ʼI te Tohi-Tapu ko te kupu “akonakiʼi” ʼe fakaʼuhiga tafito ki te akoako ʼo he tahi. Kae ʼe toe fakaʼuhiga foki ki te fakatonutonuʼi peʼe ko te fakatuʼā ʼo he tahi. ʼE akonakiʼi tatou e Sehova ke tou fetogi tatatou aga, ke feala hana tali tatatou tauhi. (Lom 12:1; Hep 12:10, 11) ʼE moʼoni ʼe tou mamahi moka akonakiʼi tatou. Kae kapau ʼe tou tali lelei pea mo fai te meʼa ʼae ʼe totonu, ʼe tou maʼu ai te ʼu fua lelei. (Taa 10:7) Kotea ʼae ʼe tonu ke manatuʼi, e ia ʼae ʼe ina fakahoko te fakatonutonu pea mo ia ʼae ʼe akonakiʼi?

Ia ia ʼae ʼe ina fakahoko te fakatonutonu. Ko te kau tagata ʼafeā ʼae ʼe natou fakatonutonuʼi ia te kokelekasio, kae ko te ʼu matuʼā ʼae ʼe natou fakatonutonuʼi ʼanatou fanau. Kae ʼe tonu ke natou faʼifaʼitakiʼi ia Sehova, ʼo natou fai ʼaki te ʼofa. (Sel 46:28) ʼE tonu ke fakafuafua lelei te fakatonutonu ʼo mulimuli ki te aluʼaga ʼae neʼe hoko. Kae ʼe tonu ke fai tuʼumaʼu ʼi te ʼofa.—Tit 1:13.

Ia ia ʼae ʼe fakatonutonuʼi. Ka akonakiʼi tatou ʼe tonu ke tou tali leleiʼi pea mo foimo fakaʼaogaʼi te ʼu tokoni. (Taa 3:11, 12) ʼE tou agahala fuli, koia ʼe ʼaoga ai ke akonakiʼi ia tatou fuli. Kae ʼe mole tatau te faʼahiga akonakiʼi ʼo tatou takitokotahi. Ohage la, ʼe akonakiʼi tatou moka tou lau ia te Tohi-Tapu, peʼe moka tou fakalogo ki he akonaki ʼi te ʼu fono ʼo te kokelekasio. Kae ʼe ʼi ai ʼihi ʼe ʼaoga ke fai e te kau tagata ʼafeā ia he komite moʼo fakatonutonuʼi natou. Kae kapau ʼe tou tali ia te fakatonutonu, ʼe feala ke haofaki ai ʼotatou maʼuli.—Taa 10:17.

VAKAʼI TE ʼATA VITEO “ ʼE FAKATONUTONUʼI E SEHOVA IA NATOU ʼAE ʼE ʼOFA AI,” PEA MO TALI KI TE ʼU FEHUʼI ʼAENI:

• Neʼe feafeaʼi ia te maʼuli ʼo Canon, pea kotea leva ʼae neʼe fetogi?

• Neʼe akonakiʼi feafeaʼi ia ia e Sehova?

• Kotea te ʼu ako ʼe feala ke tou taʼofi?