Kailoa. ʼE ui ʼi te Tohi-Tapu ’e gata tahi pe ki te ʼAtua ’e tou faikole ki ai, ’i te huafa ’o Sesu. Ne’e akoʼi e Sesu ki ana tisipulo: “Koia, ʼe tonu ke kotou faikole fenei: ‘Ko tamatou Tamai ʼae ʼe ʼi selo, ke tapuha tou huafa.’ ” (Mateo 6:9, Jérusalem) Ne’e mole ’i ai he temi ne’e ina fakatotonu ai ki ʼana tisipulo ke natou faikole ki te ’u sagato, te kau ʼaselo pe’e ko he tahi age ’i te ʼAtua.

 Ne’e toe ui fenei age e Sesu ki ana tisipulo: “Ko au te ala, mo te moʼoni pea mo te maʼuli. ʼE mole he tahi ʼe haʼu ki te Tamai kaʼe ʼe mole fakalaka ia te au.” (Soane 14:6, Jérusalem) Ko Sesu tokotahi ne’e fakafealagia e te ʼAtua ke tou maʼu ai tona ʼofa.—Hepeleo 7:25.

Pea kapau ’e au faikole ki te ʼAtua mo toe faikole ki te kau sagato?

 ʼI tana fakaha te ’u folafola ʼae ’e hogofulu, ne’e ui e te ʼAtua: “Ko au, IAVE, tou ʼAtua, ko he ʼAtua ʼe maheka.” (Ekesote 20:5, Jérusalem) Ko te alu’aga fea ʼae ’e maheka ai te ʼAtua? ’I te Tohi-Tapu ’o Jérusalem, ’e ina fakamahino lelei ’e ina “fakamau’a . . . he tauhi ʼateaina pe kia te ia.” ʼE fakamaʼua e te ʼAtua te ’u tauhi fuli, ’o kau ai mo te faikole, ke foaki ʼateaina pe kia te ia.—Esaia 48:11.

 Ko te fakamamahi’i ʼo te ʼAtua moka tou faikole ki he tahi age ia te ia. ’I te fia atolasio ’a te apositolo ko Soane ki he ʼaselo, ne’e taʼofi atu aipe e te aselo ’o ina ui fenei age: “ʼAua naʼa ke fai te meʼa ʼaia! Koteʼuhi ko au ko he kaugana ohage pe ko koe pea mo ʼou tehina, ʼae ʼe natou maʼu te gaue ʼae ko te fakamoʼoni ʼo ʼuhiga mo Sesu. Ke ke atolasio ki te ʼAtua!”—Apokalipesi 19:10, Jérusalem.