He koʼe ʼe tou leleiʼia ʼatatou fakatahi fakafenua? Koteʼuhi ohage ko tona fai e te Iselaele ʼo te temi muʼa, ko te ʼu fakatahi fakafenua, ʼe ko he faigamalie ʼaia ke tou tauhi ai kia Sehova, fakatahi mo he toko teau, peʼe ko he toko lauʼi afe kaugana ʼa te ʼAtua. Pea tahi, ʼe teuteuʼi ai he ʼu meʼa kai fakalaumalie, ʼe tokoni mai ai ke tou nonofo ovi kia Sehova. Pea ʼe tou fiafia ʼi tatatou fakatahi mo ʼotatou famili, pea mo ʼotatou kaumeʼa. Ko te tupuʼaga la ʼaia ʼo takita fia kau ki te ʼu ʼaho ʼe tolu ʼo te fakatahi ʼaia.

ʼI te ʼu fakatahi ʼaia, ʼe tonu ke tou manatuʼi ia te ʼu lelei ʼae ʼe tou maʼu mai ai, pea mo totatou faʼahiga fakaha ʼo totatou ʼofa. (Kal 6:10; Hep 10:24, 25) Ohage la, ʼe tou kumi te ʼu meʼa ʼae ʼe lelei ki ʼihi. Ohage la, moka tou avahi te matapa ki he tehina peʼe ko he tuagaʼane, pea mo taʼofi pe te ʼu hekaʼaga ʼae ka tou fakaʼaogaʼi. (Flp 2:3, 4) Pea ʼi te ʼu fakatahi feia, ʼe tou toe maʼu ai hotatou kaumeʼa foʼou. Koia, ʼe feala ke tou fakatuʼutuʼu ai ke tou feiloʼiʼaki mo he tahi, ia muʼa ʼo te kamata peʼe ko te ʼosi ʼo te fakatahi, pea mo te temi kai. (2Ko 6:13) Ko te ʼu fakakaumeʼa ʼaia ʼe feala ke tologa. ʼI te sisio ʼae te hahaʼi ki tatatou feʼofaʼofani, ʼe feala ke natou liliu ʼo tauhi kia Sehova.—Soa 13:35.

VAKAʼI TE ʼATA VITEO TE ʼU FAKATAHI FAKAMALAMANEI “KO TE ʼOFA ʼE MOLE PULI ANAI ʼI HE TEMI,” PEA MO TALI KI TE ʼU FEHUʼI ʼAENI:

• Neʼe fakaha feafeaʼi te ʼofa e te ʼu tehina mo tuagaʼane ʼae neʼe ʼomai mai te tahi ʼu fenua ki te ʼu fakatahi fakafenua ʼo te taʼu 2019?

• He koʼe ʼe fakaofoofo ia te logo tahi pea mo te feʼofaʼofani ʼa te ʼu kaugana ʼa Sehova?

• Kotea te ʼu fahaʼi ʼo te ʼofa Fakakilisitiano neʼe fakamaʼuhigaʼi e te ʼu tehina ʼo te Kolesi Pule?

• Neʼe lava fakatahiʼi feafeaʼi e te ʼofa Fakakilisitiano ia te ʼu tehina mo tuagaʼane ʼo Siamani pea mo Kolea Saute?

• Kotea ʼae ʼe tou fakatotonu ke tou fai?