Kotea te Tohi-Tapu Audio? Ko te Tohi-Tapu Audio ko te Tohi-Tapu Malama Foʼou neʼe puke tona lau. ʼE maʼu ʼi te ʼu lea kehekehe. Ka kotou fakalogo ki te lautohi ʼe kotou tokagaʼi neʼe fetofetogi te ʼu leʼo ʼo mulimuli ki te ʼu tagata peʼe ko te ʼu fafine ʼae ʼe palalau ʼi te fakamatala Fakatohi-tapu. Neʼe lau ia te ʼu vaega Tohi-Tapu mo faiga ke tou logoʼi te ʼu meʼa ʼae neʼe logoʼi ʼe ia ʼae ʼe palalau ʼi te hisitolia ʼae ʼi te Tohi-Tapu, ke tou mahino katoa ki te manatu.

Kotea te ʼu fua lelei ʼe tou maʼu mai te Tohi-Tapu Audio? Tokolahi ia natou ʼae ʼe natou fakalogo ki te lau ʼo te Tohi-Tapu ʼae neʼe puke, ʼe natou leleiʼia, he ʼe hage kia natou ko te Folafola ʼa te ʼAtua ʼe maʼuli. Ka natou logo ki te fetofetogi ʼo te ʼu leʼo ʼo mulimuli kia natou ʼae ʼe palalau ʼi te hisitolia, ʼe faigafua tanatou fakakaukauʼi te ʼu aluʼaga ʼae neʼe hoko pea mo mahino ki te ʼu meʼa ʼae ʼe tohi ʼi te Tohi-Tapu. (Taa 4:5) Tokolahi ka natou fakalogo te lau ʼo te Tohi-Tapu ʼae neʼe puke, ʼe natou logo fimalie, pea mole kei natou lotohoha.—Pes 94:19.

Ka tou logo ki te lau leʼo lahi ʼo te Folafola ʼa te ʼAtua, ʼe feala ke malave ki ʼotatou loto pea ke fetogi ai ʼotatou maʼuli. (2Kk 34:19-21) Kapau la kua puke ia te lau ʼo te Tohi-Tapu ʼi takotou lea, ʼe feala koa ke kotou fakalogo tuʼumaʼu, ke liliu ko hakotou agamahani fakalaumalie?

SIOʼI TE ʼATA TE FAI ʼO TE TOHI-TAPU AUDIO—KOGAʼI ʼATA, PEA MO TALI KI TE FEHUʼI ʼAENI:

Kotea ʼae ʼe fakapunamaʼuli ʼi te faʼahiga fai ʼo te Tohi-Tapu Audio?