’Ei. ’E matou tokoni ki te haha’i moka hoko he tu’utamaki fakanatula. ’E matou tokoni ki te haha’i fuli pe, tatau aipe pe ko he Fakamo’oni ’a Sehova pe’e kailoa. ’E matou mulimuli ki te fakatotonu ’ae ’e tu’u ’i te Tohi-Tapu ia Kalate 6:10, ’ae ’e ui fenei: “Tou fai te mea e lelei ki te tagata fuli, kae tafito ki te u tehina i te tui.” ’E matou toe faiga’i ke matou fakalotomalohi pea mo foaki te tokoni fakalaumalie ’ae ’e ’aoga tafitō ki te haha’i ’i te ’u temi ’aia.—2 Kolinito 1:3, 4.

’I te hili ’o he tu’utamaki, ’e faiga’i ’e natou ’ae ’e natou tokaga ki te ’u kokelekasio ke natou ma’u logo ’o ’uhiga mo tanatou haha’i pea mo natou ’ae ’e fakamamahani mai ki ’anatou fono. ’E natou vaka’i ai pe natou lelei pe pea mo fakalavelave pe kotea ’ae ’e ’aoga kia natou. Hili ia, pea ’e natou fakaha ki te pilo ’a te kau Fakamo’oni ’a Sehova ’o tonatou fenua ia te ’u alu’aga ne’e hoko pea mo fakahaha lelei pe kotea te tokoni ’ae ne’e foaki.

Kapau ’e mole lava tokoni te ’u kokelekasio ’o te fenua ’aia ne’e hoko ai te tu’utamaki fakanatula, ’e feala ki te Kolesi Pule ’a te kau Fakamo’oni ’a Sehova ke ina fai ia te fa’ahi ’aia. Ne’e toe fai feia mo te kau ’uluaki Kilisitiano mo’o tau’i ia te hoge. (1 Kolinito 16:1-4) ’E fakatu’utu’u anai e te filiale ’o te fenua ia he ’u komite haofaki ma’uli mo’o takitaki ia te gaue ’aia. ’E lotolelei ’e ’ihi kau Fakamo’oni ’a Sehova ’o te tahi age ’u fenua ke natou foaki tonatou temi pea mo ’onatou koloa.—Taaga Lea 17:17.

Ko te ’u me’a ’ofa ’ae ne’e momoli ki te ’u filiale ’a te kau Fakamo’oni ’a Sehova ’e faka’aoga’i mo’o foaki he tokoni kia natou ’ae ne’e hoko ki ai ia te tu’utamaki fakanatula. (Gaue 11:27-30; 2 Kolinito 8:13-15) ’E mole totogi ia natou ’ae ’e natou kau ki te ’u gaue haofaki ma’uli. Koia ko te vaega falā ’o ’uhiga mo te haofaki ma’uli ’e faka’aoga’i ’ateaina pe mo’o totogi ’aki te ’u me’a ’ae ’e ’aoga ki te haofaki ma’uli. ’E matou faka’aoga’i lelei ia te ’u me’a ’ofa.—2 Kolinito 8:20.