Ko te hahaʼi ʼo te malamanei, ʼe natou ui ko te meʼa ʼae ʼe lelei ʼe kovi pea ko te meʼa ʼae ʼe kovi ʼe lelei. (Esa 5:20) Meʼa fakaʼofaʼofa ko ʼihi ʼe natou fai he ʼu aga, ʼe fakalialia kia Sehova. Ohage la ko he ʼu tagata ʼe natou fai he ʼu aga ʼe heʼe maʼa mo he tahi ʼu tagata ʼo toe feia mo te hahaʼi fafine. ʼE feala ki he ʼu kauga ako peʼe ko he tahi ʼu hahaʼi ke natou fakaneke siʼi ʼotatou kau tupulaga ke natou faʼifaʼitakiʼi natou. ʼE feafeaʼi hakotou teuteuʼi ʼakotou fanau ke natou tauʼi te ʼu fakaneke ʼaia?

Kotou akoʼi ki ʼakotou fanau te ʼu lekula ʼa Sehova ʼae ʼe feala ke puipui ai natou. (Le 18:3) Kotou akoʼi mamalie age te manatu ʼa te Tohi-Tapu ʼo ʼuhiga mo te ʼu felaveʼi fakasino ʼo kotou mulimuli pe ki ʼonatou taʼu pea mo te ʼu meʼa ʼe feala ke natou mahino ki ai. (Te 6:7) Fai kia koutou te ʼu fehuʼi ʼaeni: ‘ ʼE au fakamahino koa ki ʼaku tamaliki te aga ʼae ʼe lelei ʼo ʼuhiga mo te fakaha ʼae ʼo totā ʼofa? He koʼe ʼe maʼuhiga ke natou teuteu fakalelei? Pea he koʼe ʼe ʼaoga ke fakaʼapaʼapa te hahaʼi ki tonatou sino? ʼE natou iloʼi koa te meʼa ʼae ʼe tonu ke natou fai moka faiga he tahi ke ina fakaha age kia natou he ʼu ʼata kovi peʼe moka ʼe kole age he tahi kia natou ke natou fai he meʼa ʼe fehiʼa ai ia Sehova? Kapau ʼe iloʼi ʼakotou fanau te ʼu meʼa ʼe tonu ke natou fai pea ʼe natou hao anai mai he ʼu tuʼuga mamahi. (Taa 27:12; Ekl 7:12) ʼI takotou akoʼi age te ʼu faʼahi ʼaia, ʼe kotou fakaha ai takotou ʼofa ki te tofiʼa maʼuhiga ʼae neʼe foaki atu e Sehova.—Pes 127:3.

VAKAʼI TE ʼATA VITEO KOTOU FAʼU IA HE ʼAPI ʼE TOLOGA—KE KOTOU PUIPUI ʼAKOTOU FANAU MAI TE MEʼA ʼAE ʼE KOVI PEA MO TALI KI TE ʼU FEHUʼI ʼAENI:

• He koʼe ʼe faigataʼa ki ʼihi tanatou palalau ki ʼanatou fanau ʼo ʼuhiga mo te ʼu felaveʼi fakasino?

• He koʼe ʼe tonu ki te ʼu matuʼā ke natou akonakiʼi pea mo akoʼi ʼanatou fanau ʼo mulimuli ki te meʼa ʼae ʼe ui e Sehova.—Efe 6:4

• Kotea te tokoni ʼe foaki e te kautahi ʼa Sehova ki te ʼu matuʼā ke natou palalau ai ki ʼanatou fanau ʼo ʼuhiga pea mo te ʼu felaveʼi fakasino?—w19.05 12, te fakamatala ʼae ʼi te ʼa takai

• He koʼe ʼe tonu ke kotou felogoi tuʼumaʼu mo ʼakotou fanau ia muʼa ʼo he hoko ʼo he fihifihia?