ʼI te taʼu fuli, ko te toko lauʼi hogofulu afe hahaʼi ʼe natou olo ʼo mamata te ʼu fale fata ʼo te Filiale ʼo Amelika pea mo te ʼu pilo lalahi ʼa te kau Fakamoʼoni ʼa Sehova ʼi New York. ʼE higoa te ʼu fale ʼaia ko te Petele, ʼe ko he higoa Fakahepeleo pea ko tona fakaʼuhiga “ʼApi ʼo Te ʼAtua.” Ko te hahaʼi ʼae ʼe maʼuʼuli ovi peʼe mamaʼo, ʼe natou ʼomai ʼo sio ki te ta ʼo te ʼu tohi, mo vakaʼi pe feafeaʼi te fakatuʼutuʼu ʼo te gaue pea mo natou ʼaʼahi ʼonatou kaumeʼa ʼae ʼe gaue ai. Heʼeki faʼa fualoa, neʼe ʼi ai te tagata neʼe loto ʼaupito ke ina fai te folau ʼaia.

Ko Marcellus, ko te Fakamoʼoni ʼa Sehova ʼe maʼuli ʼi Anchorage, ʼi Alaska, pea ʼe mole loko palalau, koteʼuhi ʼi te ʼu taʼu ki muʼa atu, neʼe pa tona ʼua ʼi tona ʼuto. ʼE ʼaoga kia ia hona hekaʼaga toho pea mo he tahi ke tokoni age ke ina fai te ʼu gaue ʼo te ʼaho fuli. Logo la te ʼu faigataʼaia ʼaia, kaʼe neʼe loto moʼoni ia ke mamata ki te Petele. Pea heʼeki faʼa fualoa, neʼe ina fakahoko te faʼahi ʼaia.

ʼE ui fenei e Corey, te kaumeʼa ʼo Marcellus, neʼe tokoni kia ia ke ina fakatuʼutuʼu tana folau: “Neʼe mole lotovaivai ʼi he temi. Neʼe tau pauʼi mai ʼi tana fia iloʼi pe kua feafeaʼi te ʼu fakatuʼutuʼu. Neʼe feala pe kia Marcellus ke ina ui ‘ʼEi’ peʼe ‘Kailoa.’ Koia moka neʼe pauʼi mai, neʼe tonu ke au fai age ki ai he ʼu fehuʼi.” Koʼeni he kiʼi faʼifaʼitaki ʼo tanā felogoi:

Neʼe tali e Corey ki te telefoni, ʼo ina ui fenei: “ʼE ke loto ke au alu atu?”

Neʼe ui fenei age e Marcellus: “Kailoa.”

“ʼE ke loto ke au pauʼi he toketa?”

“Kailoa.”

“ʼE ke fia iloʼi pe kua feafeaʼi te teuteu ʼo tau folau ki te Petele?”

“ʼEi.”

Pea ʼe ui fenei e Corey: “Neʼe au fakamahino age leva te ʼu meʼa ʼae neʼe au fai ʼo ʼuhiga mo te folau. Neʼe au fiafia ʼaupito ʼi taku sio ʼae ki tana fia fakahoko moʼoni tana folau.”

Neʼe felaveʼi ia Marcellus mo te ʼu faigataʼaia ke feala hana fai tona folau ʼaia. Neʼe mole lahi tana totogi. Koia, neʼe ina tanaki lolotoga taʼu ʼe lua tana falā ke feala hana totogi tana folau ki New York, ʼae neʼe vaha mamaʼo ia kilometa e 5 400. Neʼe tonu ke ina maʼu he tahi ke nā folau fakatahi, pea ʼe ko he tahi ʼe feala ke tokoni age ki ai ʼuhi ko te ʼu meʼa ʼae ʼe mole kei ina lava fai tokotahi. Pea neʼe tonu foki ke fakagafua age e te toketa ke ina fai te folau ʼaia. Neʼe ina maʼu te fakagafua ʼaia ʼi he ʼu kiʼi ʼaho pe ʼi muʼa ʼo te ʼaho ʼae neʼe tonu ke alu ai tona vakalele.

ʼI te tau atu ʼa Marcellus ki New York, neʼe mamata ki te ʼu fale ʼi Brooklyn, mo Patterson pea mo Wallkill. Neʼe sio ki te ʼu foʼi masini ta tohi lalahi ʼae ʼe ta ai te ʼu tohi pea mo te ʼu Tohi-Tapu. Neʼe lahi te ʼu meʼa neʼe ina iloʼi ʼo ʼuhiga mo te fakatuʼutuʼu ʼo tatatou gaue. Neʼe toe sio ki te ʼu meʼa neʼe fakahaha ki te hahaʼi mamata, neʼe higoa ko “Te Tohi-Tapu Pea Mo Te Huafa ʼo Te ʼAtua” pea mo “He Hahaʼi ʼe Natou Toʼo Te Huafa ʼo Sehova.” Pea kua lahi mo ʼona kaumeʼa foʼou ʼi ai. Neʼe ko he folau ʼe mole ina galoʼi anai!

Tokolahi ʼe natou ui ʼe mole feʼauga he ʼu kupu moʼo fakaha pe neʼe feafeaʼi kia natou tonatou folau ki te Petele. Kaʼe ʼi te fakalavelave age ʼae kia Marcellus pe neʼe fiafia ʼi tana faiga ʼae ke folau ʼo mamata ki te Petele, neʼe ina tali fenei: “ʼEi. ʼEi. ʼEi!”

ʼE feala ke fakalotomalohiʼi koutou pea mo tokotou kiʼi famili mo kapau ʼe kotou olo ʼo mamata ki te Petele, ohage ko Marcellus. ʼE fakatalitali fakafiafia te hahaʼi ʼae ʼe ʼomai ʼo mamata ki ʼomatou filiale ʼi te malamanei katoa. ʼE feala mo koe ke ke haʼu ʼo mamata ki tamatou Petele.