TE MAʼULI FAKAKILISITIANO
Te ʼOfa Ki Te ʼAtua Pea Mo ʼOtatou Tatau—ʼO Feafeaʼi?
Logo la ʼe mole mulimuli ia te kau Kilisitiano ki te Lao ʼa Moisese, kae ʼe kei fakamaʼua pe e Sehova ke tou fakalogo ki te ʼu fakatotonu ʼe lua ʼae ʼe lalahi age, te ʼofa ki te ʼAtua mo ʼotatou tatau. (Mat 22:37-39) ʼE mole tou maʼu feia pe te ʼofa ʼaia. Kae ʼe tonu ke tou gaueʼi. ʼO feafeaʼi? ʼI tatatou lau te Tohi-Tapu ʼi te ʼaho fuli. Pea ka tou metitasio ki te ʼu faʼahi kehekehe ʼo te ʼuluagaaga ʼo te ʼAtua ʼae ʼe fakaha ʼi te Tohi-Tapu, ʼe tou sisio ai ki “te taulekaleka ’o Sehova.” (Pes 27:4, MN) Kotea anai ʼona fua? ʼE tuputupu anai totatou ʼofa kia te ia pea ʼe tou maʼu anai tana faʼahiga manatu. Koia, ʼe ʼekenaki ai tatou ke tou mulimuli ki te ʼu fakatotonu ʼa te ʼAtua ʼae ʼe kau ai te ʼofa ʼae ʼe ina uga tatou ke tou fai he ʼu sakilifisio maʼa ʼihi. (Soa 13:34, 35; 1So 5:3) Koʼeni tokoni ʼe tolu ke lahi age ai tou fiafia ʼi tau lau te Tohi-Tapu:
-
Fakakaukauʼi te ʼu hisitolia ʼae ʼe ke lau. Fakakaukauʼi pe kotea ʼae ka ke sio mo logo ki ai mo ka na pau la neʼe ke maʼuli ʼi te temi ʼaia. Kotea te ʼu manatu ʼae neʼe logoʼi e natou ʼo he hisitolia ʼe ke lau?
-
Filioʼi tau faʼahiga fai. Koʼeni he ʼu faʼahiga fai: Lau leʼo lahi peʼe ke fakalogo mo muliʼi ʼi te Tohi-Tapu ia te hisitolia ʼae neʼe puke. Peʼe ke lau he hisitolia ʼo he tahi ʼi te Tohi-Tapu peʼe ko he tahi age aluʼaga ʼi hau lau hoholo te Tohi-Tapu. Ohage la, fakaʼaogaʼi te kiʼi kaupepa Tokoni Ki Te Ako ʼo Te Folafola ʼa Te ʼAtua ʼi te Faʼahi 4 peʼe ko te Faʼahi 16 ʼae ʼe talanoa ai kia Sesu. Lau te kapite katoa ʼae neʼe toʼo mai ai te koga Tohi-Tapu ʼo te ʼaho. Lau te ʼu hisitolia ʼi te Tohi-Tapu ʼo muliʼi te temi ʼae neʼe tohi ai.
-
Faiga ke ke mahino ki te meʼa ʼae ʼe ke lau. ʼE lelei age ke ke lau pe he kapite ʼe tahi ʼi te ʼaho pea ke metitasio ki ai ke ke mahino, ʼi tau lau he ʼu tuʼuga kapite ʼuhi pe ke ke lautohi. Fakakaukauʼi pe neʼe feafeaʼi te aluʼaga ʼae neʼe hoko. Vakavakaʼi te ʼu puani. Fakaʼaogaʼi te ʼu mape pea mo te ʼu fakamahino ʼae ʼe tuʼu ai. Kapau neʼe mole ke mahino lelei ki he manatu, fai he ʼu fekumi. Kapau ʼe feala, ko te temi ʼae neʼe ke toʼo moʼo lau ʼo te Tohi-Tapu ʼe toe ʼaoga foki he temi feia ke ke metitasio ai.