Ka tou fai he ʼu fakatuʼutuʼu fakalaumalie, ʼe tou iloʼi ʼe tonu ke tou fakaʼaogaʼi fakapotopoto totatou malohi. (1Ko 9:26) ʼE tou toe fakaʼaogaʼi lelei mo totatou temi ʼi muʼa ʼo te hoko mai ʼo te fakaʼosi ʼo te malama ʼaeni. (Efe 5:15, 16) ʼE lelei ke kotou palalau ʼi takotou ako fakafamili, pe kotea te ʼu fakatuʼutuʼu ʼe feala ke kotou fai ki te taʼu gaue ʼae ka hoko mai. ʼE kotou maʼu anai ʼi te kaupepa ako ʼaeni ni alatike ʼe talanoa ki ni fakatuʼutuʼu ʼe feala anai ke kotou fakakaukauʼi pea mo faikole kia Sehova.​—Skp 1:5.

Ohage la, pe feala hakotou fakakaukauʼi ke kotou fetokoniʼaki ʼi te loto famili ke feala ai ki he tahi ia koutou ke liliu ʼo pionie katoa. Kapau ʼe kotou tuʼania naʼa mole feala hakotou fai takotou ʼu hola pionie, kotou kole tokoni ki te kau pionie. (Taa 15:22) ʼE feala pe ke kotou fakaafe he pionie ki takotou ako fakafamili pea mo fakafehuʼi ai ia ia. ʼOsi ʼaia, pea kotou fai he polokalama. Kapau neʼe kotou pionie ki muʼa atu, kotou vakaʼi pe feala hakotou toe toʼo takotou selevisi pionie.

ʼE lagi feala ki ʼihi ʼi tokotou famili ke natou toʼo tanatou selevisi pionie vaeluaʼi temi ʼi he mahina peʼe faihoholo. Kapau ʼe mole kei lahi tokotou malohi, ʼe feala pe ke kotou toʼo ia te selevisi pionie vaeluaʼi temi, ʼaki pe takotou fai ni hola ʼe tahi peʼe lua ʼi te ʼaho fuli. Kapau ʼe mole lahi tokotou temi ki te faifakamafola ʼuhi heʼe kotou gaue peʼe ʼe kei kotou ako, ʼe feala ke kotou filifili he mahina ʼe lahi ai te ʼu ʼaho malolo peʼe ko fakaʼosi vahaʼa ʼe nima. ʼE feala ke kotou tohi ki te kaletalio ia te ʼu mahina ʼae ʼe kotou manatu ʼe kotou toʼo anai takotou selevisi pionie vaeluaʼi temi pea mo kotou fai he polokalama.​—Taa 21:5.

SIOʼI TE ʼATA KE KOTOU LOTOTOʼA ʼI TOKOTOU ʼUHIGA . . . PIONIE, PEA MO TALI KI TE FEHUʼI ʼAENI:

• Kotea ʼae neʼe hoko ki te tuagaʼane ko Aamand ʼo tou mahino ai, ʼe tokaga ia Sehova kia natou ʼae ʼe natou fai ni sakilifisio ke feala hanatou liliu ʼo pionie?