Ko te kau Fakamo’oni ’a Sehova ’e natou faiga ke natou fakalotofimalie te hahaʼi fuli mo ʼanatou famili. Ko te ʼAtua ko ia te Tupu’aga ’o te famili, pea ’e tou faka’apa’apa’i te fakatu’utu’u ʼaia. (Senesi 2:21-24; Efeso 3:14, 15) ʼE akoʼi e te ʼAtua te ’u pelesepeto Fakatohi-tapu ke tokoni ki te ’u taumatuʼa fuli ke natou logo tahi mo mauli fiafia.

 ʼE tou faiga malohi ke tou muli’i te ’u tokoni ’o te Tohi-Tapu he ’e ina fakaliliu ai tatou ko he tagata mo he fafine ʼohoana lelei, pe’e ko he ’u matuʼā lelei. (Taaga Lea 31:10-31; Efeso 5:22–6:4; 1 Timoteo 5:8) ʼUhi ʼae ’e fakapotopoto te ’u tokoni ’o te Tohi-Tapu, ne’e maʼuli fiafia ai te ’u taumatuʼa kae mole nā tauhi tahi. (1 Petelo 3:1, 2) Koʼeni te tala manatu ’o te ’u hahaʼi ’e natou ʼohoana mo te ’u Fakamo’oni ’a Sehova:

•   “ʼI te ʼu ʼuluaki ta’u ʼe ono ’o toma maʼuli fakataumatuʼa ne’e lahi te ’u fa’ahi ne’e hoko ai te ’u ke ’o ma lotovaivai ai. ’I te liliu ʼa Ivete ko he Fakamo’oni ’a Sehova, ne’e agalelei pea mo fa’a kataki. Pea ko te ’u fetogi ʼae ne’e ina fai ne’e haofaki ai toma maʼuli fakataumatuʼa.”​—Clauir, Pelesile.

•   “Ko toku ʼohoana, ko Chansa, ne’e ina kamata ako te Tohi-Tapu mo te kau Fakamo’oni ’a Sehova, ne’e mole au loto ki ai. He ’e ’i taku manatu ko natou ʼaia ’e tupu ai te mavetevete ’a te ’u famili. Kae ne’e au fakatokaga’i ko te ako ’o te Tohi-Tapu ne’e tokoni ki toma maʼuli fakataumatuʼa.”​—Agness, Zambie.

 ʼI tamatou gaue faifakamafola, ’e matou fakaha ki te hahaʼi, ʼaki te mauli’i ’o te ’u pelesepeto Fakatohi-tapu, ’e feala ai

•   Tau filifili lelei’i tou ʼohoana

•   Ke fua lelei te ʼuluaki ta’u ’o te nofo ʼohoana

•   Te taupau lelei ’o te felogoi mo te ’u matuʼā

•   Te fakaalualu lelei ’o te falā

•   Te taʼofi ’o te ke

•   Te ako’i ’o te fakamolemole

•   Te ako’i ’o te ’u fanau

 Ke tou mahino ki ai, ka fetogi lotu he tahi pea ’e kamata ai pe te ’u fihifihia. ʼI te taʼu 1998, ne’e fakaha e te tanaki Sofres ko te taumatuʼa ’e 1 ki te 20 ne’e felaveʼi mo ni fihifihia ʼuhi ʼae ne’e liliu he tahi ’i te taumatua ko he Fakamo’oni a Sehova.

 Ne’e fakaha e Sesu ko natou ʼae ka natou mulimuli anai ki ʼana akonaki ’e natou felaveʼi anai mo ni fihifihia fakafamili. (Mateo 10:32-36) ʼO ʼuhiga mo te ’u loi ne’e fai ki te kau Kilisitiano ’i te Puleaga Loma, ne’e tohi fenei e te tagata faihisitolia ko Will Durant: “Ne’e fakatupu maveuveu te lotu Fakakilisitiano ’i te ’u famili.” a Ko te ’u loi ʼaia ’e toe felaveʼi pe mo te kau Fakamo’oni ’a Sehova ’i te temi nei. ’E feala koa ke tou ui ko ia ʼae ko te Fakamo’oni ’e tupu ai te ’u fihifihi’a ’i te taumatu’a?

 Ne’e ui e te Telepinale Fakaeulopa ʼo ʼuhiga mo te ’u loi ʼae ne’e fai ki te kau Fakamo’oni ’a Sehova ’ae ko natou ’e fakatupu maveuveu ’i te ’u famili. Neʼe ina fakaha ko natou ʼae mole ko he kau Fakamo’oni ’i he famili ’e tupu mai ai te ’u fihifihia moka natou fakafisi ’o tali mo faka’apa’apa’i ia te tauhi ’o anatou ’u matua.» ’E ina hoko atu: « Pea ko te ’u famili ’ae ’e mole tauhi tahi ’e hoko pe kia natou te ’u fa’ahi aia, kote kau Fakamo’oni ’a Sehova mole natou hao mai te ’u fihi aia. » b Moka hoko kia natou te ’u fihi faka lotu, ’e natou faiga malohi ke natou mauli’i te tokoni ’i te Tohi Tapu: « Aua na’a kotou liufaki ki he tahi te kovi ’aki te kovi. [...] Kapau ’e feala, pea mo fakalogo kia kotou, kotou ma’u’uli ’i te tokalele’i mo te hahai fuli pe.​—Loma 12:17, 18.

 ’E muliʼi e te kau Fakamo’oni ’a Sehova ki te fakatotonu ’a te Tohi Tapu ke ’ohoana “’i te ’Aliki pe,” ko tona ’uhiga ko he tahi ’e na tauhi tahi. (1 Kolonito 7:39) Ko te fakatotonu ʼaia ʼe ʼi ai tona fakamo’oni Fakatohi-tapu, pea ʼe totonu. ’Ohage ko te ui ’i te alatike 2010 ’o te Journal of Marriage and Family, “ko te taumatu’a ’ae ’e lotu tahi mo tauhi tahi” ʼe fua lelei tuʼumau tana ’u felogoi fakatamatu’a.” c

 Koia, ko te kau Fakamo’oni ʼa Sehova ’e mole natou ’ekenaki te ’u tehina mo tuaga’ane ke natou mavete mo ’onatou ’ohoana ’ae ʼe mole natou tauhi tahi. ’E ui ’i te Tohi-Tapu: “Kapau ko he tehina ’e mole tui tona ’ohoana, pea mo lotolelei ia te fafine ʼaia ke nā nonofo, ke mole mavae te tehina mai ia ia. Pea kapau ko he fafine ’e mole tui tona ’ohoana, pea mo lotolelei ia te tagata ’aia ke nā nonofo, ke mole mavae te fafine mai tona ’ohoana.” (1 Kolonito 7:12, 13) ’E muli’i e te kau Fakamo’oni ’a Sehova te fakatotonu ’aia.