ʼI te taʼu fuli, tokolahi te ʼu tehina mo tuagaʼane kua vaivai ʼi te faʼahi fakalaumalie, ʼe natou kau ki te ʼAho Fakamanatu. Neʼe kua natou kamata tanatou lele ki te maʼuli. Kaʼe neʼe mole kei natou hoko atu he ʼe lahi ʼona tupuʼaga. Ko ʼihi tupuʼaga ʼe talanoa ki ai te kaupepa Toe Liliu Mai Kia Sehova. (Hep 12:⁠1) Kaʼe, ko te ʼu tehina mo tuagaʼane ʼae kua vaivai fakalaumalie pea neʼe fakamaʼa natou ʼaki te taʼataʼa ʼo tona ʼAlo, ʼe natou maʼuhiga kia Sehova. (Gau 20:28; 1Pe 1:​18, 19) ʼE feafeaʼi hatatou tokoni kia natou ke natou toe liliu mai ki te kokelekasio?

ʼE kumi pea mo tokoni ia te kau tagata ʼafeā ʼo te kokelekasio ki te ʼu tehina mo tuagaʼane ʼae kua vaivai fakalaumalie. ʼE natou hage ko he tagata tauhi ovi ʼe ina kumi he ovi neʼe hehe mai te faga ovi. (Luk 15:​4-7) ʼEi, ʼe ha ai te tokaga ʼofa ʼa Sehova. (Sel 23:​3, 4) ʼE mole gata pe ki te kau tagata ʼafeā tanatou olo ʼo fakalotomalohiʼi ia natou ʼaia. Kaʼe ʼe feala kia tatou fuli ke tou fakahoko te faʼahi ʼaia. Ko tatatou faiga ʼae ke tou agalelei pea mo manavaʼofa, ʼe fiafia ai te loto ʼo Sehova pea ʼe feala ke fua manuʼia ʼaupito. (Taa 19:17; Gau 20:35) Koia, ʼe feala hau fakalotomalohiʼi he tahi pea ʼaua naʼa ke fakatuatuai te fakahoko ʼo te faʼahi ʼaia.

VAKAʼI TE ʼATA VITEO FAKALOTOMALOHIʼI IA NATOU ʼAE KUA VAIVAI FAKALAUMALIE PEA FAI TE ʼU FEHUʼI ʼAENI:

• Neʼe kotea te fakatuʼutuʼu neʼe fai e Abbey ʼi tana felaveʼi mo he Fakamoʼoni neʼe mole nā feiloʼiʼaki?

• He koʼe ʼe tonu ke tou fakaovi ki te kau tagata ʼafeā mo kapau ʼe tou fia tokoni ki he tahi kua vaivai ʼi te faʼahi fakalaumalie?

• Neʼe teuteuʼi feafeaʼi e Abbey tana toe liliu tuʼa lua leva ʼo ʼaʼahi ia Laura?

• Neʼe fakaha feafeaʼi e Abbey te faʼa kataki pea mo te ʼofa ʼi tana faiga ʼae ke ina fakalotomalohiʼi ia Laura?

• Kotea te ako ʼe tou taʼofi mai te lea fakata ʼa Sesu ʼe tuʼu ia Luka 15:8-10?

• Kotea te ʼu tapuakina neʼe ina maʼu ʼuhi ko ʼana faiga ʼae ke tokoni kia Laura?