ʼE mole fakamanatu e te kau Fakamoʼoni ʼa Sehova te ʼu ʼaho tupu koteʼuhi ʼe natou iloʼi ʼe mole leleiʼia e te ʼAtua te taʼi ʼu fakafiafia ʼaia. Logo la ʼe mole tapuʼi fakahagatonu ʼi te Tohi-Tapu te fakamanatu ʼo te ʼu ʼaho tupu, kae ʼe tokoni mai ke tou fakakaukauʼi he ʼu aluʼaga neʼe kua hoko pea mo tou mahino ai ki te manatu ʼa te ʼAtua ʼo ʼuhiga mo te faʼahi ʼaia. Tou vakaʼi puani ʼe fa pea mo te manatu ʼa te Tohi-Tapu.

1. ʼE haʼu te fakamanatu ʼo te ʼu ʼaho tupu mai te temi pagani. ʼE fakamahino fenei ʼi te tohi ia te haʼuʼaga ʼo te fakamanatu ʼo te ʼu ʼaho tupu: Neʼe tui te hahaʼi, “neʼe feala ke fai e te ʼu laumalie kovi he meʼa ʼe kovi” ki he tahi ʼi tona ʼaho tupu, kae ‘ko tana fakatahi mo ʼona kaumeʼa pea mo fai hana ʼu fakapapau ke manuʼia tona maʼuli, ʼe ko hona puipui ʼaia.’ (Funk & Wagnalls Standard Dictionary of Folklore, Mythology, and Legend) ʼE ui ʼi te tohi ʼaeni, Coutumes et usages des anniversaires (fakapilitania), ʼi te temi muʼa neʼe “maʼuhiga ʼaupito te tohi ʼo te ʼu ʼaho tupu ke fai ai he horoscope” ʼe fakatafito ki te “science mystique de l’astrologie.” ʼE toe ui ʼi te tohi ʼaia, “neʼe tui te tokolahi, ʼe maʼu e te ʼu foʼi sela ʼae ʼi te ʼaho tupu, ia he malohi fakamanamana moʼo fakahoko te ʼu fakapapau.”

   Kae, ʼe tapuʼi ʼi te Tohi-Tapu ia te fakaʼaogaʼi ʼo te ʼu meʼa fakatemonio, te ʼu meʼa fakamanamana, te faifakalauʼakau, pea mo he “meʼa ʼe tatau.” (Tetelonome 18:14; Kalate 5:​19-​21) Pea koia la ʼae neʼe tauteaʼi ai e te ʼAtua ia te kolo ko Papilone, ʼuhi ko tanatou fakaʼaogaʼi te astrologie, ʼae ʼe ko he faʼahiga meʼa fakamanamana. (Esaia 47:11-​15) ʼE mole kumi tuʼumaʼu e te kau Fakamoʼoni ʼa Sehova ia te haʼuʼaga ʼo te ʼu agaʼi fenua fuli. Kae kapau ʼe talanoa ʼi te Tohi-Tapu ki he ʼu aluʼaga feia, pea ʼe mole matou tukunoaʼi.

2. Neʼe mole fakamanatu e te kau ʼuluaki Kilisitiano ia te ʼu ʼaho tupu. ʼE ui ʼi te tikisionalio, (The World Book Encyclopedia) ki te kau ʼuluaki Kilisitiano “ko te fakamanatu ʼo te ʼu ʼaho tupu neʼe ko he toʼotoʼoga fakapagani.” ʼE fakaha ʼi te Tohi-Tapu, ʼe tonu ke muliʼi e te kau Kilisitiano fuli te faʼifaʼitakiʼi ʼo te kau apositolo pea mo te ʼu tisipulo ʼae neʼe akoʼi tonu e Sesu.​—2 Tesalonika 3:6.

3. Ko te ʼaho pe ʼae neʼe maʼua ke fakamanatu e te kau Kilisitiano, ʼe mole ko te ʼaho tupu ʼo Sesu kae ko tona ʼaho mate. (Luka 22:17-​20) ʼE mole tonu ke tou punamaʼuli, he ʼe ui ʼi te Tohi-Tapu, “e lelei age he logologona lelei i te. . . aho o te mate i te aho o te tupu.” (Ekelesiasi 7:1) ʼI te ʼaho ʼae neʼe mate ai, neʼe maʼu e Sesu he logologona lelei ia muʼa ʼo te ʼAtua, ʼo maʼuhiga ake ai tona ʼaho mate ʼi tona ʼaho tupu.​—Hepeleo 1:4.

4. ʼE mole talanoa ʼi te Tohi-Tapu ki he kaugana ʼa te ʼAtua neʼe ina fakamanatu tona ʼaho tupu. Neʼe mole ko he aluʼaga neʼe galo, he ʼe talanoa te Tohi-Tapu kia fakamanatu ʼo ʼaho tupu ʼe lua neʼe fai e ni hahaʼi neʼe mole tauhi ki te ʼAtua. Kae, ʼe toe fakaha foki ʼi te ʼu ʼaho tupu ʼaia ʼe lua neʼe hoko te ʼu aluʼaga ʼe kovi.​—Senesi 40:20-​22; Maleko 6:​21-​29.

Ohage pe ko te ʼu matuʼā agalelei fuli, ʼe ʼoʼofa te kau Fakamoʼoni ki ʼanatou fanau lolotoga te taʼu katoa, ʼo natou foaki age he ʼu kiʼi meʼa ʼofa mo fakatuʼutuʼu he ʼu kiʼi temi fiafia mo ʼonatou kaumeʼa. ʼE natou faiga ke natou mulimuli ki te faʼifaʼitaki haohaoa ʼo te ʼAtua, ʼae ʼe ina foaki tuʼumaʼu te ʼu meʼa lelei ki ʼana fanau. (Mateo 7:​11) ʼE mole logoʼi e te ʼu fanau ʼa te kau Fakamoʼoni ʼe natou hala mo meʼa ʼofa. ʼE fakamoʼoni ki ai te ʼu talamanatu ʼaeni:

• “ʼE lahi age te fiafia moka foaki mai he meʼa ʼofa kae neʼe mole tou ʼamanaki ʼe fai mai.”​—Tammy, ʼe taʼu 12.

• “Tatau aipe pe ʼe mole au maʼu he meʼa ʼofa ʼi toku ʼaho tupu, kae ʼe foaki mai e ʼaku matuʼā ʼi ʼihi age temi. ʼE au leleiʼia age au ʼaia, he neʼe mole au ʼamanaki ki ai.”​—Grégory, ʼe taʼu 11.

• “ʼE ke ui ko minuta ʼe hogofulu, mo he foʼi kato, pea mo he hiva, ʼe ko te fai lafeti ʼaia? ʼE tonu ke ke haʼu ki toku ʼapi pea ʼe ke sio leva ki he lafeti moʼoni!”​—Éric, ʼe taʼu 6.