Kailoa, ko te kau Fakamo’oni ’a Sehova ’e ko he kau Kilisitiano ’e fakatafito ’anatou akonaki ki te Tohi-Tapu. Ko ’ihi lotu ’e natou ui ko te fakatahitahi ’a te kau Sutea ’i Palesitina, ’e ’i ai tona pikipikiga mo te ’u lea fakapolofeta ’ae ’e tu’u ’i te Tohi-Tapu. ’E mole ma’u e te kau Fakamo’oni ’a Sehova ia te manatu ’aia. ’E mole natou tui ne’e fakakikite ia te alu’aga fakapolitike ’aia ’i te Tohi-Tapu. ’E mole ui ’i te Tohi-Tapu, ’e ma’uhiga age he fa’ahiga pule’aga pe’e ko he fa’ahiga lanu pe’e ko he fa’ahiga haha’i ’i ’ihi. Ne’e fakaha lelei e Te Tule Le’o, te nusipepa ’ae ’e ta e te kau Fakamo’oni ’a Sehova, ’e mole lagolago ia te Tohi-Tapu ki te manatu fakapolitike ’a te kau Sionistes.

’E faka’uhiga e te tikisionalio Le Grand Robert ia te kupu Sionisme, “ki he kautahi fakapolitike pea mo fakalotu, ’e ina fakatu’u pea mo fakamalohi’i ia te Pule’aga fakasutea (Te Sione Fo’ou) ’i Palesitina.” Ko tona ha’u’aga ’e fakalotu pea mo fakapolitike. ’E mole lagolago ia te kau Fakamo’oni ’a Sehova ki te ’u akonaki fakalotu pea mo te ’u manatu fakapolitike ’a te kau Sionistes.

Ko te kautahi ’a te kau Fakamo’oni ’a Sehova ’e ko he kautahi fakalotu pea ’e mole lagolago ki he kautahi fakapolitike. Koia, ’e mole natou lagolago ki te kau Sionistes. ’E ilo’i ia te kau Fakamo’oni ’a Sehova ’uhi ko tanatou mole kau ki te ’u me’a fakapolitike. ’I ’ihi fenua, ne’e natou tau mo te ’u fakataga fakamataku ’uhi ko tanatou mole kau ki te ’u me’a fakapolitike. ’E tui papau ia te kau Fakamo’oni ’a Sehova, ’e gata pe anai ki te Pule’aga ’o te ’Atua ’i te lagi ’e feala ke ina ’aumai ia te tokalelei he’e gata ki te kele. Ma’a natou, ’e mole feala ki he kautahi fakapolitike pe’e ki he pule’aga fakatagata ke ina fakatu’u ia te fa’ahi ’aia.

’I he fenua pe ’e natou ma’u’uli ai, ’e faka’apa’apa ia te kau Fakamo’oni ’a Sehova ki te pelesepeto ma’uhiga ’ae ke natou fakalogo ki te ’u lao ’ae ’e fakatu’utu’u e te kau takitaki. ’E mole natou fakafeagai ki he pule’aga pe’e natou kau ki te ’u tau.