Neʼe feala te faifakamafola faigamalie ʼa Sesu ki te fafine Samalitana, he neʼe ina kamata ʼaki te kiʼi faipalalau. ʼE feafeaʼi te kamata ʼo he faipalalau mo he ʼu matapule ke lelei age?

• Kotou palalau mo agalelei ki te hahaʼi. Logo la te gaʼegaʼe ʼa Sesu, kae ko ia ʼae neʼe kamata palalau ʼo kole he moʼi vai ke inu. Koia ʼe feala pe ke kotou kamata ʼaki he fakamalo pea kotou palalau leva ki te temi, peʼe ko he aluʼaga pe neʼe hoko. Kotou manatuʼi ko te maʼuhiga, ʼuluaki ke kotou kamata he faipalalau. Koia kotou palalau pe ki he meʼa ʼe fia logo ki ai. Kapau ʼe mole ina fia tali atu pea toe ʼahiʼahi age ki he tahi kehe. Kole tokoni kia Sehova ke ina foaki atu te lototoʼa.—Nee 2:4; Gau 4:29.

• Faigaʼi ke kotou maʼu he temi faigamalie moʼo fakaha age te logo lelei, kae ʼaua foki naʼa kotou fakaha age pe ʼi te kamata ʼo te felaveʼi. Faigaʼi ke hoholo te faipalalau. Kapau ʼe kotou fakakinauʼi, ʼe lagi gata anai te felogoi. ʼAua naʼa kotou lotovaivai ʼi takotou heʼeki kamata palalau age ki te moʼoni. Kapau ʼe faigataʼa te kamata ʼo he faipalalau ki te moʼoni, faʼifaʼitaki muʼa he ʼu faʼahiga palalau ke kotou mahani ki ai. [Fakahaʼele te ʼata viteo 1 pea mo fai palalau ki ai.]

• Faigaʼi ke kotou maʼu he faigamalie ke kotou fakaha age takotou tui, ke tupu ai hana fia fai atu he ʼu fehuʼi. Neʼe fai ʼe Sesu te ʼu palalau fakaofoofo ʼo tupu ai te fia iloʼi meʼa fuli ʼa te fafine ʼo ina fai ai ni fehuʼi. Pea ʼi te palalau age ʼa Sesu ki te logo lelei, neʼe tali ai ki ʼana fehuʼi. [Fakahaʼele te ʼata viteo 2 pea mo faipalalau ki ai, toe feia pe mo te ʼata viteo 3.]