ʼE tatau te ʼu tohi ʼaeni ʼe lua: Te Akoʼi Mai pea mo Te Ako Mai Te Tohi-Tapu. Ko te ʼu meʼa gaue ʼaia ʼe lua ʼe talanoa ai ki te ʼu moʼoni ʼe tatau, ʼo toe feia pe mo tona fakaalualu. Kaʼe, ʼe fakaʼaogaʼi ʼi te tohi Akoʼi Mai ni kupu ʼe mahino gafua. Ko te tohi ʼaia ʼe heʼeki maʼu ʼi te lea Fakaʼuvea kaʼe hoki maʼu anai ʼi te ʼu mahina ka haʼu. ʼE tokoni mai anai te ʼu manatu ʼo te alatike ʼaeni ki te faʼahiga fakaʼaogaʼi ʼo te tohi foʼou ʼaia. ʼE fakatuʼutuʼu te tohi ʼaia maʼa natou ʼae ʼe faigataʼa tanatou mahino ki te tohi Te Ako Mai Te Tohi-Tapu. ʼI te tohi ʼaia ʼe maʼu ai he tahi ʼu fakamahino ʼi te fakaʼosi ʼo te tohi. ʼE ko he ʼu fakamahino faigafua ʼo ʼihi kupu pea mo ni manatu ʼo te kapite. ʼE mole maʼu ʼi te ʼu kapite te ʼu fehuʼi ʼae ʼe tuʼu ʼi te kamataʼaga. Kaʼe, ʼi te ʼu kapite takitahi ʼe fakaʼosi ʼaki ni manatu fakanounou ʼo te ʼu moʼoni Fakatohi-tapu ʼae neʼe fakamahino ʼi te kapite. Ohage pe ko te tohi Te Ako Mai Te Tohi-Tapu, ʼe feala ke tou tufa te tohi Akoʼi Mai ʼi he temi pe, tatau aipe pe ʼe mole ko te tufa ʼaia ʼo te mahina. Kaʼe, ʼe tou lava fakaʼaogaʼi feafeaʼi te ʼu manatu ʼaia ʼo te tohi Akoʼi Mai moka tou fai he ako Tohi-Tapu?

FAKAMANATU: Ki te tokolahi, ʼe natou leleiʼia tatatou faʼahiga faimahani ʼo he ako. Ohage la, ko te lau te palakalafe ʼi te tohi Te Ako Mai Te Tohi-Tapu pea mo fai tona fehuʼi. Kaʼe, ʼe feafeaʼi age la mo kapau ʼe mole mahino lelei ia ia ʼae ʼe ako ki te lea peʼe mole lautohi lelei. Koia, ʼe feala ke kotou fakaʼaogaʼi te tohi Akoʼi Mai. Pea ʼe feala ke kotou fakaʼaogaʼi te fakamanatu ʼo te ʼu kapite moʼo fai ki ai te ako pea ʼe lotomalohi anai ia ia ʼae ʼe ako ʼi te lau tokotahi ia te kapite. ʼE feala ki te ʼu moʼoni takitahi ʼo te Tohi-Tapu ke kotou faipalalau ki ai lolotoga teitei minuta ʼe 15. Tatau aipe pe ʼe mole fakamahino te ʼu manatu ʼo te ʼu kapite ʼi te ʼu fakamanatu, kaʼe ʼe tonu anai kia ia ʼae ʼe faiako ke ina teuteuʼi lelei, mo manatuʼi tuʼumaʼu te meʼa ʼae ʼe ʼaoga kia ia ʼae ʼe ako. Kapau ʼe ina fai te ako ki he kapite, ʼe feala ke ina fakaʼaogaʼi te ʼu manatu ʼaia ohage ko he fakamanatu.

HE TAHI ʼU FAKAMAHINO: Ko te ʼu manatu ʼae ʼe tuʼu ʼi te fakaʼosi ʼo te tohi, ʼe alu tahi pe mo te ʼu manatu ʼi te ʼu kapite. ʼE feala kia ia ʼae ʼe faiako ke talanoa ki te ʼu manatu ʼaia ʼi te tohi Akoʼi Mai lolotoga te ako.