ʼE Fakaʼaogaʼi Te Kaupepa Lahi ʼAia Moʼo Akoʼi Te Hahaʼi ʼAki He ʼu Paki
ʼE maʼuli te fafine ko Odva ʼi te fenua ko Mongolie. ʼE mole ina iloʼi lelei pe ʼe ko tona taʼu fia ʼaeni, kaʼe ʼi tana manatu, neʼe tupu ʼi te taʼu 1921. ʼI tana kei veliveli, neʼe tokaga ki te faga manu ʼo ʼana matuʼā, pea neʼe taʼu katoa pe tana ako. ʼE mole poto ʼi te lautohi. Kaʼe heʼeki faʼa fualoa, neʼe tokoni age te kaupepa lahi ke ina iloʼi ia te ʼAtua pea mo te ka haʼu fakafiafia ka maʼu e natou ʼae ʼe fagono kia te ia. Neʼe malave ki tona loto tana iloʼi ia te faʼahi ʼaia.
ʼI te taʼu 2011, neʼe ta e te kau Fakamoʼoni ʼa Sehova te kaupepa lahi ʼaia. Pea ko faʼahiga kaupepa lahi ʼe lua. ʼE maʼu ʼi te ʼu faʼahiga kaupepa lalahi ʼaia he ʼu paki matalelei kaʼe ʼe kehekehe leva te tahi kaupepa lahi, he ʼe mole lahi te ʼu meʼa ʼae ʼe tohi ai.
Ko te kaupepa ʼae ʼe lahi te ʼu meʼa ʼe tohi ʼi loto, ko tona kupu tafitō Tou Fakalogo Ki Te ʼAtua Pea Mo Tou Maʼuʼuli ʼo Heʼegata, kua tou vave maʼu pe anai ia lea ʼe 583. Pea ko te lua kaupepa leva, Tou Fakalogo Ki Te ʼAtua, ʼe kua tou maʼu ia lea ʼe 483. Kotou fakatatau te faʼahi ʼaia mo te Déclaration universelle des droits de l’homme, ʼae ʼi Oketopeli 2013 neʼe kua fakaliliu ia lea ʼe 413. Pea ko te ʼu kaupepa lalahi feia kua teitei 80 miliona kua ta.
ʼI Pelesile, neʼe tali fakafiafia e te finematuʼa te kaupepa lahi Tou Fakalogo Ki Te ʼAtua pea neʼe ina ui fenei: “ʼE fakalotofiafia te iloʼi ʼae ʼe ʼi ai ni hahaʼi ʼe natou manatuʼi natou ʼae ʼe hage ko au. Neʼe mole au toʼo ʼakotou nusipepa he ʼe mole au poto ʼi te lautohi. Kaʼe ʼe au fia fai moʼoni te kaupepa lahi ʼaia.”
ʼI Falani, neʼe ui fenei e te fafine ko Brigitte ʼe mole poto ʼi te lautohi mo te faitohi: “ʼI te ʼaho fuli pe ʼe au sioʼi te ʼu paki ʼo te kaupepa lahi ʼaia.”
ʼI Afelika Saute, ʼe tohi fenei e te tehina Fakamoʼoni ʼa Sehova: “Neʼe mole au maʼu he tahi age kaupepa lahi ʼe lelei moʼo palalau ki te hahaʼi Siaina ʼo ʼuhiga mo te moʼoni ʼi te Tohi-Tapu. Neʼe au faipalalau mo te ʼu hahaʼi kehekehe: te ʼu hahaʼi maʼu pepa ʼi te ʼu fale ako lalahi, mo te ʼu hahaʼi popoto, ʼo feia mo te ʼu hahaʼi ʼe mole faʼa popoto ʼi te lautohi. Neʼe tokoni mai te kaupepa lahi Tou Fakalogo Ki Te ʼAtua Pea Mo Tou Maʼuʼuli ʼo Heʼegata ke au foimo fakaha ki te hahaʼi te ʼu akonaki tafitō ʼae ʼe tuʼu ʼi te Tohi-Tapu. ʼI te vaeluaʼi hola pe, kua au fakaha age kia natou te ʼu manatu tafitō.”
ʼI Siamani, ʼe fai e te ʼu Fakamoʼoni ʼe tokolua te ako ʼa te taumatuʼa neʼe ako ʼi te ʼu fale ako lalahi. Neʼe punamaʼuli ʼaupito te tagata ʼuhi ko te kaupepa lahi ʼaia, pea neʼe ina ui fenei: “He ko ʼe neʼe mole kolua foaki mai te kaupepa ʼaeni ʼi muʼa atu? ʼE tokoni mai ke au mahino gafua ki te ʼu aluʼaga neʼe hoko ʼe tuʼu ʼi te Tohi-Tapu, ʼo feia mo te ʼu folafola ʼae ʼi loto.”
ʼI ʼOsitalalia, neʼe ui fenei e te fafine tuli: “Lolotoga ni taʼu, neʼe au maʼuli mo te ʼu taupoʼou ʼi te fale taupoʼou. ʼE mahino ia, neʼe au ovi ʼaupito ki te kau takitaki lotu. Kaʼe neʼe mole he tahi neʼe ina fakamahino mai pe ʼe kotea te Puleʼaga ʼo te ʼAtua. Neʼe tokoni mai te ʼu paki ʼo te kaupepa lahi ʼaia ke au mahino lelei ki te vaega ʼo Mateo 6:10.”
ʼE tohi fenei e te Filiale ʼa te kau Fakamoʼoni ʼa Sehova ʼi Kanata: “Hili te sio ʼa te hahaʼi mai te fenua ko Sierra Leone ki te kaupepa lahi Tou Fakalogo Ki Te ʼAtua ʼi te lea Krio, tokolahi neʼe natou vikiʼi te kau Fakamoʼoni ʼa Sehova ʼuhi ko tanatou gaue kinakina moʼo vaevae te logo ʼo te Tohi-Tapu. Neʼe ui fenei e ʼihi: ‘ʼE mole kotou hage ko ʼihi age, he ʼe kotou tokagaʼi moʼoni te hahaʼi.’”