TE MAʼULI FAKAKILISITIANO
Kua Ke Tokalelei Koa Ki Te ʼAho Fakamanatu?
Neʼe maʼuhiga te Pasikate fakaʼosi ʼae ka fai e Sesu. Neʼe kua vave mate pe ia Sesu, koia neʼe ina fakatuʼutuʼu ai ke ina kai te Pasikate mo ʼana apositolo pea ke fai te toʼotoʼoga ʼaia ʼi te taʼu fuli ʼae ko te Taumafa ʼa Te ʼAliki. Koia neʼe ina fekauʼi ai ia Petelo mo Soane ke olo ʼo teuteuʼi te koga fale ʼae ka fai ai. (Luk 22:7-13; vakaʼi te pāki ʼo te takafi.) Pea ʼe fakamanatuʼi mai ai kia tatou ke tou tokalelei ki te ʼAho Fakamanatu ʼae ka fai ʼi te ʼaho 27 ʼo Malesio. ʼE lagi kua fai e te ʼu kokelekasio ni fakatuʼutuʼu ki te ʼaho ʼaia. Ohage la te tehina ʼae ka ina fai te akonaki, mo te pane mo te vino, pea mo ʼihi atu aluʼaga. Kae kotea ʼe feala ke tou fai takitokotahi ke tou tokalelei ai ki te ʼAho Fakamanatu?
Teuteuʼi tou loto. Lau mo metitasio ki te ʼu koga Tohi-Tapu ki te ʼAho Fakamanatu. ʼE feala hau fakaʼaogaʼi te polokalama ʼae ʼe tou maʼu ʼi te tohi Tou Vakaʼi Ia Te Tohi-Tapu ʼi Te ʼAho Fuli. ʼE toe maʼu ʼihi manatu ʼi te kaupepa Tokoni Ki Te Ako ʼo Te Folafola ʼa Te ʼAtua, kapite 16. (Toe vaka’i te Kaupepa Ako Te Maʼuli Fakakilisitiano Mo Te Faifakamafola ʼo Apelili 2020.) Pea ʼi te Index des publications des Témoins de Jéhovah peʼe ko te Kumiʼaga Tohi maʼa te Kau Fakamoʼoni ʼa Sehova, ʼe feala ke maʼu ai e te ʼu famili he ʼu alatike ʼo ʼuhiga mo te maʼuhiga ʼo te totogi. Pea ʼe feala ke natou vakaʼi ʼi tanatou ako fakafamili.
Fakaafe he tokolahi. Ke ke lagolago malohi ki te tufa ʼo te pepa fakaafe. Manatuʼi ia natou ʼae ʼe feala ke ke fakaafe, ohage la ko ʼau ʼaʼahi, mo ʼau ako ʼae neʼe ke fai ki muʼa atu, mo ʼou feilo pea mo ʼou famili. ʼE fakaafe anai e te kau tagata ʼafeā te ʼu tehina mo tuagaʼane ʼae kua natou fakamamaʼo mai te kokelekasio. Manatuʼi kapau ʼe mole nofo he tahi ʼi tou kolo, ʼe feala hau maʼu te hola mo te koga meʼa ʼae ʼe fai ai te ʼAho Fakamanatu ʼae ʼe ovi kio ia ʼaki hau lomiʼi ki ʼoluga ʼo te ʼuluaki pasina jw.org, IA MATOU pea “Fakamanatu.”
Kotea he tahi meʼa ʼe feala ke tou fai ke tou teuteu ai?