HE KOʼE ʼE MAʼUHIGA? ʼE tonu ki te kau ako ke natou foaki ʼonatou maʼuli kia Sehova pea mo papitema ke natou maʼu ai te ʼofa ʼo Sehova. (1Pe 3:21) Pea ko natou ʼae ʼe natou fakaalu tahi ʼonatou maʼuli mo tanatou fakapapau ʼae ke natou foaki ʼonatou maʼuli kia Sehova, ʼe natou maʼu anai honatou puipuiʼaga ʼi te faʼahi fakalaumalie. (Pes 91:1, 2) ʼE foaki e he Kilisitiano tona maʼuli kia Sehova, kaʼe mole ki he tagata, peʼe ko he gaue peʼe ko he kautahi. Koia, ʼe ʼaoga ai ki te kau ako ke natou fakatuputupu tonatou ʼofa mo tonatou lotofakafetaʼi ki te ʼAtua.—Lo 14:7, 8.

TE ʼU MEʼA ʼAE ʼE TONU KE KE FAI:

• Lolotoga te ako, faipalalau ki he ʼu manatu ʼe talanoa ai ʼo ʼuhiga mo Sehova. Fakaha age te maʼuhiga ʼo te lau ʼo te Tohi-Tapu ʼi te ʼaho fuli pea mo te faikole “tuʼumaʼu” kia Sehova.—1Te 5:17, MN; Skp 4:8

• Fakalotomalohiʼi tau ako ke ina fai he ʼu fakatuʼutuʼu fakalaumalie, ohage la ko tana foaki tona mauli kia Sehova pea mo papitema. Pea toe tokoni ki ai ke ina fai he tahi ʼu fakatuʼutuʼu, ohage la ko te fai he ʼu tali ʼi te ʼu fono peʼe ko te faifakamafola ki te ʼu vahaʼa fale peʼe ki te ʼu kaugā gaue. Fakamanatuʼi age ko Sehova ʼe mole ina fakamalohiʼi he tahi ke tauhi age kia te ia. Pea ko te foaki ʼo tokita maʼuli kia Sehova, ʼe ko he tonu ʼe tou fai takitokotahi.—Te 30:19, 20

• Fakalotomalohiʼi ia tau ako ke ina fai he ʼu fetogi ʼi tona mauli ke fiafia ai te loto ʼo Sehova pea ke papitema. (Taa 27:11) ʼE lagi ʼaoga anai kia ia ʼae ʼe ako he tokoni ke lotomalohi tuʼumau, ke feala hana liaki tona ʼuluagaaga ʼafeā kaʼe ke ina kofuʼi te ʼuluagaaga foʼou. Koteʼuhi ʼe lagi kei malohi ʼihi agaaga pea mo he ʼu agamahani ia ia. (Ef 4:22-24) Vaevae mo ia te ʼu alatike ʼae ʼi Te Tule Leʼo ko tona kupu tafitō “ ʼE Fetogi Te ʼu Maʼuli ʼUhi Ko Te Tohi-Tapu”

• Fakamatala ki ai te fiafia ʼae ʼe ke maʼu ʼi tau tauhi kia Sehova. —Esa 48:17, 18