ʼI te taʼu 2012, neʼe fakaliliu ia Te Tohi ʼo Te ʼu Hisitolia Fakatohi-tapu ʼi te lea ʼae ʼe palalauʼi ʼi te fenua ko Philippines, ia te Pangasinan. ʼE tokoni te tohi ʼaia ki te ʼu tamaliki ʼo te ʼu fale ako ʼi Philippines ʼae ʼe palalau ai te lea ʼaia. Neʼe to tonu te maʼu ʼo te tohi ʼaia mo te fakatotonu mai te ʼu pilo ʼo te puleʼaga ʼae ʼe tokaga ki te ako ʼo te fanau. Neʼe fakatotonu ke akoʼi te ʼu fanau ʼi te ʼu kiʼi kalasi liliki ʼi tonatou lea.

Ko lea ʼe 100 tupu ʼe palalau ʼi Philippines. Pea talu mai fualoa mo te fai ʼo he ʼu talaga moʼo iloʼi pe ko te lea fea ʼae ʼe tonu ke palalauʼi ʼi te ʼu fale ako. ʼI te taʼu 2012, neʼe tohi fenei e te Pilo ʼae ʼe tokaga ki te ako ʼo te fanau: “Ka palalau ʼi te fale ako te lea ʼae ʼe palalau e te ʼu fanau ʼi ʼonatou ʼapi, pea ʼe lelei age mo vave age tanatou ako.” Koia neʼe fakatuʼutuʼu ai te polokalama ke akoʼi te ʼu tamaliki ʼi tonatou lea totonu.

Neʼe kau ia te lea Pangasinan ʼi te ʼu lea ʼae neʼe filifili ke fakaʼaogaʼi ʼi te ʼu fale ako. Kaʼe neʼe ʼi ai te fihifihia. Neʼe ui e te tagata pule ʼo te fale ako, ʼe mole lahi te ʼu tohi ʼae ʼe maʼu ʼi te lea Pangasinan maʼa te ʼu tamaliki. Koia, ʼi te ʼu fakatahi fakatisitilike ʼi Novepeli 2012, neʼe to tonu ai te fakaha ʼae kua maʼu Te Tohi ʼo Te ʼu Hisitolia Fakatohi-tapu ʼi te lea Pangasinan.

Neʼe ta teitei tohi ʼe 10 000 ke tufa ʼi te ʼu fakatahi. Neʼe fiafia ʼaupito te ʼu fanau mo ʼanatou matuʼa ʼi tanatou maʼu he tohi kua fakaliliu ki tonatou lea totonu. Neʼe ui fenei e te taumatuʼa: “ʼE leleiʼia ʼama fanau te tohi ʼaia koteʼuhi ʼe nā mahino lelei ki ai.”

ʼI te hili pe ʼo te fakatahi, ko ʼihi Fakamoʼoni ʼa Sehova neʼe natou ʼave ni tohi Hisitolia Fakatohi-tapu ki te fale ako ʼi te kolo ko Dagupan. Neʼe fiafia lahi te kau faiako ʼo te fale ako ʼaia ʼi tanatou maʼu te tohi ʼaia, koteʼuhi neʼe faigataʼa tanatou maʼu ni tohi ʼi te lea Pangasinan. Neʼe tufa te ʼu tohi ʼe 340 tupu. Neʼe foimo fakaʼaogaʼi e te kau faiako te tohi ʼaia moʼo akoʼi te ʼu tamaliki te lautohi ʼi tonatou lea totonu.

ʼE fiafia te kau Fakamoʼoni ʼa Sehova ʼi te fakaʼaogaʼi ia te tohi ʼaia moʼo akoʼi te ʼu fanau liliki. Neʼe ui fenei e te tahi neʼe kau ki te faifakaliliu ʼo Te Tohi ʼo Te ʼu Hisitolia Fakatohi-tapu: “Kua matou iloʼi talu mai fualoa ia te maʼuhiga ʼae ke maʼu he ʼu tohi ʼi te lea ʼae ʼe palalau e te hahaʼi, ke malave ki ʼonatou loto. Ko te tupuʼaga la ʼaia ʼo te faiga malohi a te kau Fakamoʼoni ʼa Sehova ke natou ta he ʼu Tohi-Tapu pea mo ni tohi Fakatohi-tapu ia lea ʼe lauʼi teau tupu.”