Kua lahi te ʼu tuʼutamaki fakanatula ʼe hoko ʼi te ʼu temi ʼaeni. Pea ka hoko he aluʼaga feia, ʼe tonu ke fakatuʼutuʼu lelei te tokoni. Koia neʼe fai e te Kolesi Pule te tonu ke fakatuʼutuʼu e te ʼu filiale fuli he Selevisi Tokoni Moka Hoko He Tuʼutamaki Fakanatula.

Ka iloʼi e te ʼu tehina ʼae neʼe hinoʼi e te filiale neʼe hoko he tuʼutamaki, ʼe natou foimo pauʼi ki te kau tagata ʼafeā ʼo fakalavelave pe kotea te tokoni ʼe ʼaoga ki te ʼu tehina mo tuagaʼane. Kapau ʼe natou tokagaʼi ʼe lahi te ʼu maumau pea ʼe mole feala anai ki te ʼu tehina mo tuagaʼane ke natou puleʼakiʼi, ʼe hinoʼi anai e te filiale he ʼu tehina faiva ke natou takitaki te ʼu gaue ki te tokoni. ʼE feala anai ki te ʼu tehina ʼaia ke natou fakaui he kau gaue pea mo he ʼu koloa peʼe ko he ʼu meʼa gaue. ʼE toe feala foki ke natou totogi te ʼu koga ʼaia mo tufa ki te ʼu tehina mo tuagaʼane.

Ka tou fai feia, ʼe fakatuʼutuʼu lelei ai te ʼu gaue pea mo fakaʼaogaʼi lelei ai te falā mo te ʼu meʼa gaue. ʼE lelei age te faʼahiga fai ʼaia, ʼi te faiga ʼa he ʼu tehina ke natou tahi fai hanatou fakatuʼutuʼu takitokotahi.

ʼE feala ke fakafuafua e te ʼu tehina ʼae neʼe hinoʼi e te filiale, pe ko falā ʼe fia mo kau gaue ʼe fia ʼe ʼaoga anai ki te gaue. ʼE natou faiga anai ke natou fakamamahani mo te kau tagata ʼafeā ke natou tokoni kia natou ke fakahoko lelei te gaue. ʼAua naʼa kotou fai he tae falā, peʼe ke kotou momoli he koloa peʼe ke kotou olo ki te koga meʼa ʼae neʼe ʼi ai te tuʼutamaki, gata pe mo kapau neʼe kole atu ke kotou fai te faʼahi ʼaia.

Kae ʼe moʼoni, ke hoko he tuʼutamaki, ʼe tou fia tokoni. (Hep 13:16) ʼE tou ʼoʼofa ʼi ʼotatou tehina. Kotea ʼe feala ke tou fai? ʼUluaki, ke tou faikole maʼa natou ʼae neʼe to kia natou ia te tuʼutamaki, ʼo feia mo natou ʼae ʼe natou tokoni kia natou. ʼE toe feala foki ke tou foaki he falā ʼi te puha meʼa ʼofa ki te ʼu gaue fakamalamanei. ʼAki te takitaki ʼa te Kolesi Pule, ʼe fakaʼaogaʼi lelei e te ʼu filiale te falā ʼae ʼe ʼaoga ki te ʼu tehina mo tuagaʼane. Kapau ʼe tou fia kau ki te ʼu gaue, ʼe feala ke tou tohi ia te pepa Demande d’admission comme volontaire local développement/construction (DC-50).

SIOʼI TE ʼATA NEʼE HAKE TE VAI ʼI PELESILE, PEA MO TALI KI TE FEHUʼI ʼAENI:

Kotea ʼae neʼe kotou tokagaʼi ʼi te ʼu gaue ʼae neʼe fakahoko e te kau Fakamoʼoni ʼa Sehova hili te hake ʼo te vai ʼi Pelesile ʼi te taʼu 2020?