ʼI te Moeaki, ʼaho 5 ʼo Oketopeli 2013, ko te toko 257 294 hahaʼi ia fenua e 21 neʼe natou mulimuli ki te 129 fono ʼae ʼe fai ʼi te taʼu fuli ʼo te Watch Tower Bible and Tract Society of Pennsylvania. Ko ʼihi neʼe natou heheka ʼi te fale ʼae neʼe fai ai te fono ʼaia pea ko ʼihi neʼe natou mulimuli ki ai ʼaki te Neti. Ki muli age, neʼe toe fakasio te polokalama ʼaia ki te tahi age kau Fakamoʼoni. Koia, neʼe ko hahaʼi ʼe toko 1 413 676 ia fenua e 31 ʼae neʼe natou sisio ki te polokalama. Ko te fono ʼaia neʼe fai ʼi te taʼu ʼaia neʼe ko te fono ʼae neʼe kaugā malie age ai te kau Fakamoʼoni ʼa Sehova, ʼo laka age ʼi te toko 1 327 704 hahaʼi ʼae neʼe natou sisio ki te polokalama makehe ʼae neʼe fai ʼi Mekesike pea mo Amérique centrale ʼi te ʼaho 28 ʼo Apelili 2013.

Talu mai te ʼu taʼu 1920, ʼe fakaʼaogaʼi e te kau Fakamoʼoni ʼa Sehova te telefoni pea mo te latio ke lava mulimuli te hahaʼi ʼi te malamanei katoa ki ʼanatou fakatahi lalahi. ʼI te temi nei, ʼaki te Neti, kua feala, maʼia mo natou ʼae ʼe nonofo mamaʼo, ke natou logo pea mo sisio ki te ʼu fakatahi. Ko William, ʼae ʼe ko he Fakamoʼoni ʼa Sehova ʼi Amelika, neʼe kau ki te fakatahi neʼe fai ʼi te taʼu 1942, ʼi te kolo ko Richmond, ʼi Virginie, pea neʼe fakalogo ki te polokalama ʼaki te telefoni. Neʼe ina fakatatau te aluʼaga ʼaia mo tana lava sio ʼi te taʼu leva ʼaeni ki te polokalama ʼo te fono ʼae ʼe fai ʼi te taʼu fuli. ʼE ina ui fenei: “ʼE lahi age te ʼu meʼa ʼe kita ako moka kita lava sio ki te polokalama. ʼE mole hona fakatatau.”

ʼI te ʼu filiale ʼa te kau Fakamoʼoni ʼa Sehova, neʼe gaue ʼihi ʼi te taʼu katoa pea lolotoga ni hola ke feala ke mulimuli te hahaʼi ʼaki te Neti ki te polokalama ʼo te fono ʼaia. ʼI te ʼu ʼaho ʼae neʼe fai ai te fono, neʼe nonofo te hahaʼi gaue masini ʼi te fale ʼo Brooklyn, New York ʼo natou tokakaga ke haʼele lelei ia meʼa fuli. Neʼe natou leʼo lolotoga hola e 24, koteʼuhi neʼe fakafelogoʼi ʼaki te Neti te ʼu fenua e 15 mo ʼonatou hola kehekehe. Ko Ryan, ʼae neʼe kau ki te ʼu gaue ʼae ʼo te teuteu pea mo te fakaha ʼi te Neti, ʼe ina ui fenei: “Neʼe mole matou momoe. Kaʼe ʼi tamatou manatu ʼae neʼe tokolahi age te hahaʼi neʼe feala ke natou sisio ki te polokalama, neʼe matou fiafia ai.”