Ka fakamavae he tahi, ʼe ko te puipui ʼaia ʼo te kokelekasio pea ko te fakatonutonuʼi ʼo ia ʼae ʼe agahala kae neʼe mole fakahemala. (1Ko 5:6, 11) ʼE tou fakaha totatou ʼofa ʼaki tatatou tali te akonakiʼi ʼaia ʼa Sehova. Kae ʼe fakatupu mamahi te fakamavae ʼa he tahi ki te famili pea mo te komite faifakamau fakalotu. Koia, he koʼe ʼe tou ui ʼe tou fakaha totatou ʼofa moka tou lagolago ki te fakatuʼutuʼu ʼaia?

ʼE tou fakaha tafito ai totatou ʼofa ki te matagafua ʼo Sehova mo tana ʼu lao ʼo ʼuhiga mo te maʼoniʼoni. (1Pe 1:14-16) ʼE tou toe fakaha mo totatou ʼofa kia ia ʼae neʼe fakamavae. Logope la ko te fakatonutonuʼi ʼo he tahi ʼe fakalotomamahi, kae ʼe maʼu ai “te tokalelei pea mo te faitotonu.” (Hep 12:5, 6, 11) Kapau ʼe tou fakatahi mo he tahi neʼe fakamavae pe neʼe mavae ʼi tona loto faʼitaliha, ʼe tou talagataʼa ai ki te fakatonutonuʼi ʼo ia e te ʼAtua. Ke ke manatuʼi, ʼe akonakiʼi e Sehova ʼana kau atolasio “i te faitotonu.” (Sel 30:11) ʼI tatatou lagolago ki te akonakiʼi ʼaia pea mo hoko atu ʼatatou gaue fakalaumalie, ʼe tou fakaʼamu pe ʼe toe liliu mai anai ia ia ʼae neʼe mavae ki tatatou Tamai manavaʼofa.—Esa 1:16-18; 55:7.

VAKAʼI TE ʼATA VITEO TOU NONOFO AGATONU ʼAKI HE LOTO KATOA, PEA MO TALI KI TE ʼU FEHUʼI ʼAENI:

• Kotea ʼae ʼe logoʼi e he ʼu matuʼā Kilisitiano moka mavae tanatou tamasiʼi mai ia Sehova?

• ʼE lava tokoni feafeaʼi te kokelekasio ki te ʼu matuʼā ʼae ʼe nonofo agatonu kia Sehova?

• Kotea te fakamatala Fakatohi-tapu ʼae ʼe ha ai ʼe maʼuhiga age te nofo agatonu kia Sehova ʼi te famili?

• ʼE feafeaʼi hatatou fakamuʼamuʼa tatatou nofo agatonu kia Sehova ʼi totatou famili?