Ko te tohi ʼae ʼe maʼuhiga ʼaupito maʼa te kau Fakamoʼoni ʼa Sehova, ʼe ko te Tohi-Tapu. ʼE natou ako tuʼumaʼu ia te Tohi-Tapu pea mo natou fakaʼaogaʼi moʼo fakaha ki te hahaʼi te logo lelei ʼo te Puleʼaga ʼo te ʼAtua. (Mateo 24:14) ʼI tanatou fakaʼaogaʼi lahi feia ʼanatou Tohi-Tapu, ʼe maumau vave ai. Koia, neʼe tokaga tafitō te kau Fakamoʼoni ke natou faʼu te Tohi-Tapu Les Saintes Ecritures. Traduction du monde nouveau 2013 ʼae neʼe toe vakaʼi, ke matalelei pea mo tologa.

Neʼe tonu ke faʼu ke malohi te Tohi-Tapu foʼou ʼaia. Ko te kau fakafofoga ʼo te fale ta tohi ʼa te kau Fakamoʼoni ʼae ʼi Wallkill, ʼi Amelika neʼe natou felogoʼi mo te pelesita ʼo te fale ʼe fakapipiki ai te ʼu tohi. Neʼe natou fakaha age te faʼahiga Tohi-Tapu ʼae ʼe natou loto ki ai. Kaʼe neʼe ui fenei age e te pelesita: “ʼE mole feala ke faʼu ia te Tohi-Tapu ʼae ʼe kotou loto ki ai.” Pea neʼe ina toe ui fenei: “ʼE fakaʼofaʼofa kaʼe ʼe lahi te ʼu Tohi-Tapu ʼe fakaʼaogaʼi pe ia moʼo fakamataleleiʼi te laupapa pe ʼe ko te puha, pea neʼe mole faʼu ia ke tologa.”

Ko te ʼu Tohi-Tapu Traduction du monde nouveau ʼo te temi muʼa neʼe mole malohi tonatou faʼu. ʼI ʼihi temi, moka neʼe kovi ʼosi te vevela, pea neʼe to kehekehe ʼihi pasina. Neʼe faiga malohi ʼe natou ʼae neʼe gaue ʼi te ʼu masini ta tohi, ke natou faʼu he Tohi-Tapu ʼe feala ke fakaʼaogaʼi tuʼumaʼu pea ʼi te ʼu aluʼaga kehekehe. Koia, neʼe natou vakavakaʼi ai te takafi, mo te ʼu meʼa pulusi pea mo te faʼahiga fai moʼo fakapipiki ʼo te ʼu pasina. ʼI tanatou ʼosi vakavakaʼi ʼaia, neʼe natou faʼu leva he ʼu Tohi-Tapu kehekehe, ke ʼahiʼahiʼi e te kau Fakamoʼoni ʼi te ʼu fenua ʼae ʼe kovi ʼosi ai te vela pea mo ʼae ʼe kovi ʼosi ai te momoko.

Pea hili mahina ʼe ono, neʼe fakaliliu age te ʼu Tohi-Tapu ke vakavakaʼi. Neʼe fai e te kau gaue ʼi te ʼu masini ta tohi he tahi ʼu fetogi pea natou toe momoli ki te kau Fakamoʼoni te tahi age ʼu Tohi-Tapu. Neʼe ko Tohi-Tapu ʼe 1 697 neʼe faʼu ke ʼahiʼahiʼi. Neʼe hoko he ʼu aluʼaga ki ʼihi Tohi-Tapu. Ohage la, neʼe tuku hala te tahi Tohi-Tapu ʼi he faʼahi, ʼo ʼuaina ai ʼi te po katoa. Pea ko te tahi Tohi-Tapu neʼe to ʼosi ia ki te vai ʼi te hoko ʼae ʼo te puvai lolotoga te afā. ʼAki te ʼu meʼa ʼaia, neʼe feala ai ke iloʼi te malohi ʼo te tohi ʼaia.

ʼI te taʼu 2011, ʼi te lolotoga ʼahiʼahiʼi ia te malohi ʼo te takafi mo te ʼu Tohi-Tapu, neʼe totogi e te kau Fakamoʼoni he ʼu masini foʼou moʼo fakapipiki te ʼu pasina ki te ʼu fale ta tohi ʼi Wallkill, Amelika pea ʼi Elbina, Saponia. Neʼe ko tanatou fakatuʼutuʼu ke feʼauga te ʼu Tohi-Tapu ʼae ka ta pea ke ta mo te ʼu Tohi-Tapu ʼe tatau ʼosi ʼi te ʼu fale ta tohi ʼaia ʼe lua.

ʼI te kamata ʼo te taʼu 2012, neʼe ta e te ʼu fale ta tohi ʼaia ʼe lua te ʼu Tohi-Tapu Traduction du monde nouveau lanu ʼuli pea mo kula fakapoʼuli. Neʼe natou fakaʼaogaʼi ki te takafi ia te meʼa foʼou ʼe fai ʼaki te polyuréthane. Kaʼe neʼe fakaʼaogaʼi e te ʼu masini foʼou ʼaia te meʼa pulusi pea mo te moʼi pepa ki te takafi neʼe heʼeki ʼahiʼahiʼi ia ʼi muʼa atu. Koia ʼi te fakapipiki ʼo te takafi, neʼe mapelu. Neʼe natou faiga ke natou maʼu he puleʼaki ki ai, kaʼe neʼe mole hona fua. Koia neʼe tonu ke tuku muʼa te ta ʼo te ʼu Tohi-Tapu.

Ko te tagata ʼae neʼe ina faʼu te meʼa ʼae neʼe fakaʼaogaʼi ki te takafi, neʼe ina fakamahino ʼe mapelu te ʼu takafi moka ʼe ko he ʼu tohi ʼe makalulu, pea ʼe faigataʼa te maʼu ʼo hona puleʼaki. Kaʼe neʼe mole loto e te kau Fakamoʼoni ki he Tohi-Tapu ʼe fefeka tona takafi. Koia, neʼe natou fakatotonu malohi ke natou faʼu he Tohi-Tapu ʼaki he takafi ʼe makalulu pea mo matalelei. Lolotoga mahina ʼe fa, neʼe natou fai te ʼu ʼahiʼahi kehekehe, ʼo fakatahi te meʼa pulusi pea mo te pepa. Neʼe natou maʼu leva te puleʼaki, koia neʼe feala ke toe hoko atu te ta ʼo te ʼu Tohi-Tapu.

ʼI Sepetepeli 2012, neʼe fakatotonu ki te ʼu fale ta tohi ke fakatuʼu tanatou ta te ʼu Tohi-Tapu, ke natou tufa te ʼu tohi ʼae kua ta, pea ke natou fakatalitali ke natou ta te Tohi-Tapu foʼou, te Traduction du monde nouveau ʼae neʼe toe vakaʼi. Neʼe fakatuʼutuʼu ke tufa ʼi te ʼaho 5 ʼo Oketopeli 2013, ʼi te fono ʼae ʼe fai ʼi te taʼu fuli ʼo te Watch Tower Bible and Tract Society of Pennsylvania.

ʼI te Feliaono, ʼaho 9 ʼo ʼAukusito 2013, neʼe maʼu e te ʼu fale ta tohi ia te ʼu meʼa ʼae neʼe tonu ke ta ʼo te Tohi-Tapu foʼou. Neʼe kamata leva te gaue ta tohi ʼi te ʼaho ake. Neʼe natou ta ia te ʼuluaki Tohi-Tapu katoa ʼi te ʼaho 15 ʼo ʼAukusito. ʼI te ʼu vahaʼa ʼe fitu ʼae neʼe hoa ki ai, neʼe gaue te kau ta tohi ʼi Wallkill pea mo Ebina ʼi te ʼaho mo te po, ke ta pea mo momoli te ʼu Tohi-Tapu ʼe 1 600 000, pea ke tahi maʼu tona Tohi-Tapu e natou fuli ʼae neʼe kau ki te polokalama ʼo te fono ʼae ʼe fai ʼi te taʼu.

Logo la ko te Tohi-Tapu foʼou ʼe matalelei pea neʼe faʼu ke tologa, kaʼe ʼe maʼuhiga age ia te logo ʼae ʼe tuʼu ʼi loto, he ʼe ina foaki te maʼuli. Neʼe maʼu e te fafine ʼi Amelika tana Tohi-Tapu foʼou. Pea ʼi te ʼaho ake, neʼe ina tohi fenei: “Kua au mahino lelei age ki te Tohi-Tapu ʼaki te Tohi-Tapu foʼou ʼaeni.”