ʼE fakaʼapaʼapa te kau Fakamoʼoni ʼa Sehova ki te ʼu puleʼaga pea mo te ʼu meʼa ʼae ʼe pipiki kiai. ʼE matou toe fakaʼapaʼapa ki te filifili e ʼihi ke natou fai hanatou fakapapau ki te puleʼaga, mo tanatou fakamaʼuhigaʼi te fuka pea mo hivaʼi te hiva ʼo te puleʼaga.

 Kae, ʼe mole kau te kau Fakamoʼoni ʼa Sehova ki te ʼu toʼotoʼoga fakapuleʼaga ʼuhi ʼae ʼe mole alu tahi mo te Tohi-Tapu. ʼE matou fiafia mo kapau ʼe fakaʼapaʼapa te hahaʼi ki ʼamatou tonu, ohage pe ko tamatou fakaʼapaʼapa ʼae ki ʼanatou tonu.

ʼI te alatike ʼaeni

•  Kotea te ʼu lekula ʼo te Tohi-Tapu ʼae ʼe matou mulimuli kiai?

•  Kae ʼe feafeaʼi mo kapau ʼe fakamaʼua e te lao te kau ki he toʼotoʼoga?

•  ʼE tauʼi koa e te kau Fakamoʼoni ʼa Sehova he ʼu manatu ʼi te faʼahi fakasosiale pea mo fakapolitike?

 Koʼeni pelesepeto fakatohi-tapu maʼuhiga ʼe lua:

•   ʼE ko te ʼAtua pe ʼae ʼe tonu ke fai kiai te tauhi. ʼE ui ʼi te Tohi-Tapu: “ʼE tonu ke ke atolasio kia Sehova tou ʼAtua pea mo foaki kia te ia tokotahi pe he tauhi taputapu.” (Luka 4:8) Kae ʼe ui foki ʼi te ʼu fakapapau pea mo te ʼu hiva ʼo te ʼu puleʼaga ʼe tonu ke fakamaʼuhigaʼi te puleʼaga ʼo laka age ia meʼa fuli. ʼE mahino ai pe koʼe ʼe mole kau te kau Fakamoʼoni ʼa Sehova ki te ʼu taʼi toʼotoʼoga ʼaia.

   ʼE toe fakaʼuhigaʼi e te kau Fakamoʼoni ʼa Sehova te fakaʼapaʼapa ʼae ʼe fai ki te fuka ki he tauhi taula ʼatua. (1 Kolonito 10:14) ʼE fakamoʼoni e te kau fai hisitolia, ko te ʼu fuka neʼe ko he ʼu meʼa fakalotu. Neʼe tohi fenei e Carlton Hayes: “Ko te fuka neʼe ko te fakaʼiloga ʼaia ʼo te tui pea ʼe ko te tafitoʼaga ʼaia ʼo te tauhi ki te puleʼaga.” a ʼO ʼuhiga mo te kau ʼuluaki Kilisitiano, neʼe ui fenei e tagata faitohi ʼae ko Daniel P. Mannix: “Neʼe fakafisi te kau Kilisitiano ke natou fai . . . he molaga ki te faiva ʼo te hau [Loma], ia te meʼa ʼae ʼe fakaʼuhiga ʼi te temi nei ki te fakaʼapaʼapa ʼae ʼe fai ki te fuka.” b

  Logo la ʼe mole fai e te kau Fakamoʼoni ʼa Sehova te fakaʼapaʼapa ki te fuka, kae ʼe mole natou faiga anai ke natou maumauʼi, peʼe natou tutu, peʼe natou fakaʼaoga ʼi he tahi age aluʼaga ʼe mole fakaʼapaʼapa. ʼE natou fakaʼapaʼapa kia meʼa fuli ʼe fakaʼuhiga ki te puleʼaga.

•   Ko te hahaʼi ʼe natou tatau fuli ki te ʼAtua. (Gaue 10:34, 35) ʼE ui ʼi te Tohi-Tapu neʼe fakatupu e te ʼAtua “mai te tagata ʼe tahi ... te hahaʼi ʼo te ʼu lanu fuli.” (Gaue 17:26) Koia ʼae ʼe mahino ai te kau Fakamoʼoni ʼa Sehova ʼe mole lelei te fakamaʼuhigaʼi ʼo he lanu peʼe ko he puleʼaga. ʼE natou fakaʼuhiga tatau te hahaʼi fuli, mai he fenua pe.—1 Petelo 2:17.

 ʼE mole fakafeagai te kau Fakamoʼoni ʼa Sehova ki te ʼu puleʼaga. ʼE natou iloʼi ko te ʼu puleʼaga ʼe ko he koga ʼo te “fakatuʼutuʼu ʼa te ʼAtua” ʼae ʼe ina fakagafua ke pule. (Loma 13:1-7) ʼE natou toe fakamoʼoni ʼe tonu ke fakalogo te kau Kilisitiano ki te kau takitaki.—Luka 20:25.

 Kae ʼe feafeaʼi mo kapau ʼe mole felogoi he lao ʼa he puleʼaga mo he lao ʼa te ʼAtua? ʼI ʼihi aluʼaga, ʼe feala ke kole ki te puleʼaga ke fetogi te lao. c Kapau ʼe mole feala ke fetogi, pea ko matou kau Fakamoʼoni ʼa Sehova, ʼe matou fai ʼaki te fakaʼapaʼapa te tonu ʼae “ke matou fakalogo ki te ʼAtua ʼi tona ʼuhiga pule, ʼi hamatou fakalogo ki te tagata.”—Gaue 5:29.

 ʼOho. ʼE mole lagolago te kau Fakamoʼoni ʼa Sehova ki te ʼu fihi fakasosiale pea mo fakapolitike. Ko tanatou fakafisi ʼae ki te fakapapau ʼae ki te puleʼaga, te fai ʼo te fakaʼapaʼapa ki te fuka, mo te hiva te hiva ʼae ʼo te puleʼaga, ʼe mole fakaʼuhiga ʼe natou lagolago ki he faʼahi fakapolitike peʼe ko hamatou fakafeagai, kailoa. Kae ʼe natou fakaha ai tanatou mulimuli ki te meʼa ʼae ʼe ui ʼi te Tohi-Tapu ʼo ʼuhiga mo te ʼu toʼotoʼoga ʼaia.