HE KOʼE ʼE MAʼUHIGA: ʼE kau te ʼuluaki tohi ʼa te apositolo ko Paulo ki te kau Kolonito ki ʼana tohi ʼae ʼe 14 neʼe ina fai moʼo fakalotomalohiʼi te kau Kilisitiano. Ka fai e he tahi hana tohi, ʼe ko he faigamalie ʼaia ke ina filifili fakalelei ni kupu. ʼE feala ai kia ia ʼae ʼe ina lau, ke ina fia lau liuliuga. Ko te faitohi ʼe ko he tahi pe ʼaia faʼahiga faifakamafola ki ʼotatou kaiga mo ʼotatou feilo. ʼE ʼaoga mo kapau la ʼe mole feala hatatou palalau fakahagatonu kia natou. Ohage la kapau ʼe fia iloʼi e he tahi ia te moʼoni kae ʼe tahitahiga tona maʼu atu ki tona ʼapi. Peʼe ko he tahi ʼe nofo ʼi he fale fata ʼe mole feala hona ulufi, peʼe ʼi he koga meʼa ʼe mapunuʼi peʼe mamaʼo. Kotea la he ʼu faʼahi ʼe tonu ke tou fakakaukauʼi moka ʼe tou faitohi ki he tahi ʼe mole tou iloʼi?

TE ʼU MEʼA ʼAE ʼE TONU KE KE FAI:

• Tohi te meʼa ʼae ʼe ke lagi ui age mo ka na pau la ʼe kolua faipalalau. ʼI te kamata, fakaha tou higoa mo fakamahino lelei te tupuʼaga ʼo tau faitohi. Lagaʼi he fehuʼi ke ina fakakaukauʼi mo fakaha age totatou tuʼasila ʼi te Neti. Fakamahino te faʼahiga fai ʼo he ako, peʼe ke tohi te ʼu kupu tafito ʼo te ʼu kapite ʼo he tohi ako. Pea ʼe feala ke ke ʼai fakatahi mo tau tohi he kiʼi kate, he pepa fakaafe peʼe ko he kiʼi pepa lotu

• Fakanounou pe ʼau palalau, he ka lahi fau leva pea ʼe mole ina fia lau fuli anai.—Vakaʼi te faʼifaʼitaki ʼo he tohi ʼi te pasina 8

• Vakaʼi muʼa pe ʼe ʼi ai ni hala ʼi tau faitohi peʼe mahino gafua. ʼE tonu ke ha ai ʼe ke fakaʼapaʼapa. Ka ke momoli tau tohi manatuʼi ʼo totogi fuli te ʼu sitapa ke mole ina toe totogi he meʼa