ʼI te malamanei, ʼe lau e te hahaʼi te ʼu tohi ʼa te kau Fakamoʼoni ʼa Sehova. Ko te ʼu lauʼi miliona hahaʼi ʼe natou lau ʼi te olotinatea, ohage pe ʼo tau fai ʼe koe ʼi te temi nei. Kaʼe ʼe lagi ke punamaʼuli anai ʼi tau iloʼi te lahi ʼo te ʼu tohi ʼae ʼe matou ta. Talu mai te taʼu 2013, kua matou ta te ʼu tohi Fakatohi-tapu ia teitei lea ʼe 700 pea mo tufa te ʼu tohi ʼaia ia fenua ʼe 239.

ʼI muʼa ʼo te taʼu 1920, neʼe ko te ʼu fale ta tohi ʼi tuʼa ʼo tamatou kautahi ʼae neʼe natou ta ʼamatou tohi. Pea ʼo kamata leva ʼi te taʼu ʼaia, neʼe matou kamata ta ʼihi ʼo ʼamatou nusipepa pea mo kaupepa lalahi ʼi te kiʼi fale neʼe matou lue ʼi Brooklyn, New York. Neʼe ko te kiʼi kamata veliveli ʼaia, kaʼe ʼi te temi nei, kua matou maʼu ʼamatou fale ta tohi ʼe 15, ʼe tuʼu ʼi Afelika, mo Amelika Noleto, mo Amelika Saute, mo Asia, mo Eulopa pea mo Ositalalia.

ʼE mahino ia, ko te tohi ʼae ʼe maʼuhiga tafitō kia matou ʼe ko te Tohi-Tapu. ʼI te taʼu 1942, neʼe ta ko te ʼuluaki Tohi-Tapu katoa ʼi ʼamatou masini ta tohi, neʼe ko te Tohi-Tapu Fakapilitania te King James. Talu mai te taʼu 1961, neʼe fakaliliu e te kau Fakamoʼoni ʼa Sehova pea mo natou ta te Tohi-Tapu katoa Les Saintes Ecritures. Traduction du monde nouveau. ʼI te taʼu 2013, neʼe matou ta te ʼu Tohi-Tapu ʼe 184 miliona ia lea ʼe 121.

Kaʼe ʼe mole gata ai pe. Ko te ʼu Tohi-Tapu ʼae ʼe matou faʼu ʼe tologa. Ko te ʼu pepa ʼae neʼe fakaʼaogaʼi ki ai ʼe mole maʼu ai te meʼa ʼe higoa ko te acide, ʼo mole feala ai ke legalega te ʼu pasina, pea neʼe fakapipiki malohi te ʼu pasina. ʼE tou maʼu ai he Tohi-Tapu ʼe tologa anai logo la te fakalaka ʼo te temi.

ʼE matou toe ta te ʼu tohi moʼo tokoni ki te hahaʼi ke natou mahino ki te Tohi-Tapu. Koʼeni ʼihi ʼi te ʼu tohi ʼaia talu mai te taʼu 2013:

• Te Tule Leʼo, ko tomatou nusipepa tafitō ʼaia, ʼe ta ia lea ʼe 210 pea ʼe ko te nusipepa ʼae ʼe lahi tokotahi tona tufa ʼi te malamanei katoa. ʼE ko nusipepa ʼe teitei 45 000 000 ʼae ʼe ta.

• Te Réveillez-vous! ʼae ʼe tufa tahi mo Te Tule Leʼo, pea ʼe tuʼulaga lua ʼi te ʼu nusipepa ʼae ʼe tufa ʼi te malamanei. ʼE ta ia lea ʼe 99. Ko nusipepa ʼe teitei 44 000 000 ʼae ʼe ta.

• Te tohi Kotea ʼAe ʼe Akoʼi Moʼoni Mai ʼi Te Tohi-Tapu? ʼe pasina 224, pea neʼe fai tafitō moʼo tokoni ki te hahaʼi ke natou mahino ki te ʼu akonaki maʼuhiga ʼae ʼe tuʼu ʼi te Tohi-Tapu. Talu mai te taʼu 2005, ko tohi ʼe teitei 214 miliona kua ta ia lea ʼe 240.

• Te kaupepa lahi Fakalogo Ki Te ʼAtua, ʼe pasina 32, pea neʼe fai moʼo tokoni kia natou ʼae ʼe mole faʼa lautohi lelei. ʼE fakaha ai te ʼu moʼoni ʼae ʼe tuʼu ʼi te Tohi-Tapu, mo te ʼu paki matalelei pea mo te ʼu kiʼi fakamatalatala nounou. Ko kaupepa lalahi ʼe 42 miliona tupu kua ta ia lea ʼe 400.

ʼO hilifaki ki te ʼu tohi ʼaia, ʼe ta e te kau Fakamoʼoni ʼa Sehova te tahi ʼu tohi, mo te ʼu kaupepa lalahi pea mo te ʼu kiʼi pepa lotu kehekehe moʼo tokoni ki te kau ako ʼo te Tohi-Tapu ke feala hanatou fai he ʼu fekumi ʼo ʼuhiga mo te ʼu fehuʼi ʼe natou fai, ke natou lava ʼutakiʼi ʼanatou fihifihia pea ke fiafia ʼonatou famili. ʼI te taʼu 2012, neʼe ta e te ʼu masini ta tohi ʼa te kau Fakamoʼoni ʼa Sehova te ʼu nusipepa ʼe 1 miliale 300 miliona pea mo te ʼu tohi mo te ʼu Tohi-Tapu ʼe 80 miliona.

ʼI te agamahani, ko natou ʼae ʼe ʼomai ʼo mamate ki ʼamatou fale ta tohi ʼe natou punamaʼuli ki te faʼa gaue ʼa te hahaʼi moʼo ta te ʼu tohi ʼaia. Ko te ʼu tagata mo te ʼu fafine fuli ʼaia ʼe natou foaki tonatou temi pea mo tanatou malohi. Ka natou ʼomai ki te Petele, ko tona fakaʼuhiga “Loto fale ʼa te ʼAtua,” tokolahi ia natou ʼaia ʼe mole natou iloʼi te gaue ʼaia. Kaʼe, ʼaki te akoako ʼe fai kia natou ʼo feia mo tanatou gaue ʼi te ʼu masini ʼaia, ʼe maʼu ai ʼona fua lelei. Ohage la, ʼe tou sio ki te hahaʼi tupulaga taʼu 20, ʼe natou gaue ʼi te ʼu foʼi masini ta tohi lalahi, ʼe ta ai te ʼu nusipepa ʼae ʼe pasina 16 ʼe 200 000 ʼi te hola.

ʼI te malamanei, ʼe feala ke fai te gaue ʼa te kau Fakamoʼoni ʼa Sehova ʼaki te ʼu meʼa ʼofa. ʼI te nusipepa La Tour de Garde de Sion (ʼae kua higoa ʼi te temi nei ko Te Tule Leʼo) ʼo ʼAukusito 1879, neʼe ui fenei ai: “ʼE matou tui ʼe lagolago ia Sehova ki te nusipepa ‘La Tour de Garde de Sion,’ pea ʼe mole ʼaoga anai ʼi he ʼaho ke tou kolekole ki he tagata tana tokoni.” ʼE heʼeki fetogi tamatou manatu.

He koʼe ʼe matou fakaʼaogaʼi he toe temi lahi, mo he toe paʼaga lahi pea mo ni faiga lahi moʼo fai te gaue ʼaia? Koteʼuhi, peʼe kotou kau ia natou ʼae ʼe natou lau te ʼu Tohi-Tapu pea mo tohi ʼe lauʼi miliona ʼae ʼe ta ʼi ʼamatou masini peʼe kotou lau ʼi te Neti, ʼe matou fakaʼamu ʼe tokoni atu anai ke kotou fakaovi ki te ʼAtua.