ʼE ko natou pe ʼae ʼe kau ki te gaue faifakamafola ʼo te logo lelei ʼo te Puleʼaga ʼo te ʼAtua ʼe lau ko he kau Fakamoʼoni ʼa Sehova. (Mateo 24:14) ʼE kau ki ai ia natou ʼae kua papitema mo natou ʼae heʼeki papitema kaʼe kua natou mulimuli ki te ʼu fakamaʼua tafitō ʼo te gaue faifakamafola.

Kailoa ia. ʼE mole fakalogo ki te ʼu meʼa ʼofa ʼae ʼe foaki e he tahi ke liliu ai ko he Fakamoʼoni, peʼe ke ina maʼu ai he ʼu pilivilesio ʼi tomatou kautahi. (Gaue 8:18-20) ʼE mole matou iloʼi ia natou fuli ʼae ʼe foaki meʼa ʼofa. Kaʼe ʼe tahi foaki pe e te Fakamoʼoni ia tona temi, tona malohi pea mo ʼona koloa moʼo lagolago ki te gaue fakamalamanei ʼo mulimuli pe ki tona lotolelei pea mo tona fealagia.​—2 Kolinito 9:7.

ʼI te mahina fuli, ʼe fakaha e te kau Fakamoʼoni ʼaki he lotolelei ʼanatou gaue faifakamafola ki ʼonatou kokelekasio.

ʼE fakatahiʼi te lahi ʼo te ʼu gaue ʼo ʼave ki te pilo ʼo te filiale. Pea ʼe momoli leva te tanaki ʼo te ʼu gaue ʼo te ʼu fenua takitahi ki tomatou pilo lahi.

ʼI te fakaʼosi ʼo te taʼu gaue fuli, b ʼe lau pe ko kau Fakamoʼoni ʼe toko fia ʼi te ʼu fenua takitahi. Pea ʼe fakatahiʼi te lahi ʼo natou ke iloʼi pe ʼe ko kau Fakamoʼoni ʼe toko fia ʼi te malamanei katoa. Ko te ʼu tanaki ʼaia ʼo te ʼu fenua takitahi, mo te ʼu aluʼaga ʼae neʼe hoko ʼi te faifakamafola ʼe maʼu ʼi te Annuaire des Témoins de Jéhovah. Ko te ʼu tanaki ʼaia ʼe fakalotomalohiʼi ʼaki matou, ohage pe ko te kau ʼuluaki Kilisitiano.​—Gaue 2:41; 4:4; 15:3.

Logo la ʼe mole lau natou ko he ʼu Fakamoʼoni, kaʼe ʼe fakatalitali fakafiafia ia natou ʼi ʼomatou kokelekasio. Ko te tokolahi ʼo natou ʼe kau ki te Fakamanatu ʼo Te Mate ʼo Sesu. ʼE feala ai ke iloʼi pe neʼe natou toko fia ʼaki te toʼo kehe ʼo te kau Fakamoʼoni ʼa Sehova mai te lahi ʼo te nofoʼaki katoa ʼae neʼe kau ki te ʼAho Fakamanatu. ʼI te taʼu 2023, neʼe ko te toko 20 461 767 neʼe kau ki te ʼAho Fakamanatu.

Tokolahi ʼe kau ki ʼamatou fono ʼe fai tanatou ako Tohi-Tapu ʼe mole totogi. ʼI te taʼu 2023, ko Ako Tohi-Tapu ʼe teitei 7 281 212 ʼi te mahina fuli pea ʼi ʼihi temi, neʼe matou fai te ako ʼa te tokolahi ʼi te temi pe ʼe tahi.

ʼI te fehuʼi ʼae e te ʼu puleʼaga ki te hahaʼi pe ʼe natou kau ki te kutuga lotu fea, ʼe feala ai ke natou maʼu te lahi ʼo te hahaʼi ʼo te ʼu lotu kehekehe. Ohage la, ʼi Amelika, ko te pilo ʼo te Recensement, ʼe natou ui ko tanatou fakatuʼutuʼu “ko te kumi ke natou iloʼi pe ko te hahaʼi ʼae ʼe natou fakafehuʼi ʼe kau ki he kutuga lotu.” Pea ko te lahi ʼo te hahaʼi ʼae neʼe natou maʼu ʼe “mole moʼoni.” Kaʼe, ʼe mole matou lau ia natou ʼae ʼe natou ui pe ko ni Fakamoʼoni ʼa Sehova, kaʼe ʼe matou lau pe ia natou ʼae ʼe faifakamafola pea mo natou foaki hanatou pepa tanaki gaue.