“ʼE au loto ke ke alu ki te fale puke musika ko Colombia, ʼi te kolo ko New York, pea ke ke hiva ai he tahi ʼi ʼatatou katiko. ʼE natou puke anai. ʼAua naʼa ke fakaha age ki he tahi.”

ʼI te fakaʼosi ʼo te taʼu 1913, neʼe fakahoko e William Mockridge te meʼa ʼaia neʼe kole age e Charles Taze Russell. a Ko te hiva ʼaia, ʼae neʼe iloʼi e ʼihi ʼaki tona kupu tafitō “The Sweet By-and-By,” neʼe puke leva ʼi te pa fakatagi. Ki muli age, neʼe iloʼi e William neʼe fakatatagi te hiva ʼaia ʼi te kamataʼaga ʼo te ʼata “Le Photo Drame de la Création,” neʼe ko he ʼata pea mo he ʼu paki neʼe pena neʼe fakaha fakatahi mo te ʼu akonaki Fakatohi-tapu pea mo te musika neʼe fakatatagi. Neʼe ʼuluaki fakaha te “Photo-Drame” ʼi Sanualio 1914, ʼi New York.

Neʼe kau te hiva ʼae neʼe puke e William ʼi te ʼu hiva ʼe 50 tupu ʼae neʼe fakatatagi e natou ʼae neʼe natou fakahaʼele te ʼu meʼa fakatagi ʼi te ʼu temi ʼae neʼe fakaha ai te “Photo-Drame” ʼi te fakapilitania. Neʼe lahi te ʼu musika neʼe mole puke totonu e te kau Ako ʼo Te Tohi-Tapu. Kaʼe ko ʼihi musika neʼe kole e te kau Ako ʼo Te Tohi-Tapu ke puke, ohage ko te hiva ʼae neʼe hiva e William, pea neʼe toʼo te ʼu palalau mai tanatou tohi katiko, Hymnes de l’Aurore du Milléniium.

Lolotoga ni taʼu, neʼe hiva e te kau Fakamoʼoni he ʼu katiko neʼe mole ko natou ʼae neʼe natou tohi. Koia, ka neʼe ʼaoga, pea neʼe natou fetogi te ʼu palalau ke alu tahi mo tanatou mahino ʼo te Tohi-Tapu.

Ohage la, ko te tahi hiva neʼe fakatatagi ʼi te “Photo-Drame,” neʼe ko tona kupu tafitō “Our King Is Marching On” (ʼE Lolotoga Haʼele Nei Totatou Hau). Neʼe toʼo mai te hiva “Battle Hymn of the Republic” (Te Hiva ʼo Te Tau ʼo Te Lepupilike). Neʼe kamata fenei te hiva ʼaia: “Neʼe sio ʼoku mata ki te haʼu ʼa te ʼAliki ʼi te kololia.” Kaʼe, neʼe fetogi e te Kau Ako Tohi-Tapu, ʼo natou tohi fenei: “ʼE feala ke sio ʼoku mata ki te ʼi heni ʼa te ʼAliki ʼi te kololia.” Neʼe ha ai tanatou tui ʼae ko te ʼafio ʼo Sesu Kilisito ʼe mole fakaʼuhiga pe ki tana haʼu kaʼe ki tana ʼi heni, lolotoga he temi.—Mateo 24:3.

ʼI te taʼu 1966, neʼe ta ʼi te fakapilitania te tohi “Chantant et vous accompagnant de musique dans votre cœur.” Neʼe toʼo ʼi te tohi ʼaia te ʼu hiva fuli ʼae neʼe mole tohi e te kau Fakamoʼoni pe ʼe ko ʼae neʼe toʼo mai te tahi ʼu lotu. ʼI te taʼu ʼaia, neʼe fakatahiʼi e te kau Fakamoʼoni he kau faimaholo pea neʼe natou puke te ʼu katiko e 119 takitahi ʼo te tohi ʼaia. Neʼe fakaʼaogaʼi e te ʼu kokelekasio te musika ʼaia neʼe puke ke natou hiva ʼi ʼonatou fono, pea neʼe leleiʼia ʼihi ʼi te fakalogo ki ai ʼi ʼonatou ʼapi.

ʼI te taʼu 2009, neʼe ta e te kau Fakamoʼoni ʼa Sehova te tohi katiko foʼou, Chantons à Jéhovah. Neʼe puke te hiva ʼo te ʼu katiko ʼaia ia lea e hogofulu tupu. ʼI te taʼu 2013, neʼe fai e te kau Fakamoʼoni tanatou ʼuluaki ʼata maʼa te fanau, pea ʼe natou hiva ai. Ko te kupu tafitō ʼo te tahi ʼata ʼe ko “ʼI He Temi Pe ʼe Au Faikole.” ʼI te mahina fuli, ʼe tuʼa lauʼi miliona te toʼo mai te Neti te ʼu hiva e natou ʼae ʼe olo ki totatou tuʼasila jw.org.

Tokolahi neʼe natou fakamalo ʼo ʼuhiga mo te ʼu musika ʼaia. Ko te fafine ʼe higoa ko Julie neʼe ina tohi fenei ʼo ʼuhiga mo te tohi Chantons à Jéhovah: “ʼE matalelei ʼosi te ʼu katiko foʼou! Ka au tokotahi, ʼe au fakalogo te ʼu katiko ʼae ʼe talanoa ai ki te ʼu meʼa ʼae ʼi toku loto. ʼE au logoʼi ai ʼe malohi age ʼaku felogoi mo Sehova, pea ʼe au loto moʼoni ke au foaki kia te ia ia meʼa fuli.”

Neʼe tohi fenei e te faʼe ʼe higoa ko Heather ʼo ʼuhiga mo te malave ʼo te ʼata viteo “ʼI He Temi Pe ʼe Au Faikole” ki ʼana fanau, ʼe taʼu fitu pea mo taʼu hiva: “Neʼe tokoni kia naua ke mole nā faikole pe ʼi te ala ake pe ʼe ka nā fakatahi mo maua, kaʼe ke nā faikole ʼi he temi pe ohage ʼe nā faipalalau mo Sehova.”