ʼEi. ʼE foaki mai ʼi te Tohi-Tapu he ʼu fakamoʼoni ʼe maʼuli moʼoni te ʼAtua. ʼE tokoni mai ke tuputupu tatatou tui ki te ʼAtua, ʼo mole tou hoko tui pe ki te ʼu meʼa ʼae ʼe fakamatala e te ʼu lotu. Kae ke tou fakaʼaogaʼi totatou “fealagia fakakaukau” pea mo “te fakasiosio poto.” (Loma 12:1; 1 Soane 5:20) Koʼeni te ʼu manatu ʼe fakatafito ki te Tohi-Tapu:

•   ʼE ʼi ai te atulaulau mo ʼona lao pea ʼe maʼu ai mo te maʼuli, ko tona fakaʼuhiga ʼe ʼi ai te Tupuʼaga. ʼE ui fenei ʼi te Tohi-Tapu: “ʼE mahino ia, ko te ʼu ʼapi fuli neʼe faʼu e he tahi, kaʼe ko ia ʼae neʼe ina faʼu ia meʼa fuli ʼe ko te ʼAtua.” (Hepeleo 3:4) Tatau aipe pe ʼe mahino gafua te fakamahino ʼaeni, kae tokolahi te hahaʼi popoto neʼe natou ʼofolele ai. a

•   ʼE tupu ake te tagata mo te holi ʼae ke mahino ki te ʼuhiga ʼo te maʼuli. Pea ʼe kei logoʼi pe e te tagata ia te holi ʼaia tatau aipe ʼe ina maʼu ia meʼa fuli ʼi te faʼahi fakasino. ʼE talanoa ʼi te Tohi-Tapu ki te aluʼaga ʼaia moka palalau ki “te ʼu meʼa fakalaumalie,” ʼae ʼe kau ki ai te holi ke tou iloʼi pea mo atolasio ki te ʼAtua. (Mateo 5:3; Fakaha 4:11) Ko te ʼu holi ʼaia, ʼe ko he fakamoʼoni ʼe maʼuli moʼoni te ʼAtua. Kae ʼe ina toe fakaha ʼe ko ia ko he Tupuʼaga ʼofa ʼe ina loto ke tou fakafimalieʼi te ʼu holi ʼaia.​—Mateo 4:4.

•   ʼE maʼu ʼi te Tohi-Tapu he ʼu lea fakapolofeta neʼe tohi ʼi he ʼu sekulo ki muʼa atu pea neʼe hoko moʼoni fuli ki muli age. Ko te moʼoni pea mo te totonu ʼo te ʼu lea fakapolofeta ʼe ko he fakamoʼoni ʼaia ʼe haʼu ia mai he malohi ʼe kehe age.​—2 Petelo 1:21.

•   Neʼe maʼu e te ʼu tagata ʼae neʼe natou tohi te Tohi-Tapu ia he ʼu malama fakasienesia neʼe fakalaka age ʼi te ʼu poto ʼo te taʼi tagata ʼo te temi ʼaia. Ohage la, ʼi te temi muʼa, tokolahi neʼe natou manatu ʼe hili te kele ʼi he manu, ohage ko he alefani, he puaka vao, he pipi peʼe ko ʼihi atu manu. Kae ʼe ui ʼi te Tohi-Tapu, ko te ʼAtua neʼe ina “tautau te kele i oluga o te aele noa.” (Sopo 26:7) ʼO toe feia pe, ʼe fakamahino lelei ʼi te Tohi-Tapu te agaaga ʼo te kele ʼo ui ʼe “takafuafua.” (Esaia 40:22) He koʼe neʼe ʼatamai age te ʼu tagata ʼae neʼe natou tohi te Tohi-Tapu ʼi ʼihi ʼo tonatou temi? Tokolahi ʼe natou manatu, neʼe haʼu te ʼatamai ʼaia mai te ʼAtua.

•   ʼE lahi te ʼu fehuʼi faigataʼa ʼe tali ki ai te Tohi-Tapu. ʼE feala ki he tahi ke mole tui ki te ʼAtua mo kapau ʼe mole ina maʼu he ʼu tali loloto ki ʼihi fehuʼi. Ohage la, kapau ʼe ofa pea mo Mafimafi te ʼAtua, heʼe koʼe ʼe tou mamahi? He koʼe ʼe uga tuʼumaʼu e te ʼu lotu ia te hahaʼi ki te kovi kaʼe mole ki te lelei?​—Tito 1:16.