TE MAʼULI FAKAKILISITIANO
Ke Fua Lelei Age Takotou Ako Takitokotahi
HE KOʼE ʼE MAʼUHIGA? Ko te ako takitokotahi ʼo te Folafola ’a te ʼAtua ʼe tokoni mai ke tou “mahino katoa [. . . ] ki te laulahi, mo te loa, mo te maʼoluga pea mo te loloto” ʼo te moʼoni. (Efe 3:18) Pea ʼe toe tokoni mai ke tou heʼe mele mo haohaoa ʼi te lotolotoiga ʼo te malama agakovi ʼaeni, pea ke tou “taʼofi maʼu te folafola ʼo te maʼuli.” (Flp 2:15, 16) Ko te ako takitokotahi ʼo te Folafola ʼa te ʼAtua ʼe ina fakafealagia mai ke tou filifili te meʼa ʼae ʼe ʼaoga kia tatou totonu. Kotea ʼe tonu ke tou fai ke fua lelei age kia tatou te lau mo te ako ’o te Tohi-Tapu?
TE ʼU MEʼA ʼAE ʼE TONU KE KOTOU FAI:
-
Fakailoga te ʼu vaega pea mo tohi ni nota ʼi takotou Tohi-Tapu peʼe ʼae ʼi takotou kiʼi masini
-
ʼI takotou lau te Folafola ʼa te ʼAtua, fai te ʼu fehuʼi ʼaeni: ‘Ko ai? Kotea te aluʼaga? Ko te temi fea? Ko te koga meʼa fea? Kotea tona tupuʼaga? ʼO feafeaʼi?’
-
Fai ni fekumi ʼo ʼuhiga mo te aluʼaga ʼaia ʼi ʼatatou tohi peʼe ʼi ʼatatou meʼa gaue, vakaʼi ai te ʼu kupu tafito peʼe ko te ʼu vaega Tohi-Tapu
-
Metitasio ki te meʼa ʼae ʼe kotou lau ke kotou iloʼi ai pe ʼe fakaʼuhiga feafeaʼi kia koutou totonu te manatu ʼaia
-
Maʼuliʼi te meʼa ʼae ʼe kotou ako ʼi te ʼaho fuli.—Luk 6:47, 48
VAKAʼI TE ʼATA VITEO TOU TAʼOFI MA’U TE FOLAFOLA ʼA TE ʼATUA ʼAKI TATATOU AKO FAKAMALOTOLOTO, PEA MO TALI KI TE ʼU FEHUʼI ʼAENI:
-
Kotea te manatu ʼa ʼihi ki te ako takitokotahi?
-
He koʼe ʼe tonu muʼa ke tou faikole ia muʼa ʼo tatatou ako takitokotahi?
-
Kotea ʼae ʼe feala ke tokoni mai ke tou mahino lelei ki he vaega Tohi-Tapu?
-
Kotea te ʼu faʼahiga fakailoga ʼe feala ke tou ʼai ki ʼatatou Tohi-Tapu?
-
He koʼe ʼe maʼuhiga ke tou metitasio moka ʼe tou ako te Folafola ʼa te ʼAtua?
-
Kotea ʼae ʼe tonu ke tou taʼofi mai te ʼu meʼa neʼe tou ako?