ʼI tamatou ako ia te Tohi-Tapu ʼe matou fakaʼaogaʼi he ʼu fakaliliu kehekehe. Kae ʼe matou fakaʼaogaʼi te tohi les Saintes Écritures. Traduction du Monde Nouveau mo kapau ʼe maʼu ʼi te lea ʼae ʼe matou mahino ki ai. ʼE matou leleiʼia te fakaliliu ʼaia he ʼe tuʼu ai te huafa ʼo Sehova, ʼe totonu pea ʼe mahino gafua.

•   ʼE tuʼu ai te huafa ʼo te ʼAtua. Ko ’ihi kau fakaliliu neʼe mole natou fakaapa’apa’i te hau’aga ʼo te Tohi-Tapu. Ohage la ʼe ai te tahi fakaliliu ʼe maʼu ai te ʼu higoa ʼe 70 ʼo natou ʼae neʼe gaue kiai. Kae, mole tuʼu ai te huafa ʼo Sehova ʼAtua, te Haʼuʼaga ʼo te Tohi-Tapu.

   Kae ʼi te Traduction du Monde Nouveau neʼe toe fakatuʼu ai tona huafa, ʼo mulimuli ki tona ʼu tuʼulaga ʼafeā ʼi te tohi Fakahepeleo. Pea neʼe mole pe la fakaha ʼe ʼi ai te ʼu higoa ʼo natou ʼo te Komite ʼae neʼe ina fai te fakaliliu ʼaia.

•   ʼE totonu. ʼE lahi te ʼu fakaliliu ʼe mole totonu he ʼe mole alu tahi mo te logo moʼoni ʼo te Tohi-Tapu. Ohage la ʼe fakaliliu fenei ia Mateo 27:40 ʼi te tahi fakaliliu: “Kapau ko te Alo ia koe o te Atua, hifo mai te koluse ki lalo.” Kae ʼi te tohi Fakakeleka neʼe tuʼu ai he kupu ʼe fakaʼuhiga ki he “pou”. Neʼe lagi tohi e te ʼu tagata faifakaliliu te kupu “koluse” ko tanatou tui ʼaia neʼe mate ia Sesu ʼi he koluse. Kae ʼe mole alu tahi te manatu ʼaia mo te Tohi-Tapu. Koia ʼae ʼe totonu ai te Traduction du Monde Nouveau he ʼe tou lau fenei ai: “Kapau ko koe ko te ʼAlo ʼo te ʼAtua, ke ke hifo mai te pou fakamamahi.”

•   ʼE mahino gafua. ʼE mole tonu pe ke totonu he fakaliliu kae ʼe tonu ke toe mahino gafua. Tou toʼo he faʼifaʼitaki. Ia Loma 12:11, neʼe fakaʼaogaʼi ai e te apositolo ko Paulo, ia he kupusiga palalau ko tona fakaʼuhiga ko te “pula ʼa he laumalie.” Kae ʼe faigataʼa te mahino ki te kupusiga palalau ʼaia. Koia ʼae neʼe fakaliliu ai te vaega ʼaia ʼi te Traduction du Monde Nouveau ʼaki he ʼu kupu ʼe mahino gafua. ʼE ui ai ʼe tonu ki te kau Kilisitiano ke natou “faʼafai ʼuhi ko te laumalie ʼo te ʼAtua.”

 ʼI te Traduction du Monde Nouveau ʼe tuʼu ai te huafa ʼo Sehova, ʼe totonu pea mo mahino gafua. Pea ʼe feala hau maʼu te Tohi-Tapu ʼaia kae mole ke totogi. Koia, ʼe feala ki te toko lauʼi miliona hahaʼi hanatou lau te Tohi-Tapu ʼi tonatou lea, maʼia mo natou ʼae neʼe mole natou lavaʼi te totogi ʼo he Tohi-Tapu.