Ko te Watch Tower Bible and Tract Society of Pennsylvania ʼe ko he kautahi ʼe mole kumi paʼaga pea neʼe fakatuʼu ʼi te taʼu 1884 ʼo mulimuli ki te ʼu lao ʼa te puleʼaga ʼo Pennsylvanie (États-Unis). ʼE fakaʼaogaʼi e te kau Fakamoʼoni ʼa Sehova moʼo lagolago ki tanatou gaue ʼae ʼe fai ʼi te malamanei katoa, ʼe kau ai te ta ʼo te ʼu Tohi-Tapu pea mo te ʼu tohi Fakatohi-tapu.

Ohage pe ko tona fakaha ʼi te ʼu lao ʼa te kautahi ʼaia, ʼe fai e te kautahi ʼaia ni fakatuʼutuʼu “fakalotu, mo ni ako pea mo ni akonaki,” tafito kia natou ʼae ʼe natou “fakamafola mo akoʼi te Evaselio ʼo te Puleʼaga ʼo te ʼAtua ʼi te takitaki ʼa Sesu Kilisito.” ʼE fakaafe ia ia ʼae ʼe fia kau ki te kautahi ʼaia, pea ʼe mole fakalogo ia ki te ʼu meʼa ʼofa ʼae ʼe ina foaki. Ko natou ʼae ʼe kau ki te kautahi ʼaia ʼe tokoni ki te Kolesi Pule ʼa te kau Fakamoʼoni ʼa Sehova.

ʼI tuʼa atu ʼo te Watch Tower Bible and Tract Society of Pennsylvania, ʼe lahi te ʼu kautahi ʼe fakaʼaogaʼi e te kau Fakamoʼoni ʼa Sehova ʼi te ʼu fenua kehekehe. Ko ʼihi ʼe natou fakapipili te kupu “Watch Tower,” peʼe “Watchtower,” peʼe ko tona fakaliliu ki te higoa ʼo te kautahi.

ʼAki te ʼu kautahi ʼaia, neʼe feala ai ke matou fakahoko ia he toe gaue lahi talu mai te temi ʼae neʼe fakatuʼu ai natou, ohage la:

• Te Ta ʼo Te ʼu Tohi: Neʼe matou ta ia Tohi-Tapu ʼe teitei 220 miliona pea mo tohi Fakatohi-tapu ʼe 40 miliale ia lea ʼe 900 tupu. ʼE fakafealagia e te tuʼasila ʼi te Neti jw.org ke lau e te hahaʼi te Tohi-Tapu ʼi te Neti ia lea ʼe 120 tupu, pea mo maʼu te ʼu tali ki te ʼu fehuʼi Fakatohi-tapu, ohage la: “Kotea ia te Puleʼaga ʼo te ʼAtua?”

• Te Ako ʼo Te Tohi-Tapu. Neʼe matou fakatuʼu ia fale ako kehekehe ki te ako ʼo te Tohi-Tapu. Ohage la, talu mai te taʼu 1943, neʼe lahi te ʼu faʼahi neʼe ako e te toko 9000 kau Fakamoʼoni ʼa Sehova ʼi te Ako Tohi-Tapu ʼo Kileate ʼa Te Watchtower ke natou liliu ko ni misionea peʼe tokoni ki te gaue ʼae ʼe fai ʼi te malamanei katoa. Pea ʼi te vahaʼa fuli, ko te toko lauʼi miliona hahaʼi, kau ai mo natou ʼae ʼe mole ko he kau Fakamoʼoni, ʼe natou maʼu ia he ako ʼi te ʼu fono ʼae ʼe fai ʼi te ʼu kokelekasio fuli. ʼE matou toe fai foki mo te ʼu ako lautohi pea mo matou ta te kaupepa ia lea ʼe 120 ʼe ako ai te lautohi mo te faitohi.

• Te Gaue Haofaki Maʼuli: ʼE matou foaki he tokoni kia natou ʼae neʼe tau mo te ʼu tuʼutamaki ʼae ʼe tupu mai te tagata, ohage la ko te mateā neʼe hoko ʼi Rwanda ʼi te taʼu 1994, peʼe fakanatula, ohage ko te mafuike ʼae neʼe to ʼi Haïti ʼi te taʼu 2010.

Logo la ko te ʼu gaue ʼae ʼe matou fai ʼe fakatuʼutuʼu e te ʼu kautahi ʼaia ʼae ʼe matou fakaʼaogaʼi, kae ʼe mole fakalogo tamatou gaue ki te ʼu faʼahi ʼaia. ʼE ʼa te Kilisitiano takitokotahi te fakahoko ʼo te gaue ʼae neʼe tuku e te ʼAtua ʼae ko te fakamafola mo akoʼi te logo lelei. (Mateo 24:14; 28:19, 20) ʼE matou tui papau ʼe lagolago te ʼAtua ki tamatou gaue pea ʼe hoko atu anai tana haga ʼo “fakatuputu.”—1 Kolonito 3:6, 7.