Fakakaukauʼi age muʼa ʼe ke lolotoga maʼuli nei ʼi Kalilea ʼi te temi ʼo Sesu. Pea ʼe ke faifagona ki Selusalemi ki te ʼAho Lahi ʼo te ʼu Pola. Kua fonu te kolo ʼi te hahaʼi ʼae ʼe ʼomai mai potu mo potu ʼo atolasio. Pea ʼe ke fia momoli hou molaga kia Sehova. ʼE ke kamata fakahaohao atu mo tau tao ʼi te ʼu ala lalahi ʼo te kolo ʼae ʼe kua kaugā malie ai te hahaʼi. Pea ʼi tau tau atu ki te fale lotu, ʼe toe fonu ai te hahaʼi mo ʼonatou molaga. Ko koe leva ʼaeni ʼae ka ke foaki tou molaga ki te ʼu pelepitelo. ʼI te temi tonu pe ʼaia, ʼe ke manatuʼi ai ʼe mamahi tou tehina kia koe. Pea ʼe lagi kau ʼi te hahaʼi kaugā malie peʼe ʼe ʼi te loto kolo. ʼE fakamahino mai e Sesu pe kotea ʼae ʼe tonu ke ke fai. (Lau ia Mateo 5:24.) ʼE feafeaʼi anai te kumi ʼo te tokalelei ʼohage ko tona fakatotonu mai e Sesu, ʼi tou vahaʼa pea mo tou tehina ʼae neʼe ke fakamamahiʼi? ʼI te ʼu lisi ʼaeni ʼe lua, fakaʼiloga te tali ʼae ʼe lelei.

ʼE TONU KOA KE KE . . .

• palalau mo tou tehina mo kapau ʼe ke manatu ʼe ʼi ai moʼoni he tupuʼaga ʼo tana ita

• fakakinauʼi ke fetogi te manatu ʼa te tehina mo kapau ʼe ke sio ʼe mamahi fau tona loto peʼe ʼe ina tukugakoviʼi ia koe

• fagono fakalelei moka ʼe palalau atu te tehina. Pea tatau aipe pe ʼe mole ke mahino katoa ki te ʼu meʼa fuli, kae ke ke faifakalelei age ki ai ki te mamahi ʼae neʼe ina logoʼi peʼe ko te ʼu fua kovi ʼo te fihifihia

ʼE TONU KOA KI TOU TEHINA KE . . .

• Kumi kau ki ʼihi ʼo te kokelekasio ʼo fakamatala te tokakovi ʼae neʼe hoko

• ina tukugakoviʼi ia koe, lagaʼi te ʼu aluʼaga fuli ʼo te tokakovi, fakamaʼua atu kia koe ko tau hala

• ina tokagaʼi neʼe ke maʼu te agavaivai mo te lototoʼa ʼo ke haʼu ai kia ia pea ke ina fakamolemole moʼoni atu

Logo la ʼe mole kei tou fai he ʼu sakilifisio manu ʼi tatatou tauhi, kae kotea ʼae neʼe akoʼi mai e Sesu ʼo ʼuhiga mo te fakatokatoka mo ʼotatou tehina mo tuagaʼane pea mo tatatou tauhi ʼae ki te ʼAtua?