ʼE TUʼU ANAI KOA TOTATOU KELE ʼO TALU AI?
Te Tai
ʼE MOLE maʼu pe ʼi te tai he ʼu meʼa ke tou kai, kae ʼe toe maʼu lahi ai foki ni koga ʼe ʼaoga ki te faʼu ʼo ni faitoʼo. ʼE lahi te ʼaele lelei ʼe tou maʼu ʼuhi ko te tai, pea ʼe ina tanaki te ʼaele kovi. Pea tahi, ko te ʼu aluʼaga ʼae ʼe hoko ʼi te tai, ʼe ʼi ai ʼona fua ki te agaaga tuʼu ʼo te ʼaele.
He Koʼe ʼe Tonu Ke Tou Puipui Te Tai?
Ko te fetogi ʼo te agaaga ʼo te kele, ʼe fakatupu kovi ki te ʼu lauhakau feoʼia, mo te ʼu figota pea mo ʼihi atu ika kehekehe. ʼE fakafuafua e te kau poto kei toe pe taʼu ʼe 30 pea ʼe feala ke puli te ʼu lauhakau fuli.
ʼE fakafuafua e te kau poto, ko te 90 ki te 100 ʼo te ʼu manulele ʼe maʼuʼuli ki te tai, ʼe natou kai te palasitike. Pea ʼe lau ko ika ʼe lauʼi miliona ʼe mamate ʼi te taʼu ʼuhi ko te palasitike.
ʼI te 2022, neʼe ui fenei e António Guterres, te Sikalaipe Lahi ʼo te Kautahi ʼo Te ʼu Puleʼaga Fakatahi: “Neʼe mole matou tokaga lelei ki te tai koia ia ʼaho nei, kua tonu ke matou fai he ‘puleʼaki fakavilivili’ moʼona puipui.”
Neʼe Fakatupu Totatou Kele Ke Tuʼu ʼo Talu Ai
Neʼe fakatupu te tai mo meʼa maʼuli fuli ʼi ai ke maʼa mo kapau ʼe mole ʼulihi e te tagata. ʼE fakamahino ʼi he tohi ka mole ʼulihi e te tagata te tai, pea “ ʼe feala pe tanatou fakamaʼa ia natou.” Tou toʼo he ʼu faʼifaʼitaki:
-
Ko te ʼu kiʼi eveeve ʼaeni ʼe higoa ko te phytoplancton ʼe ina fakaʼaogaʼi mo tanaki ia te dioxyde de carbone. ʼE ui ko te kasa tafito ʼaia ʼe tupu ai te ʼaʼasili ʼo te vela. ʼE tatau pe te lahi ʼo te kasa ʼae ʼe maʼu ʼi te phytoplancton mo ʼae ʼe maʼu ʼi te ʼu fuʼu ʼakau fuli ʼi te kele.
-
ʼE kai e te ʼu mikolope te kili mo te ʼu hui ʼo te ʼu ika kua mamate, ʼae ʼe ina ʼulihi anai te tai. Pea ʼe liliu leva te ʼu kiʼi mikolope ʼaia ko he meʼa kai ʼa ʼihi atu ika ʼo te tai. ʼE tokoni te faʼahiga fai ʼaia ki te “taupau ke maʼa mo tasilo ʼo te tai,” ohage ko tona ui e te Portail Océan de la Smithsonian Institution.
-
Ka ʼosi kakai te ʼu ika pea ʼe natou fakasiʼisiʼi te kona ʼo te tai, ʼae ʼe fakatupu kovi ki te ʼu feo, mo te ʼu figota pea mo ʼihi atu meʼa maʼuli ʼi te tai.
Te Kumi ʼo He ʼu Puleʼaki
Kapau ʼe mole tou liʼaki he ʼu ʼotaʼota ki te tai, ʼe mole ʼaoga ia ke fakamaʼa. Koia ʼae ʼe fakalotomalohiʼi ai e te kau poto ia te hahaʼi ke natou fakaʼaogaʼi he ʼu kato, mo he ʼu meʼa ʼe tologa ʼe feala ke toe fakaʼaogaʼi, kae mole tou fakaʼaogaʼi tatou te ʼu meʼa palasitike ʼae ʼe fakaʼaogaʼi tuʼa tahi pea liʼaki leva.
Kae ʼe mole gata ai. Heʼeki faʼa fualoa ki ai, neʼe tae e he kautahi ʼo te ʼulu fenua ia tane ʼotaʼota ʼe 8 000 ʼi te ʼu mata tai ia fenua ʼe 112, ʼi te taʼu pe ʼe tahi. Kae ʼe ko he kiʼi koga veliveli pe ʼaia ʼo te ʼu ʼotaʼota fuli ʼae ʼe alu ki te tai, ʼi te taʼu.
ʼE ui ʼi te tohi National Geographic, “ ʼe lagi mole kei feala ke toe liliu te ʼu koga tai ʼo maʼa ʼuhi ko te aluʼaga ʼae neʼe hoko ʼo kaku mai ki te ʼaho nei.” ʼE lahi te ʼu meʼa ʼe tutu e te tagata ohage la ko te penisini, ʼo mole feala ai ki te ʼu manu ʼo te tai ke natou fakahoko tanatou gaue ʼae ko te taupau ke maʼa te ʼu koga tai.
Kotea Te ʼAmanaki ʼAe ʼe Foaki Mai ʼi Te Tohi-Tapu?
“ ʼE fonu te kele ko ʼau gaue. ʼE lahi mo loloto te tai, pea ʼe gaugaue ai ni meʼa maʼuli liliki mo lalahi ʼe mole malau.”—Pesalemo 104:24, 25.
Neʼe fakatupu e totatou Tupuʼaga ia te ʼu koga tai mo ʼonatou fealagia ke haga pe natou ʼo fakamaʼa. Kotou fakakaukauʼi age muʼa: Kapau la ʼe ina iloʼi lelei te tai mo meʼa maʼuli fuli ʼi te tai, ʼe mole ina toe lava fakatokatoka koa la ia te ʼu maumau neʼe fai ki te tai? Kotou vakaʼi te alatike “ ʼE Fakapapau e Te ʼAtua ʼe Tuʼu Anai Totatou Kele ʼo Talu Ai” ʼi te pasina 15.