ʼI te toko 35 000 kau Fakamoʼoni ʼa Sehova neʼe maʼuʼuli ʼi Siamani pea mo te ʼu fenua neʼe puleʼi e te kau Nasi, ko te teitei toko 1 500 neʼe mamate lolotoga te temi ʼo te kau Nasi. ʼE mole heʼeki maʼu te tupuʼaga ʼo tonatou matehi. ʼE kei lolotoga kumi nei, koia ʼe feala ke fetogi te ʼu numelo ʼaia pea mo te ʼu logo neʼe maʼu.

•  Neʼe matehi feafeaʼi natou ?

•  He koʼe neʼe fakatagaʼi natou?

•  Neʼe mamate ʼifea?

•  Ko ʼihi neʼe matehi natou

•   Neʼe matehi natou: Ko te toko 400 kau Fakamoʼoni neʼe matehi ʼi Siamani pea mo te ʼu fenua neʼe puleʼi e te kau Nasi. Ko te tokolahi ia natou neʼe fakamauʼi, mo fakatuʼā natou ki te mate pea neʼe tuʼusi ʼonatou ulu. Ko ʼihi neʼe fanahi natou peʼe neʼe haʼi ʼonatou kia kae neʼe mole pe la fakamauʼi.

•   Neʼe gaohi koviʼi ʼaupito natou: ko te toko 1 000 tupu kau Fakamoʼoni neʼe mamate ʼi te ʼu lotoʼa fakamamahi pea mo te ʼu pilisoni ʼa te kau Nasi. Neʼe gaue ʼosi ki te mate peʼe neʼe mamate ʼuhi ko tonatou gaohi koviʼi, ʼi te pakupaku, ʼi te momoko, te mahaki peʼe ko te mole faitoʼo. ʼUhi ko tonatou gaohi koviʼi, ko ʼihi neʼe mamate hili pe tonatou fakaʼateaina ʼi te ʼosi ʼo te Lua Tau Fakamalamanei.

•   Te tahi ʼu aluʼaga: Ko ʼihi kau Fakamoʼoni neʼe mamate ʼi te ʼu koga fale neʼe ʼai kiai te kasa, pe neʼe ʼahiʼahi kia natou te ʼu faitoʼo foʼou, pe neʼe huki ke mamate.

 Neʼe fakatagaʼi te kau Fakamoʼoni ʼuhi ko tanatou muliʼi te ʼu akonaki ʼa te Tohi-Tapu. Ka fakamaʼua e te puleʼaga Nasi ki te kau Fakamoʼoni ke natou fai he meʼa ʼe tapuʼi e te Tohi-Tapu, pea ʼe natou fakafisi. ʼE natou fili ke natou ‘fakalogo ki te ʼAtua ʼi tona ʼuhiga Pule, ʼi te fakalogo ki te tagata.’ (Gaue 5:29) Koʼeni aluʼaga ʼe lua ʼe natou fai ai te tonu ʼaia.

1.   Tanatou mole fai politike. Ia ʼaho nei, ko te kau Fakamoʼoni ʼo te malamanei ʼe mole fai politike, feia mo natou neʼe maʼuʼuli ʼi te temi ʼo te kau Nasi. (Soane 18:36) Koia, neʼe natou fakafisi ki te:

   •   Olo ʼo solia peʼe ko te lagolago ki te tau.​—Esaia 2:4; Mateo 26:52.

   •   Olo ʼo vote peʼe ko te fakatahi ki te ʼu kautahi Nasi.​—Soane 17:16.

   •   Fakaʼapaʼapa ki te koluse Nasi peʼe ko te kalaga “Heil Hitler!”​—Mateo 23:10; 1 Kolonito 10:14.

2.   Tanatou tauhi. Logo la te tapuʼi ʼo tanatou tauhi, kae neʼe hoko atu pe e te kau Fakamoʼoni ʼa Sehova tanatou:

   •   Fakatahi ʼo faikole mo tauhi ki te ʼAtua.​—Hepeleo 10:24, 25.

   •   Fakamafola te logo ʼa te Tohi-Tapu pea tufa te ʼu tohi fakatohi-tapu.​—Mateo 28:19, 20.

   •   Agalelei ki ʼonatou tatau, ʼo kau ai te kau Sutea.​—Maleko 12:31.

   •   Taupau tanatou tui, ʼo mole natou sinie he pepa ʼe natou fakafisi ai ki tanatou tui.​—Maleko 12:30.

 ʼE ui e te polofesea ko Robert Gerwarth ko te kau Fakamoʼoni ʼa Sehova “ʼe ko te kutuga pe ʼaia ʼi te temi ʼo te IIIe Reich, temi pule ʼa te kau Nasi, ʼae neʼe fakatagaʼi ʼuhi ko tanatou tui.” a ʼI te ʼu lotoʼa fakamamahi, neʼe tokagaʼi e te kau pilisoni ʼae te lototoʼa ʼa te kau Fakamoʼoni ʼa Sehova. neʼe ui e te tagata mai Autriche neʼe pilisoni: “ʼE mole olo ki te tau. ʼE natou loto age ke matehi natou ʼi tanatou olo ʼo matehi he tahi.”

•   Te ʼu lotoʼa fakamamahi: Ko te toko lahi ʼo te kau Fakamoʼoni ʼa Sehova neʼe mamate ʼi te ʼu lotoʼa fakamamahi. Neʼe ave natou ki te ʼu lotoʼa ohage ko ʼae ʼo Auschwitz, Buchenwald, Dachau, Flossenbürg, Mauthausen, Neuengamme, Niederhagen, Ravensbrück, pea mo Sachsenhausen. ʼI Sachsenhausen pe, neʼe fakamoʼoni te mate ʼo te toko 200 Fakamoʼoni ʼa Sehova.

•   Te ʼu fale pilisoni: Ko ʼihi kau Fakamoʼoni neʼe gaohi koviʼi natou ki te mate ʼi te ʼu fale pilisoni. Ko ʼihi neʼe mamate ʼuhi ko tonatou gaohi koviʼi lolotoga tonatou fakafehuʼi.

•   Te kogameʼa neʼe fanahi ai: Neʼe fanahi tafito te kau Fakamoʼoni ʼa Sehova ʼi te ʼu fale pilisoni ʼo Plötzensee (Berlin), mo Brandenburg, pea mo Halle-sur-Saale. Pea tahi, neʼe toe maʼu te tahi ʼu koga meʼa ʼe 70 neʼe matehi ai te kau Fakamoʼoni ʼa Sehova.

•  Higoa: Helene Gotthold

   Te kogameʼa neʼe matehi ai: Plötzensee (Berlin)

   Ko Helene, ʼe ko he fafine ʼohoana pea ko ʼana fanau ʼe lua, neʼe puke tuʼa lahi. ʼI te 1937, ʼuhi te kovi ʼosi ʼo tona gaohi koviʼi ʼi tona tahi fakafehuʼi neʼe mate ai te kiʼi toe neʼe ina fua fatuʼi. ʼI te ʼaho 8 ʼo Tesepeli 1944, neʼe tuʼusi tona kia ʼi te fale pilisoni ʼo Plötzensee, ʼi Berlin.

•  Higoa: Gerhard Liebold

   Te kogameʼa neʼe matehi ai: Brandenburg

   ʼI te ʼaho 6 ʼo Maio 1943, neʼe tuʼusi te kia ʼo Gerhard kae neʼe kei taʼu 20, hili pe taʼu ʼe lua ki te tuʼusi ʼo te kia ʼo tana tamai ʼi te fale pilisoni pe ʼaia. Neʼe faitohi tauʼine ki tona famili mo tona ʼohoana: “Kana ʼaua la te malohi ʼa te ʼAliki, neʼe mole feala ke au alu ʼi te ala ʼaia.”

•  Name: Rudolf Auschner

   Te kogameʼa neʼe matehi ai: Halle/Saale

   Neʼe taʼu 17 ia Rudolf ʼi te temi ʼae neʼe tuʼusi ai tona kia ʼi te ʼaho 22 ʼo Sepetepeli 1944. ʼI tana tohi tauʼine ki tana faʼe, neʼe ina tohi: “Neʼe lava haʼele te ʼu tehina kaugamalie ʼi te ala ʼaia, koia ʼe au lavaʼi anai mo au.”