ʼI te Feliaono, ʼaho 5 ʼo Sulio 2013 neʼe fiafia te famili ʼo te Petele ʼi Amelika ʼuhi ko te logo ʼaeni neʼe tala e te tehina ko Antony Morris, ʼe kau ki te Kolesi pule: “Kua fakatau te ʼu fale fata ʼe ono, ʼo kau ki ai te fale fata ʼo te 117 Adams Street pea mo ʼae ʼo te 90 Sands Street, ʼi Brooklyn. a Pea ʼuhi ʼae ʼe fakatau te ʼu fale fata 1 ki te 5, koia ʼe maʼua ke fakaʼatea fuli, ʼi muʼa ʼo te vaelua ʼo te mahina ʼo ʼAukusito ʼo te taʼu ʼaeni.”

ʼE mahino ia, neʼe ko he toe gaue lahi neʼe tonu ke fai. Ko te lahi ʼo te ʼu fale fata ʼaia ʼe nima ʼe fakatatau kia malaʼe aka fitipolo ʼe 11 ʼae ʼe fakaʼaogaʼi ki te ʼu fehokosi fakamalamanei! Pea neʼe tonu ke fakaʼatea te ʼu fale fata ʼaia ia ʼaho ʼe 60.

Lolotoga ni taʼu, neʼe tuku ʼi te ʼu fale fata 1 ki te 5 te ʼu masini ta tohi pea mo te ʼu masini ʼae ʼe natou fakapipiki te ʼu tohi. Kaʼe ʼi te taʼu 2004, neʼe ʼave te ʼu meʼa gaue ʼaia ki Wallkill (te kolo ʼo New York).

Talu mai ai, neʼe liliu te ʼu fale fata ʼaia ko he ʼu fale tanakiʼaga meʼa pea neʼe fakatuʼutuʼu ai te ʼu gaue moʼo taupau ke lelei te ʼu fale fata. Neʼe tanaki ki ai te ʼu meʼa gaue laga fale, mo te ʼu meʼa gaue ʼi te ʼu pilo, pea mo te ʼu meʼa gaue neʼe fakaʼaogaʼi moʼo lagolago ki te ʼu laga fale ʼi Amelika pea ʼi te tahi ʼu fenua.

Ke ʼosi te fakaʼatea ʼo te ʼu fale fata ʼi tona temi totonu, neʼe tonu ke fai he ʼu fakatuʼutuʼu lelei. ʼUluaki, neʼe tohi te ʼu meʼa ʼae neʼe ʼi te ʼu fale fata ʼaia, ke iloʼi ai te ʼu meʼa ʼae neʼe tonu ke fakatau, ke liakī peʼe ke taupau. Hili ʼaia, neʼe fai he ʼu fakatuʼutuʼu ke fakahoko lelei te gaue pea ke mole he lavea.

Neʼe gaue kinakina te famili ʼo te Petele ke iku lelei te fakatuʼutuʼu ʼaia. Pea ko te kau gaue fakatemi ʼe toko 41 neʼe fakaafe ke natou ʼomai ki te Petele moʼo tokoni. Tokolahi neʼe natou ʼomai mai te ʼu potu kehekehe ʼo Amelika. Tokolahi ia natou ʼaia neʼe malolohi pea mo selipatea. Neʼe natou tali te fakaafe ʼae ke natou ʼomai lolotoga vahaʼa ʼe ono peʼe hogofulu, kaʼe natou tuku ʼonatou famili, mo ʼonatou kaumeʼa, pea mo ʼonatou gaue, ke natou gaue ʼi te Petele. Neʼe kotea tanatou manatu ʼo ʼuhiga mo tanatou gaue ʼaia?

Ko Jordan, ʼe taʼu 21, neʼe haʼu mai Washington, ʼi Amelika. Neʼe ina ui fenei: “Ka na neʼe au iloʼi la neʼe feia te gaue, neʼe au tohi taku pepa ke au kau ki te gaue ʼi muʼa atu ia.”

Ko Steven, ʼe taʼu 20, neʼe haʼu mai te kolo ko Texas. Neʼe ina ui fenei: “ʼE au logoʼi ʼe au kau ki te foʼi famili kaugā malie, ʼe gaue kinakina, mo fiafia, ʼe ko he foʼi famili fakamalamanei.”

Ko Justin, ʼe taʼu 23, neʼe tohi fenei: “ʼE hage taku nofo ʼi heni, ʼi te Petele, ko haku nofo ʼi toku ʼapi. ʼE fakaofoofo ia te poto fakaʼatua, mo te ʼofa pea mo te fale tau tehina ʼae ʼe maʼu ʼi te Petele.”

Adler, ʼe taʼu 20, neʼe haʼu mai Puerto Rico, neʼe ina ui fenei: “Neʼe faigataʼa kia au taku ala ake uhuuhu, kaʼe neʼe feala ke au maʼu hoku ʼu kaumeʼa ki te heʼe gata.”

Ko William, ʼae ʼe taʼu 21, neʼe ina ui fenei: “Talu taku kei veliveli, neʼe au moemisi ke au alu ki te Petele. ʼI taku manatu, ʼe au nofo tokotahi pe anai au ʼi te Petele, kaʼe neʼe au faihala. Ko taku nofo ʼae ʼi heni neʼe ko te meʼa lelei tokolahi ʼaia neʼe hoko ʼi toku maʼuli. ʼE mole he tahi age meʼa ʼe lelei age.”

Neʼe natou fakaʼosi koa te gaue ʼi tona temi totonu? ʼEi, ia ʼaho ʼe 55.