ALATIKE AKO 6
“Ko Te Pule ʼo Te Fafine ʼe Ko Te Tagata”
“Ko te pule ʼo te fafine ʼe ko te tagata.”—1 KO. 11:3.
KATIKO 13 Ko Totatou Faʼifaʼitakiʼaga Ko Kilisito
TE ʼU MANATU FAKANOUNOU *
1. Kotea te ʼu fehuʼi ʼe feala ke fai e he tuagaʼane ʼe fia ʼohoana?
ʼE FAKALOGO te kau Kilisitiano fuli ki te pule ʼa Sesu ʼae ʼe haohaoa. Kae ka ʼohoana he tuagaʼane, ʼe fakalogo leva ia ki te pule ʼo tona ʼohoana ʼae ʼe heʼe haohaoa, ʼo feala ai ke hoko he ʼu fihifihia. Koia, kapau ʼe fia ʼohoana he tuagaʼane mo he tehina pea ʼe tonu ke ina fai te ʼu fehuʼi ʼaeni: ‘Kotea ʼe ha mai kia au ko te tuagaʼane ʼaia ʼe liliu anai ko he pule famili ʼe lelei? ʼE ina fakamuʼamuʼa koa te ʼu gaue fakalaumalie? Kapau ʼe mole koia ʼaia, pea ʼe fetogi anai koa tana aga hili tamā ʼohoana?’ Pea ʼe tonu foki ke toe fai e te tuagaʼane ʼaia te ʼu fehuʼi ʼaeni: ‘ ʼE au maʼu koa ni kalitate ʼe tokoni anai ke manuʼia tamā ʼohoana? ʼE au maʼu koa te kataki fualoa pea mo lotofoaki? ʼE au felogoi lelei koa mo Sehova?’ (Ekl. 4:9, 12) Kapau ʼe fai e he tuagaʼane he ʼu tonu ʼe lelei ʼi muʼa ʼo tona ʼohoana, ʼe tokoni anai ke maʼuli fiafia ʼi tanā ʼohoana.
2. Kotea te ʼu fehuʼi ʼe tali anai ki ai te alatike ʼaeni?
2 Ko te toko miliona tuagaʼane ʼe natou tuku he faʼifaʼitaki lelei ʼi tanatou fakalogo ki ʼonatou ʼohoana. Pea ʼe tonu ke tou vikiʼi natou. ʼE tou fiafia ʼi te tauhi fakatahi kia Sehova mo te ʼu tuagaʼane agatonu ʼaia. ʼI te alatike ʼaeni, ʼe tou tali anai ki te ʼu fehuʼi ʼe tolu ʼaeni: (1) Kotea te ʼu fihifihia ʼe feala ke hoko ki te ʼu fafine ʼohoana? (2) He koʼe ʼe filifili e he fafine ʼohoana ke fakalogo ki tona ʼohoana? (3) Kotea te ʼu ako ʼe feala ke taʼofi e he taumatuʼa mai te faʼifaʼitaki ʼa Sesu, mo Apikaile, pea mo Malia ʼo ʼuhiga mo te fakalogo?
KOTEA TE ʼU FIHIFIHIA ʼE FEALA KE HOKO KI HE FAFINE ʼOHOANA?
3. He koʼe ʼe hoko he ʼu fihifihia ki te ʼu taumatuʼa fuli?
3 Ko te ʼohoana ʼe ko he meʼa ʼofa haohaoa mai te ʼAtua. Kae ko natou ʼae kua ʼohoana ʼe natou heʼe haohaoa. (1 Soa. 1:8) Koia ʼae ʼe fakatokagaʼi ai natou ʼi te Folafola ʼa te ʼAtua, ʼe natou tau anai “mo he ʼu mamahi.” (1 Ko. 7:28) Tou vakaʼi muʼa te ʼu fihifihia ʼe feala ke hoko ki he fafine ʼohoana.
4. He koʼe ʼe feala ke ui e he fafine ko tana fakalogo ʼae ki tona ʼohoana, ʼe ko hona fakamalaloʼi?
4 ʼUhi ko tona faʼahiga akoʼi, ʼe feala ke ui e he fafine ko tana fakalogo ʼae ki tona ʼohoana, ʼe ko hona fakamalaloʼi. ʼE ui fenei e Marisol, ʼae ʼe maʼuli ʼi Amelika: “ ʼI te koga meʼa ʼae neʼe au lahilahi ake ai, neʼe ui tuʼumaʼu aipe ko te hahaʼi fafine ʼe tonu ke natou tatau mo te hahaʼi tagata ia faʼahi fuli. ʼE au iloʼi ko Sehova ʼae neʼe ina foaki te pule ki ʼihi. ʼE au toe iloʼi ko Sehova ʼae neʼe ina ui ki te hahaʼi fafine ke natou fakalogo ki ʼonatou ʼohoana. Pea ʼe ʼaoga ki ai te agavaivai. Kae ʼe tonu pe foki ke fakaʼapaʼapaʼi te ʼu fafine ʼohoana. Kae ʼe faigataʼa taku fakalogo tuʼumaʼu ki te pule ʼo toku ʼohoana. Koteʼuhi ʼe ui e te hahaʼi ʼo te malama, ʼe mole maʼua ke au fakalogo.”
5. Kotea te ʼu manatu hala ʼe maʼu e ʼihi tagata ʼo ʼuhiga mo te hahaʼi fafine?
5 ʼI te tahi age faʼahi, ʼe feala ki he tuagaʼane ke ʼohoana mo he tagata ʼe ina fakamalaloʼi te hahaʼi fafine. ʼE ui fenei e te tuagaʼane ko Ivon, ʼe maʼuli ʼi Amelika Saute: “ ʼI toku fenua, ʼe ʼuluaki kakai muʼa te hahaʼi tagata, pea hoki ʼosi ko te hahaʼi fafine. Talu mai tanatou liliki, ʼe fakamaʼua ki te hahaʼi fafine ke natou fai te meʼa kai pea mo fakamaʼa te loto fale. Kae ko te ʼu tamaliki tagata ʼe tauhi natou e ʼanatou faʼe mo ʼonatou kiʼi tokolua ohage ko he ʼu kiʼi hau ʼo te loto fale.” ʼE ui fenei e te tuagaʼane ko Yingling, ʼe maʼuli ʼi Asia: “ ʼI taku lea ʼe ʼi ai te takuga lea ʼe ui ai, ʼe mole ʼaoga ke popoto te hahaʼi fafine. ʼE tonu ke natou fai te ʼu gaue fuli ʼo te loto fale. Pea ʼe mole tonu ke natou fakaha tanatou ʼu manatu ki ʼonatou ʼohoana.” Kapau ʼe mulimuli he tagata ʼohoana ki te taʼi manatu ʼaia, ʼae ʼe mole maʼu ai te ʼofa pea mo fakafeagai ki te ʼu pelesepeto Fakatohi-tapu, ʼe faigataʼa anai te maʼuli ʼo tona ʼohoana. ʼE mole faʼifaʼitakiʼi e te tagata ʼaia ia Sesu pea ʼe mole ʼofainaʼi ia ia e Sehova.—Efe. 5:28, 29; 1 Pet. 3:7.
6. Kotea ʼae ʼe tonu ke fai e he tuagaʼane kua ʼohoana ke malohi ai ʼana felogoi mo Sehova?
6 Ohage ko tatatou vakaʼi ʼi te alatike ʼaeni kua ʼosi atu, ʼe loto e Sehova ke tokaga te tagata ʼohoana ki te maʼuli fakalaumalie ʼo tona kiʼi famili, ke ina fakaha age ʼe ʼofa ia natou, pea mo toe tokaga ki tonatou maʼuli fakasino. (1 Tim. 5:8) Kae, ʼe tonu ki te ʼu tuagaʼane ʼae kua ʼohoana ke natou toʼo he temi ʼi te ʼaho fuli ke natou lau te Tohi-Tapu mo metitasio ki ai pea mo faikole fakamalotoloto kia Sehova. ʼE lagi faigataʼa te fakahoko ʼo te ʼu faʼahi ʼaia he ʼe lahi ʼanatou gaue. ʼE feala pe ke natou ui ai ʼe mole natou maʼu hanatou temi mo he malohi ke natou ako te Tohi-Tapu pea mo faikole. Kae ʼe maʼuhiga ke natou fakahoko te ʼu faʼahi ʼaia. Kotea tona tupuʼaga? Koteʼuhi ʼe loto e Sehova ke tou tahi maʼu he felogoi lelei mo ia.—Gaue 17:27.
7. Kotea ʼae ʼe tokoni anai ki he tuagaʼane kua ʼohoana ke ina fakahoko te meʼa ʼae ʼe kole age e Sehova?
7 ʼE lagi tonu anai ke faiga malohi he fafine ke fakalogo ki tona ʼohoana ʼae ʼe heʼe haohaoa. Kae kapau ʼe mahino pea mo ina tali ia te ʼu tupuʼaga ʼo te kole age e Sehova ke fakalogo ki tona ʼohoana, ʼe faigafua anai ki ai hana fakahoko.
HE KOʼE ʼE FILIFILI E HE FAFINE ʼOHOANA KE FAKALOGO KI TONA ʼOHOANA?
8. He koʼe ʼe filifili e he fafine ʼohoana ke fakalogo ki tona ʼohoana ʼo mulimuli kia Efeso 5:22-24?
8 ʼE filifili e he tuagaʼane ke fakalogo ki tona ʼohoana he ʼe ko te loto ʼaia ʼo Sehova. (Lau ia Efeso 5:22-24.) ʼE falala ki tana Tamai ʼae ʼe ʼi selo. ʼE ina iloʼi ʼe ʼofainaʼi ia ia e Sehova, pea ko te ʼu meʼa fuli ʼae ʼe ina kole age, ʼe fua lelei pe anai kia ia.—Tet. 6:24; 1 Soa. 5:3.
9. Kotea ʼae ʼe hoko moka ʼe fakaʼapaʼapa he tuagaʼane ki te pule ʼo tona ʼohoana?
Pes. 119:165) ʼE fua lelei tana aga ʼaia ki tona ʼohoana, mo ʼana fanau, pea mo ia totonu.
9 ʼE uga e te malama te hahaʼi fafine ke natou manatu, ko te fakalogo ʼae ki ʼonatou ʼohoana, ʼe ko honatou fakamalaloʼi. Pea ʼe mole tokoni te malama ke natou mulimuli ki te ʼu pelesepeto ʼa Sehova. ʼE moʼoni, ko te hahaʼi ʼo te malama ʼae ʼe natou maʼu te ʼu manatu ʼaia ʼe mole natou iloʼi tatatou Tamai ʼae ʼe fonu ʼi te ʼofa. ʼE mole fakatotonu anai e Sehova ki ʼona ʼofafine ʼofaina he meʼa ke fakamalaloʼi ai natou. Ko te tuagaʼane ʼae ʼe faiga malohi ke fakalogo kia Sehova ʼaki tana fakaʼapaʼapa ki te pule ʼo tona ʼohoana, ʼe tokoni ki te tokalelei ʼo tona kiʼi famili. (10. Kotea ʼae ʼe tou ako mai te tala manatu ʼa Carol?
10 Ko te fafine ʼae ʼe fakalogo ki tona ʼohoana ʼae ʼe heʼe haohaoa, ʼe ina fakaha ai ʼe ʼofa ia ia pea mo fakaʼapaʼapa kia Sehova ʼae neʼe ina foaki te pule ki tona ʼohoana. ʼE ui fenei e Carol ʼae ʼe maʼuli ʼi Amelika Saute: “ ʼI ʼihi temi ʼe fai e toku ʼohoana ni lakahala, kae ʼe au iloʼi ko taku faʼahiga tali moka fai e toku ʼohoana ni lakahala, ʼe ha ai ʼe maʼuhiga kia au ʼaku felogoi lelei mo Sehova. Koia ʼe au faiga ai ke au fakalogo ki toku ʼohoana he ʼe au fia fakafiafiaʼi taku Tamai ʼae ʼe ʼi selo.”
11. Kotea ʼae ʼe tokoni ki te tuagaʼane ko Aneese ke fakamolemole ki tona ʼohoana? Pea kotea ʼae ʼe tou ako mai tana faʼifaʼitaki?
11 ʼE feala ke faigataʼa ki he fafine hana fakaʼapaʼapa mo fakalogo ki tona ʼohoana moka ʼe sio ia ʼe mole ina tokagaʼi te ʼu meʼa ʼae ʼe ina logoʼi, mo ʼae ʼe hoha ki ai. Kae ke ke tokagaʼi te meʼa ʼae ʼe fai e te tuagaʼane kua ʼohoana ko Aneese moka hoko kia ia te aluʼaga ʼaia: “ ʼE au faiga ke mole au ita ki toku ʼohoana, pea ʼe au manatuʼi ʼe tou lakahala fuli. ʼE au fakatuʼutuʼu ke au fakamolemole ʼaki he lotolelei ohage ko Sehova, pea ka au fakamolemole ʼe tokalelei ai toku loto.” (Pes. 86:5) Ko he fafine ʼohoana ʼae ʼe lotofakamolemole, ʼe faigafua age anai tana fakalogo ki tona ʼohoana.
HE ʼU FAʼIFAʼITAKI ʼI TE TOHI-TAPU ʼO ʼUHIGA MO TE FAKALOGO
12. Kotea te ʼu faʼifaʼitaki ʼe tou maʼu ʼi te Tohi-Tapu ʼo ʼuhiga mo te fakalogo?
12 ʼE lagi ui e ʼihi ko he tahi ʼe fakalogo ʼe vaivai ia. Kae ʼe mole koia. ʼE maʼu ʼi te Tohi-Tapu te faʼifaʼitaki ʼa he hahaʼi neʼe natou fakalogo ki
ʼonatou pule, kae neʼe natou lototoʼa. Tou vakaʼi te ʼu ako ʼe feala ke tou taʼofi mai ia Sesu, mo Apikaile pea mo Malia.13. He koʼe ʼe fakalogo ia Sesu ki tana Tamai?
13 Ko Sesu ʼe fakalogo kia Sehova, kae ʼe mole fakaʼuhiga leva ʼe mole poto ia Sesu peʼe mole lahi ʼona fealagia. Neʼe iloga te maʼu e Sesu he poto lahi he neʼe faigafua tana akoʼi te hahaʼi pea neʼe natou mahino ki ai. (Soa. 7:45, 46) Neʼe iloʼi lelei e Sehova te ʼu fealagia ʼo Sesu. Koia ʼae neʼe ina fakagafua ai ke gaue fakatahi mo ia moʼo fakatupu te ʼatulaulau. (Taag. 8:30; Hep. 1:2-4) Pea hili te fakatuʼuake e Sehova ia Sesu, neʼe ina foaki age “te pule katoa ʼi te lagi pea mo te kele.” (Mat. 28:18) Maʼia pe la te poto lahi ʼo Sesu, kae ʼe faiga tuʼumaʼu pe ke takitaki ia ia e Sehova. Kotea tona tupuʼaga? Koteʼuhi ʼe ʼofa ia ʼi tana Tamai.—Soa. 14:31.
14. Kotea te ʼu ako ʼe feala ke taʼofi e te ʼu tagata ʼohoana mai (1) te manatu ʼa Sehova ʼo ʼuhiga mo te hahaʼi fafine? (2) te ʼu manatu ʼae ia Taaga Lea 31?
14 Te ʼu ako maʼa te ʼu tagata ʼohoana. Kapau ʼe kole e Sehova ki te ʼu fafine ʼohoana ke natou fakalogo ki ʼonatou ʼohoana, ʼe mole fakaʼuhiga leva ʼe natou malalo age ʼi ʼonatou ʼohoana. ʼE fakamoʼoni ki ai ia tana filifili ʼae he hahaʼi tagata mo fafine ke natou kauga hau mo Sesu. (Kal. 3:26-29) Neʼe ina fakaha ʼe falala ki tona ʼAlo ʼi tana foaki age ia he pule lahi. ʼO toe feia mo he tagata ʼohoana, ʼe ina fakaha anai tona poto ʼaki tana foaki age ki tona ʼohoana he faʼahiga pule ki he ʼu meʼa ʼo tona loto fale. ʼE ui ʼi te Folafola ʼa te ʼAtua ʼo ʼuhiga mo te fafine ʼohoana faʼafai, ʼe feala ke tokaga ki te ʼu gaue ʼae ʼe tonu ke fai ʼi tona loto fale. ʼE feala ke ina totogi peʼe fakatau he ʼu kele pea mo faikoloa. (Lau ia Taaga Lea 31:15, 16, 18.) Pea ʼe mole ko he kaugana ia ke mole ina fakaha ʼana manatu. ʼE falala tona ʼohoana ki ai pea ʼe fagono lelei moka palalau age. (Lau ia Taaga Lea 31:11, 26, 27.) Ka fakaʼapaʼapa he tagata ki tona ʼohoana ʼe fiafia anai ʼi te fakalogo ki ai.
Kotea te ako ʼe feala ke taʼofi e he fafine ʼohoana faʼafai mai te faʼifaʼitaki ʼa Sesu, ʼae neʼe fakalogo kia Sehova? (Vakaʼi te palakalafe 15)
15. Kotea te ʼu ako ʼe feala ke taʼofi e te ʼu fafine ʼohoana mai te faʼifaʼitaki ʼa Sesu?
15 Te ʼu ako maʼa te ʼu fafine ʼohoana. Logo la neʼe fai e Sesu he ʼu gaue lalahi, kae neʼe mole manatu ia ʼe ko hona fakamalaloʼi ia tana fakalogo ʼae kia Sehova. (1 Ko. 15:28; Flp. 2:5, 6) ʼO toe feia mo te fafine ʼohoana faʼafai ʼae ʼe ina faʼifaʼitakiʼi ia Sesu, ʼe mole manatu ia ʼe ko hona fakamalaloʼi ia tana fakalogo ʼae ki tona ʼohoana. ʼE lagolago ki tona ʼohoana he ʼe ʼofa ia ia pea tafito ʼe ʼofa pea mo fakaʼapaʼapa kia Sehova.
ʼI tana ʼosi fekauʼi ʼae ke ʼave kia Tavite mo ʼana tagata hanatou meʼa kai, neʼe alu tonu ia Apikaile ʼo fakafelaveʼi kia natou. ʼE tulolo ia muʼa ʼo Tavite, ʼo kole mamahi age ke ʼaua naʼa lagavaka, he ʼe feala ai ke ina fai he hala mamafa (Vakaʼi te ʼu palakalafe 16)
16. Kotea te ʼu fihifihia neʼe tau mo Apikaile ʼo mulimuli kia 1 Samuele 25:3, 23-28? (Vakaʼi te pāki ʼo te takafi.)
16 Ko Apikaile neʼe ʼohoana mo Napale. Neʼe ko he tagata neʼe manatu pe kia ia totonu, mo fiameʼalahi, pea neʼe mole lotofakafetaʼi. ʼI te tahi ʼaho, neʼe fia matehi e Tavite mo ʼana tagata ia ia. Ka na pau la neʼe mole kei fia nofo ia Apikaile mo tona ʼohoana, neʼe feala pe ke ina tuku ia Tavite mo ʼana tagata ke natou matehi ia Napale. Kae neʼe mole ko te meʼa ʼaia neʼe ina fai. Neʼe ina toʼo ai ni tonu moʼo puipui ai ia Napale mo te hahaʼi ʼae ʼo tona loto fale. Fakakaukauʼi age muʼa tona lototoʼa ʼi tana fakaovi ki te toko 400 tagata mo ʼanatou mahafu tau, pea mo palalau fakaʼapaʼapa kia Tavite. Pea neʼe ina ui age ke tuku kia ia te ʼu hala ʼo tona ʼohoana. (Lau ia 1 Samuele 25:3, 23-28.) Neʼe mahino atu aipe ia Tavite neʼe fakaʼaogaʼi e Sehova ia te fafine lototoʼa ʼaia, moʼo foaki age he ʼu tokoni ʼe lelei, ke mole ina fai ai he hala mamafa.
17. Kotea te ʼu ako ʼe feala ke taʼofi e te ʼu tagata ʼohoana mai te fakamatala ʼo Tavite pea mo Apikaile?
17 Te ʼu ako maʼa te ʼu tagata ʼohoana. Ko Apikaile neʼe ko he fafine neʼe lahi tona poto. Pea meʼa lelei foki neʼe fakalogo ia Tavite ki tana tokoni, ka na ʼaua la neʼe ina fai he fakapo. ʼO
toe feia mo he tagata ʼohoana, ʼe ina fakaha anai tona poto ʼi hana fakalogo ki te ʼu manatu ʼo tona ʼohoana ʼi muʼa ʼo hana toʼo he tonu. ʼE lagi mole ina fai anai he tonu ʼe kovi.18. Kotea te ʼu ako ʼe feala ke taʼofi e te ʼu fafine ʼohoana mai te faʼifaʼitaki ʼa Apikaile?
18 Te ʼu ako maʼa te ʼu fafine ʼohoana. Ko te fafine ʼohoana ʼae ʼe ʼofa mo fakaʼapaʼapa kia Sehova, ʼe feala ke fua lelei tana aga ki tona kiʼi famili tatau aipe pe ʼe mole tauhi tona ʼohoana kia Sehova peʼe mole fakalogo ki ʼAna pelesepeto. ʼE mole kumi puleʼaki anai te fafine ke mavete ai mo tona ʼohoana. Kae ʼe faiga anai ke fia iloʼi e tona ʼohoana ia Sehova ʼaki tana fakaʼapaʼapa mo tana fakalogo kia ia. (1 Pet. 3:1, 2) Tatau aipe pe ʼe mole tokagaʼi e tona ʼohoana tana aga ʼae ʼe lelei, kae ʼe maʼuhiga ia kia Sehova. Pea ʼe fiafia ia Sehova ʼi tana nofo agatonu.
19. Ko te aluʼaga fea ʼe mole fakalogo anai he tuagaʼane ki tona ʼohoana?
19 Kae ko te fafine ʼae ʼe fakalogo ʼe mole talagataʼa anai ki he lao peʼe ko he pelesepeto Fakatohi-tapu, tatau aipe pe ʼe fakakinauʼi ia ia e tona ʼohoana. Ohage la, ko he tuagaʼane ʼe kole age e tona ʼohoana ʼae ʼe mole tauhi kia Sehova, ke loi, peʼe ke kaihaʼa, peʼe ke ina fai he meʼa ʼe mole loto ki ai ia Sehova. Ko te kau Kilisitiano fuli ʼo kau ai te ʼu tuagaʼane ʼae kua ʼohoana, ʼe tonu ke natou fakalogo muʼa kia Sehova. Kapau ʼe kole age e te ʼohoana ʼo he tuagaʼane ke ina fai he meʼa ʼe talagataʼa ai ki he pelesepeto Fakatohi-tapu, ʼe tonu anai ke fakafisi pea mo fakamahino fakahagatonu age ia tona tupuʼaga, kae ʼaki he agamalū.—Gaue 5:29.
Vakaʼi te ʼu palakalafe 20 *
20. ʼE tou iloʼi feafeaʼi neʼe maʼu e Malia he felogoi lelei mo Sehova?
20 Ko Malia neʼe ina maʼu he felogoi lelei mo Sehova. ʼE mahino ia neʼe ina iloʼi lelei te ʼu Tohi Taputapu. ʼI tana faipalalau ʼae mo Elisapeta, te faʼe ʼa Soane Patita, neʼe ina fakaʼaogaʼi tuʼa 20 tupu he ʼu vaega ʼo te Koga Tohi-Tapu Fakahepeleo. (Luka 1:46-55) Ke ke fakakaukauʼi te aluʼaga ʼaeni: Logo la neʼe kua teuteu ʼohoana ia Malia pea mo Sosefo, kae neʼe mole ʼuluaki ha age te ʼaselo ʼa Sehova kia Sosefo. Neʼe ʼuluaki felogoi muʼa ia mo Malia ʼo ina fakaha age ʼe ina fanauʼi anai te ʼAlo ʼo te ʼAtua. (Luka 1:26-33) Neʼe iloʼi lelei e Sehova ia Malia pea neʼe tui papau ia ʼe ʼofa mo tokaga lelei anai ki tona ʼAlo. Pea ʼe mahino ia, neʼe hoko atu pe te taupau e Malia tana felogoi mo Sehova maʼia hili te mate pea mo te fakatuʼuake ʼo Sesu.—Gaue 1:14.
21. Kotea te ʼu ako ʼe feala ke taʼofi e te ʼu tagata ʼohoana mai te faʼifaʼitaki ʼa Malia?
21 Te ʼu ako maʼa te ʼu tagata ʼohoana. Ko te tagata ʼohoana ʼae ʼe ina fakaha te poto, ʼe fiafia ia ʼi te iloʼi lelei e tona ʼohoana ia te Tohi-Tapu. ʼE mole ita anai te tagata ʼaia ki tona ʼohoana pea mo manatu ʼe ina fia puleʼi ia tona kiʼi famili. ʼE mahino kia ia, kapau ʼe iloʼi lelei e tona ʼohoana te Tohi-Tapu mo ʼana pelesepeto, ʼe feala anai ke tokoni ki tona kiʼi famili. Pea tatau aipe pe ʼe mole poto age ʼi tona ʼohoana, kae ʼe ko tona maʼua ke ina fakatuʼutuʼu te ako fakafamili pea mo tokaga ki tonatou maʼuli fakalaumalie.—Efe. 6:4.
Kotea te faʼifaʼitaki ʼe tuku mai e Malia te faʼe ʼa Sesu ki te ʼu fafine ʼohoana, ʼo ʼuhiga mo te ako pea mo te metitasio ki te Tohi-Tapu? (Vakaʼi te ʼu palakalafe 22) *
22. Kotea te ʼu ako ʼe feala ke taʼofi e te ʼu fafine ʼohoana mai te faʼifaʼitaki ʼa Malia?
22 Te ʼu ako maʼa te ʼu fafine ʼohoana. Kapau ʼe fakalogo he fafine ki tona ʼohoana, ʼe mole fakaʼuhiga leva ʼe mole kei ʼaoga ke tokaga ki tana felogoi ʼae mo Sehova. (Kal. 6:5) ʼE tonu ke ina toʼo he temi moʼo ako te Tohi-Tapu pea mo metitasio ki ai. ʼE tokoni anai te faʼahi ʼaia ke ina taupau tona ʼofa kia Sehova pea mo fakaʼapaʼapa ki ai. Pea ʼe fiafia anai ʼi te fakalogo ki tona ʼohoana.
23. Moka fakalogo he fafine ki tona ʼohoana, kotea te ʼu fua lelei ʼe maʼu e tona kiʼi famili, mo te kokelekasio pea mo ia totonu?
23 Ko te ʼu fafine ʼae ʼe fakalogo ki ʼonatou ʼohoana, ʼe natou fiafia lahi age ʼi te ʼu fafine ʼae ʼe mole fakaʼapaʼapa ki te pule ʼae neʼe fakatuʼu e Sehova. ʼE natou tuku he faʼifaʼitaki lelei ki te hahaʼi tagata mo fafine tupulaga. ʼE natou toe tokoni ke maʼu te ʼofa, mo te tokalelei ʼi tonatou kiʼi famili ʼo toe feia ʼi te kokelekasio. (Tito 2:3-5) Ia ʼaho nei ʼi te ʼu kaugana ʼa Sehova, ʼe kauga malie age te hahaʼi fafine. (Pes. 68:12) Kae ko tatou fuli, tagata mo fafine, ʼe feala ke tou tokoni ke fiafia tatatou kokelekasio. ʼI te alatike ka hoa mai, ʼe tou vakaʼi anai pe ʼe feafeaʼi hatatou tahi fakahoko te faʼahi ʼaia.
KATIKO 131 “Ko Te Meʼa ʼAe Neʼe Fakatahiʼi e Te ʼAtua”
^ pal. 5 Ko Sehova ʼe loto ke fakalogo te fafine ki tona ʼohoana. ʼO feafeaʼi? ʼE lahi te ʼu ako ʼo ʼuhiga mo te fakalogo ʼe feala ke taʼofi e he taumatuʼa mai te faʼifaʼitaki ʼa Sesu pea mo te ʼu fafine ʼae ʼe palalau ki ai te Tohi-Tapu.
^ pal. 68 FAKAMATALA ʼO TE ʼU PĀKI: ʼI te faipalalau ʼa Malia mo Elisapeta, te faʼe ʼa Soane Patita, neʼe ina fakaʼaogaʼi he ʼu vaega ʼo te Koga Tohi-Tapu Fakahepeleo neʼe ina ako fakaʼatamai.
^ pal. 70 FAKAMATALA ʼO TE ʼU PĀKI: Ko he tuagaʼane kua ʼohoana, ʼe ina toʼo he temi moʼo ako te Tohi-Tapu ke malohi tuʼumaʼu ai tana tui.