’E lotolelei te kau Fakamo’oni ’a Sehova ke natou ako’i te Tohi-Tapu ki te haha’i, pea mo natou tali ki te ’u fehu’i ’aeni:

•   Ko ai te ’Atua?

•   ’E tokaga mo’oni koa te ’Atua kia au?

•   Kotea ’ae ’e feala ke au fai ke lelei age toku ma’uli fakataumatu’a?

•   ’E au lava ma’u feafea’i koa he ma’uli fiafia?

 ’E tali anai ’i lalo ifo ki te ’u fehu’i ’ae ’e fai tu’uma’u ’o ’uhiga mo te ’u ako Tohi-Tapu ’ae ’e matou fai.

  ’E feafea’i takotou fai te ako? ’E matou filifili he ’u kupu tafitō, ohage ko te kupu “’Atua” pe’e ko te “nofo fakataumatu’a,” pea matou lau ni vaega Tohi-Tapu ’e alu tahi mo te ’u kupu tafitō ’aia. ’I tamatou fakatatau te ’u vaega ’aia, ’e matou ilo’i ai pe kotea ’ae ’e ui ’i te Tohi-Tapu katoa ’o ’uhiga mo te fa’ahi ’aia, ’o matou fakamahino age ’aki te Tohi-Tapu.

 Mo’o tokoni mai ki te ako ’o te Tohi-Tapu, ’e matou faka’aoga’i te tohi Koteā ’Aē ’e Ako’i Mo’oni Mai ’i Te Tohi-Tapu? ’E fakamahino lelei ’i te tohi ’aia pe kotea ’ae ’e ui mo’oni ’i te Tohi-Tapu ’o ’uhiga mo te ’Atua, mo Sesu, mo totatou ka ha’u, pea mo ’ihi atu ’u fa’ahi.

  ’E totogi koa te fai ’o he ako Tohi-Tapu? ’E mole totogi, ’o toe feia mo te ’u tohi.

  Ko hola ’e fia ’e fai ai te ako? Tokolahi ’e natou faka’aoga’i ia te hola katoa ’i te vaha’a fuli mo’o fai ia te ako. Ka’e ’e feala ke fetogi, he’e matou mulimuli pe anai ki te ’u temi ’ae ’e kotou faigamalie ai.

  Kotea ’ae ’e hoko moka ’e au kole ke fai haku ako Tohi-Tapu? Ka ke kole ke fai hau ako Tohi-Tapu, ’e ’a’ahi anai koe e he Fakamo’oni ’a Sehova ’i te hola mo te koga me’a ’ae ’e ke loto ki ai. ’E ina fakaha atu anai pe feafea’i ia te fai ’o te ako. Kapau ’e ke lelei’ia, pea ’e feala leva ke fai hau ako.

  Kapau ’e au tali ke fai haku ako Tohi-Tapu, pea ’e fakama’ua koa ke au liliu ko he Fakamo’oni ’a Sehova? Kailoa. ’E matou fia ako’i ki te haha’i ia te Tohi-Tapu, ka’e ’e mole matou fakakinau’i anai he tahi ke hu mai ki tamatou lotu. ’E matou fakaha ’aki he faka’apa’apa pe kotea ’ae ’e tu’u ’i te Tohi-Tapu, ’o matou tuku ke filifili e te haha’i ia te fa’ahi ’ae ’e natou fia tui ki ai.—1 Petelo 3:15.