Kunum ele olom yu kawei pende ne na pakerom. Mendi a embe nim, “Endrias,” “nim kol mein bar na mi bulto nawal mine wonda ne ki paim pundom sinal nepin dal, Baibel yu meim mane omukro kana nim.”

Yero na bunuman tal pam, ba bulto na Baibel omukro kanal kapinj. Mendi na Daniel sapta 2 kana nim, na kanj kunum malmal wei erind. Daniel yu propet nemokum, gapman omblom bol pende kongan erwo, yipe kenem kunum wonam mal nim. Kenem bol bulto wal mine wonda mal yu propet mom, Mendi tanim eri. Na ki pende mom pundom sind bar, kawei pinj! Ba yu propet meim namal yuwom? Wal mi bulto mine wonda, namal kunwei neori kera kaple enem? Got weieri mora meim?

Mendi wusngam erkun ernge Witnis anda ambiyem tal, Ost na Engelika, na pakero Baibel yu duwom erngonjil kunum, Got yuwom kanpol tond. Na pilkane ernid Johova Witnis ga lotu pende bol dingmal nameim. Got kangem Jehova enjep bol sende ne alamb ende ngopo kanam ne esim. (Buk Song 83:18; Matyu 6:9) Na duwom erkanj Johova ya mala paradais senda bar alamb kolnga aimanj moram nepisem. Buk Song 37:9 embe dom: “Alamb Johova bol pilgi nekui esim alamb mal pel sinam.” Got ka pisim mambnem karkar esim alamb, ya mala kolnga aimanj moram pane Baibel dom bar na kapinj.

Embe pile na nomolpa erind bar ombol ere, Baibel dom mal mambnem dulto karkar enal nepinj. Na musikro image dro erind bar kangem kerma pam, embe pile na ombol ere molmene mambnem sinal pam. Ba wal e porpor wakro sikeral amin wei napam. Alamb Baibel yu duwom erkanim wal nomolpa esim bar karkar enam ne esim, Johova enjep bol wimuk wamnam nane, wandil mem tane, enjep pilngonom bar na kawei wei pis!

Na kongar 18 poro, Kominis alamb Got bol pilgi nane, bunuman na mambnem aijep pam mal karkar erind. Ba Baibel yu duwom erkanj na pakerongo, nomolpa erind bar wose jelmal pum. Ala mi bulto nawal mine wonda kanpol tond. Yipe pilkane erind, kol meimen memka paim. Kongar 1993 kunum na nolpand, yipe Johova Witnis ende mei. Ala kongar 2000 kunum, Tabita, Johova konganem kumbol ngo ermom ambajen bol bolsinjil. Kil anj dunglom pulikes kele alamb pakerombo Baibel yuwei kanam ne enjil. Kil yu nengonjil alamb puli, na yo nomolpa erind bol dingmal monjip. Monjip alamb e pakerongo, Johova pilkane enam ne erind bar na kumbol amin senge kawei pinj.

Na pulnom bol Johova Witnis gabol taprond kunum, dana mana kawei napinjil. Na Witnis gabol taprond kunum nomolpa erind bar wal kawei pende mine wom enjel pilkane enjil. Na yipe kawei pis, enjel Baibel gere ala Witnis ga make paim bar pumbol eri.

Kil Tabita bol bolsinjil bar ka meimbel nalenem, bolsim ga mambnem enam pane Baibel dom mal kil karkar esbel. Kil ende ende bol ka meibel, embe pile bolsinjil mem dongal paim.—Hibru 13:4.

Na yipe mei bar wal ende erkelde kisal nagor, ala mi bulto wal mine wonda bar bu puli naker eri. Na pemili kerma ende mal yemyem kumbol amin sende, kapile meim bar tuwal mei. Pemili e tuwalto, kin ende ende bol mambnem dingmal erngomon. Mambnem embe mal, na yo mond bar ersi mine keral ne ombol erind mambnem.