TE MAʼULI FAKAKILISITIANO
ʼE Feafeaʼi Hakotou Teuteu Ki Te ʼAho Fakamanatu?
ʼO kamata atu ʼi te taʼu ʼaeni, kua maʼu leva he temi feʼauga moʼo teuteuʼi ki te ʼAho Fakamanatu ʼo te mate ʼa Kilisito. Moka to te ʼAho Fakamanatu ʼi he ʼaho ʼo te vahaʼa, ʼe mole fai anai he fono ʼi te vahaʼa. ʼO toe feia pe, moka to ʼi te fakaʼosi vahaʼa, ʼe mole toe fai anai he fono ki te akonaki ki te kaugā malie pea mo te Ako ʼo Te Tule Leʼo. ʼE kotou fakaʼaogaʼi lelei koa te temi faigamalie ʼaia ʼi takotou polokalama? Ohage pe ko tana fai ʼi te ʼuluaki sekulo, neʼe fai ni fakatuʼutuʼu ʼaoga ki te toʼotoʼoga makehe ʼaia. (Luk 22:7-13; km 3/15 1) Kae ʼe tonu kia tatou fuli takitokotahi ke tou teuteuʼi ʼotatou loto ki te ʼaho ʼaia. ʼO feafeaʼi?
-
Fakakaukau ki te maʼuhiga ʼae ke tou kau ki ai.—1Ko 11:23-26
-
Faikole pea mo vakaʼi pe ʼe feafeaʼi te malohi ʼo ʼatatou felogoi mo Sehova.—1Ko 11:27-29; 2Ko 13:5
-
Lau mo metitasio ki te ʼu alatike ʼae ʼe fakamahino ai te fakaʼuhiga ʼo te ʼAho Fakamanatu.—Soa 3:16; 15:13
Ko ʼihi ʼe natou lau mo metitasio ki te ʼu koga Tohi-Tapu ki te ʼAho Fakamanatu ʼae ʼe tuʼu ʼi te kiʼi kaupepa Tou Vakaʼi Ia Te Tohi-Tapu ʼi Te ʼAho Fuli. Ko ʼihi ia ʼe natou lau te ʼu vaega Fakatohi-tapu ʼae ʼe tuʼu i te pāki ʼae ʼi lalo ifo. Pea ko ʼihi ʼe natou toe vakaʼi te ʼu alatike ʼo Te Tule Leʼo ʼae ʼe talanoa ai ki te ʼAho Fakamanatu mo te ʼofa ʼo Sehova mo Sesu kia tatou. Tatau aipe pe ko te tohi fea ʼe kotou fakaʼaogaʼi ki takotou ako, ʼofa pe ke fakamalohi ai ʼakotou felogoi mo Sehova pea mo tona ʼAlo.