KE KE FAIVA ʼI TE FAIFAKAMAFOLA
Ke Lelei Age Tatatou Faifakamafola —Tohi ʼAu ʼUluaki Palalau ʼo ʼUhiga Mo Te ʼu Nusipepa
HE KOʼE ʼE MAʼUHIGA? Logo la ʼe tou maʼu he ʼu tokoni ʼo te ʼu ʼuluaki palalau ʼae ʼe tuʼu ʼi te kaupepa ako, kaʼe ʼe ko he ʼu faʼifaʼitaki pe ia ʼo te faʼahiga tufa ʼo te ʼu nusipepa. ʼE tonu ke ke fakaʼaogaʼi ʼau palalau ʼa koe totonu. ʼE lagi ke leleiʼia he tahi faʼahiga fai ʼo te tufa ʼo te ʼu nusipepa. Peʼe lagi ke filifili anai he tahi age manatu ʼe fia lau anai e te hahaʼi ʼo tou telituale. Kapau koia, ʼi tau ʼosi lau te ʼu nusipepa, vakaʼi te ʼu ʼuluaki palalau, mo sioʼi te ʼu ʼata viteo ʼo ʼuhiga mo te ʼu faʼifaʼitaki pea mo fakaʼaogaʼi te ʼu manatu ʼae ka hoa mai ke feala hau tohi ʼau ʼuluaki palalau.
TE ʼU MEʼA ʼAE ʼE TONU KE KE FAI:
Fai kia koe te fehuʼi ʼaeni: “ ʼE au fakaʼaogaʼi anai koa te ʼu ʼuluaki palalau ʼo te ʼu nusipepa ʼaia?”
ʼEI
-
Teuteuʼi ʼau ʼuluaki palalau. Hili tau fai te ʼu fakamalō, fakaha te tupuʼaga ʼo tau haʼu. (Ohage la, ʼe feala ke ke ui fenei: “Kua au haʼu ʼi te ʼaho nei koteʼuhi . . .”)
-
Vakaʼi pe ʼe feafeaʼi anai hau fakaalualu te faipalalau ʼaki te fehuʼi, ʼosi ʼaia ko te vaega pea fakamuli ʼaki te tufa. (Ohage la, ka ke fakaʼaogaʼi he vaega Tohi-Tapu, ʼe feala ke ke ui fenei: “Ko te tali ki te fehuʼi ʼaia ʼe ke maʼu anai ʼi heni.”)
KAILOA
-
Filifili he manatu ʼi he nusipepa ʼe ke leleiʼia pea ʼe fia lau anai e te hahaʼi ʼo tou telituale
-
Filifili he fehuʼi ʼe fakaha anai e he tahi tana manatu pea mo kamata ai he faipalalau. Kaʼe mole ko he fehuʼi ʼe ufiufi ai anai. (Ohage la, ko te ʼu fehuʼi ʼae ʼe tuʼu ʼi te pasina 2 ʼo te ʼu nusipepa.)
-
Filifili he vaega ke lau. (Kapau ʼe ke tufa te Réveillez-vous !, ʼe mole fakamaʼua ke ke lau he vaega. Koteʼuhi ko te nusipepa ʼaia ʼe ta maʼa natou ʼae ʼe mole natou maʼu he ʼatamai malama feʼauga ki te Tohi-Tapu pea ʼe mole natou falala ki te lotu.)
-
Tohi he kupusiga palalau ʼe tahi peʼe lua ʼe ke fakamahino ai ki he tahi te ʼu lelei ʼe ina maʼu anai ʼi tana lau te alatike
TE TAHI ʼU PULEʼAKI
-
Teuteuʼi he fehuʼi ke feala hau toe liliu ʼo fai te ʼaʼahi
-
Toʼo he ʼu nota ke feala hau manatuʼi te ʼu meʼa ʼae ʼe ke fia palalau ki ai moka ke toe liliu