Kapau ʼe ke lomiʼi te lisi ʼo te ʼu lea ʼi totatou tuʼasila jw.org ʼe ke tokagaʼi anai kua fakaliliu ia lea ʼe 300 tupu. Neʼe heʼeki hoko he meʼa feia ʼi te Neti.

ʼE feafeaʼi ʼo ʼuhiga mo te tahi ʼu tuʼasila ʼi te Neti? Ohage la, ʼi Sulio 2013, neʼe feala ke maʼu te tuʼasila ʼo te ʼu Puleʼaga Fakatahi ia lea ʼe ono. Ko te tahi tuʼasila, te Europa, ʼo te Fakatahi ʼo Eulopa, kua maʼu ia lea ʼe 24. Ko te tuʼasila ʼo Google kua maʼu ia lea ʼe 71, pea mo Wikipedia ia lea ʼe 287.

ʼE lahi te ʼu hola ʼe fakaʼaogaʼi moʼo fakaliliu he tuʼasila ia lea ʼe 300 tupu! ʼE lahi te gaue ʼe fai e te ʼu lauʼi teau kau Fakamoʼoni ʼa Sehova ʼi te malamanei katoa, he ʼe natou fia fakavikiviki kia Sehova. ʼI te ʼu lea fuli, ʼe fai fakakutuga tanatou gaue faifakaliliu, ʼo natou fakaʼaogaʼi tonatou poto ke natou fakaliliu mai te Fakapilitania.

ʼI te tuʼasila JW.ORG ʼe lahi te ʼu manatu kua fakaliliu kia lea e 300 tupu, koia ʼe lahi ʼaupito te ʼu pasina ʼi te Neti. ʼE ko pasina ʼe 200 000!

ʼE mole gata pe ki te kua lahi ʼo te ʼu lea ʼe kua fakaliliu ki ai te JW.ORG, kaʼe ʼe toe lahi foki mo te iloʼi ʼa te hahaʼi totatou tuʼasila. ʼE ha te faʼahi ʼaia ʼi te fakafuafua neʼe fai e te fale gaue ʼe higoa ko Alexa, ʼe vakavakaʼi ai te ʼu meʼa ʼae ʼe hoko ʼi te Neti. ʼI te faʼahi ʼo “te Lotu pea mo te Maʼuli Fakalaumalie” ʼe maʼu ai te lisi ʼo te ʼu tuʼasila ʼe 87 000, ʼe kau ki ai te ʼu tuʼasila ʼo te ʼu lotu lalahi ʼi te malamanei, ʼo feia mo te ʼu kautahi ʼae ʼe natou ta te ʼu tohi lotu. ʼI Sulio 2013, neʼe tuʼulaga lua totatou tuʼasila JW.ORG ʼi te lisi ʼaia. Ko ia ʼae neʼe ʼuluaki tuʼu ʼi te lisi ʼaia, neʼe ko te tuʼasila ʼe fakaha ai te ʼu fakaliliu kehekehe ʼo te Tohi-Tapu.

ʼI Oketopeli 2013, neʼe fakafuafua ko hahaʼi ʼe teitei 890 000 neʼe natou vakaʼi totatou tuʼasila JW.ORG ʼi te taʼu fuli. ʼE hoko atu pe anai tamatou faiga ʼae ke maʼu noa e te hahaʼi fuli te ʼu manatu maʼuhiga ʼae ʼe tuʼu ʼi te Tohi-Tapu.