Kailoa. Ko te kau Fakamoʼoni ʼa Sehova ʼe natou tui e ko te ʼAtua ʼae neʼe ina fakatupu ia meʼa fuli. Kaʼe ʼe mole natou tui ki te ʼui ʼae neʼe fakatupu ia te kele ia ʼaho moʼoni pe e ono. Kotea tona tupuʼaga? Koteʼuhi ’e mole ’alu tahi te manatu ʼaia mo te Tohi-Tapu. Kotou vakaʼi te ʼu faʼifaʼitaki ʼaeni ’e lua:

1. Te loaloaga ’o te ʼu ʼaho ʼae ʼe ono ʼo te fakatupu. Ki te manatu ’a ʼihi ia natou ’aia, ko te ʼu ʼaho ʼae e ono ʼo te fakatupu, ʼe ko te ʼu ʼaho moʼoni e ono, ʼe 24 hola takitahi. Kaʼe ko te kupu “ʼaho” ʼi te Tohi-Tapu ʼe feala ke toe fakaʼuhiga ki he temi loaloaga.—Senesi 2:4; Pesalemo 90:4.

2. Te ’u taʼu ’o te kele. Ko ʼihi ’e natou akoʼi kua hili pe te ʼu kiʼi ta’u ’e lau ’i afe talu mai te kua fakatupu ʼo te kele. Kaʼe ʼe ui ʼi te Tohi-Tapu, ko te kele mo te atulaulau neʼe kua tuʼu ia ʼi muʼa ʼo te ʼu ʼaho ʼae e ono ʼo te fakatupu. (Senesi 1:1) Koia ’e mole fakafihi’i e te kau Fakamoʼoni ʼa Sehova ia te ʼu fekumi ʼa te kau poto ʼo ʼuhiga mo te kele, ʼo natou ui ai kua tuʼu te kele talu mai te ʼu lauʼi miliale taʼu.

ʼE tui ia te kau Fakamoʼoni ʼa Sehova ki te fakatupu kaʼe ʼe mole natou fakafihiʼi te ʼu manatu ʼa te kau poto. ʼE natou iloʼi ko te ʼu faʼahi fakasienesia ʼe alu tahi mo te Tohi-Tapu.