ALATIKE AKO 5
“Ko Te Pule ʼo Te Tagata Fuli ʼe Ko Kilisito”
“Ko te pule ʼo te tagata fuli ʼe ko Kilisito.”—1 KO. 11:3.
KATIKO 12 Ko Sehova Te ʼAtua Lahi
TE ʼU MANATU FAKANOUNOU *
1. Kotea ʼae ʼe feala ke mulimuli ki ai he tagata ʼi tana faʼahiga fakahoko tana pule?
KIA koe, kotea te fakaʼuhiga ʼo te kupu “pule”? Pea ʼe feafeaʼi hona fakahoko? Ko te aga ʼa ʼihi tagata ki ʼonatou ʼohoana pea mo ʼanatou fanau, ʼe mulimuli ki tanatou agaʼi fenua. ʼE ui fenei e Yanita, ʼae ʼe maʼuli ʼi Eulopa: “ ʼI te koga meʼa ʼae ʼe au maʼuli ai, tokolahi te hahaʼi ʼe natou manatu ʼe malalo age te hahaʼi fafine ia natou tagata. Pea ʼe tonu ke fakakauganaʼi.” ʼE ui fenei e Luke, te tehina ʼe maʼuli ʼi Amelika: “Ko ʼihi tamai ʼe natou akoʼi age ki ʼonatou foha, ko te manatu ʼa te hahaʼi fafine ʼe mole maʼuhiga pea ʼe mole tonu ke tokagaʼi.” Kae ko te ʼu manatu ʼaia, ʼe mole alu tahi mo te manatu ʼa Sehova. (Vakaʼi ia Maleko 7:13.) ʼE feafeaʼi he liliu ʼa he tagata ko he pule famili ʼe lelei?
2. Kotea ʼe tonu ke mahino ki ai he pule famili? Pea kotea tona tupuʼaga?
2 Kapau ʼe fia liliu he tagata ko he pule famili ʼe lelei, ʼe tonu ke mahino ki te meʼa ʼae ʼe loto e Sehova ke ina fai. Pea ʼe tonu ke toe mahino pe koʼe neʼe fakatuʼu e Sehova te pule pea mo feafeaʼi hana taʼofi ni ako mai te faʼifaʼitaki ʼa Sehova pea mo Sesu. He koʼe ʼe maʼuhiga? Koteʼuhi neʼe foaki e Sehova ki te ʼu pule famili he faʼahiga pule pea ʼe loto ia ke natou fakahoko leleiʼi te pule ʼaia.—Luka 12:48, lua koga.
TE FAKAʼUHIGA ʼO TE PULE
3. Kotea te ako ʼe tou taʼofi mai ia 1 Kolonito 11:3 ʼo ʼuhiga mo te pule?
3 Lau ia 1 Kolonito 11:3. ʼE fakamahino ʼi te vaega ʼaia, pe neʼe fakatuʼutuʼu feafeaʼi e Sehova tona famili ʼae ʼi selo mo ʼae ʼi te kele. ʼE ko ia te “pule” maʼoluga pea neʼe ina foaki ki ʼihi tagata he faʼahiga pule. Kae ko natou ʼaia, ʼe tonu pe foki ke natou mulimuli ki te ʼu fakatotonu ʼa Sehova moʼo fakahoko tanatou pule ʼaia. (Loma 14:10; Efe. 3:14, 15) Neʼe ina fakanofo ia Sesu ko te pule ʼo te kokelekasio, kae ʼe tonu kia Sesu ke mulimuli ki te ʼu fakatotonu ʼa Sehova ʼo ʼuhiga mo tana faʼahiga tokaga ʼae kia tatou. (1 Ko. 15:27) Neʼe toe foaki foki e Sehova ki te tagata ʼohoana he faʼahiga pule ki tona ʼohoana pea mo ʼana fanau. Kae ʼe tonu ke toe mulimuli mo ia ki te ʼu fakatotonu ʼa Sehova mo Sesu ʼo ʼuhiga mo tana faʼahiga tokaga ʼae ki tona kiʼi famili.—1 Pet. 3:7.
4. Kotea ʼae ʼe fai e Sehova mo Sesu ʼi tonā ʼuhiga pule?
4 ʼI tona ʼuhiga Pule famili, ʼe foaki e Sehova ni lekula ki ʼana fanau ʼae ʼi selo mo ʼae ʼi te kele pea ʼe loto ke natou mulimuli ki ai. (Esa. 33:22) ʼO toe feia mo Sesu, ʼe tuha mo ia ke ina fakatuʼu ni lekula ʼi te kokelekasio, he ʼe ko ia tona pule. Pea ʼe loto ke mulimuli te kokelekasio ki ai.—Kal. 6:2; Kol. 1:18-20.
5. Kotea ʼae ʼe feala ke fai e he pule famili Fakakilisitiano? Pea kotea te ʼu fakatuʼakoi ʼo tana pule?
5 Ohage ko Sehova mo Sesu, ʼe feala ki he pule famili Fakakilisitiano ke ina fai ni lekula maʼa tona kiʼi famili. (Loma 7:2; Efe. 6:4) Kae, ko tana pule ʼe fakatuʼakoi pe. ʼEi, ʼe tonu ki ʼana lekula ke fakatafito ki te Folafola ʼa te ʼAtua. (Taag. 3:5, 6) Pea ʼe mole tonu ke ina fakatuʼu ni lekula maʼa ʼihi ʼae ʼe mole kau ki tona kiʼi famili. (Loma 14:4) Tahi ʼae, moka kua lalahi ʼona foha mo ʼona ʼofafine pea mo mavae ʼi te loto fale, ʼe kei hoko atu pe tanatou fakaʼapaʼapaʼi ia ia, kae ʼe mole kei pule ia kia natou.—Mat. 19:5.
HE KOʼE NEʼE FAKATUʼUTUʼU E SEHOVA KE PULE NI ʼIHI?
6. He koʼe neʼe fakatuʼutuʼu e Sehova ke pule ni ʼihi?
6 Neʼe fakatuʼutuʼu e Sehova te pule koteʼuhi ʼe ʼofa ki tona famili. Ko tona meʼa ʼofa ʼaia kia tatou. ʼUhi ko te fakatuʼutuʼu ʼaia, ʼe tou gaue fakatahi ʼi te tokalelei pea mo te fakatokatoka. (1 Ko. 14:33, 40) Kapau la neʼe mole iloʼi lelei pe ko ai ʼae ʼe pule, ko te famili ʼo Sehova ʼe maveuveu pea mo lotomamahi anai. Ohage la, ʼe mole iloʼi anai pe ko ai ʼae ka ina toʼo te tonu fakaʼosi pea mo vakaʼi pe neʼe mulimuli lelei ki ai.
7. ʼO mulimuli kia Efeso 5:25, 28, ʼe loto e Sehova ke feafeaʼi te aga ʼa te hahaʼi tagata ki ʼonatou ʼohoana?
7 Kapau la ko te pule ʼe ko he meʼa ʼofa mai te ʼAtua, he koʼe ʼe lahi te ʼu fafine ʼe lotomamahi ʼi tanatou fakalogo ki te pule ʼo ʼonatou ʼohoana? He ʼe tokolahi te hahaʼi tagata ʼe mole natou mulimuli ki te ʼu lekula ʼa Sehova, kae mulimuli pe natou ki tanatou agaʼi fenua. Pea ʼe toe feala ke natou gaohi koviʼi ʼonatou ʼohoana moʼo fakafimalieʼi ʼo natou totonu. Ohage la, ʼe faiga he tagata ke ina puleʼi tona ʼohoana he ʼe fia tagata peʼe ina fia fakaha ki ʼihi tona ʼuhigaʼi tagata. ʼE lagi manatu ia ʼe mole feala ke ina fakakinauʼi tona ʼohoana ke ʼofa kia ia. Kae ʼe feala pe ke ina fai he meʼa ke mataku ai, pea mo fakaʼaogaʼi tana mataku ʼaia ke ina puleʼi ia ia. * Ko te taʼi manatu pea mo aga ʼaia, ʼe mole alu tahi mo te meʼa ʼae ʼe loto ki ai Sehova. Ko te tagata ʼohoana ʼae ʼe manatu pea mo fai te taʼi aga ʼaia, ʼe mole ina fakaha ki tona ʼohoana te fakaʼapaʼapa ʼae ʼe tuha mo ia.—Lau ia Efeso 5:25, 28.
ʼE FEAFEAʼI KI HE TAGATA ʼOHOANA HANA FAKAHOKO LELEIʼI TANA PULE?
8. ʼE feafeaʼi ki he tagata ʼohoana hana fakahoko leleiʼi tana pule?
8 ʼE feala ke lelei te pule ʼa he tagata ʼohoana moka ina faʼifaʼitakiʼi te faʼahiga pule ʼa Sehova pea mo Sesu. Koia, ʼe tou vakaʼi anai he ʼu kalitate ʼe lua, ʼe fakaha e Sehova mo Sesu. Pea ʼe tou toe vakaʼi anai pe ʼe lava fakaha feafeaʼi e he pule famili ki tona ʼohoana mo ʼana fanau te ʼu kalitate ʼaia.
9. ʼE fakaha feafeaʼi e Sehova tana agavaivai?
9 Te agavaivai. Logo la ko Sehova ʼe poto age, kae ʼe fagono lelei moka palalau age ʼana kaugana. (Sen. 18:23, 24, 32) ʼE ina fakafealagia kia natou ʼae ʼe fakalogo ki tana pule ke natou fakaha age ʼanatou manatu. (1 Hau 22:19-22) Ko Sehova ʼe haohaoa kae ʼe mole ina fakamaʼua mai ke tou fai he ʼu meʼa ʼe mole tou lavaʼi. Kae ʼe tokoni ia ki tana hahaʼi ke natou maʼuʼuli fiafia. (Pes. 113:6, 7) Pea tahi, ʼe ui ʼi te Tohi-Tapu ko Sehova ʼe ko totatou “tokoni.” (Pes. 27:9; Hep. 13:6) Neʼe ui e te Hau ko Tavite neʼe ina lava fakahoko he ʼu gaue lalahi ʼuhi he neʼe “agavaivai” ia Sehova pea neʼe tokoni ki ai.—2 Sam. 22:36, NWT.
10. Neʼe fakaha feafeaʼi e Sesu tana agavaivai?
10 Fakakaukauʼi te faʼifaʼitaki ʼa Sesu. Logo la neʼe ko ia te ʼAliki mo te Pule ʼo ʼana tisipulo, kae neʼe ina fufulu ʼonatou vaʼe. He koʼe neʼe loto e Sehova ke tuʼu ʼi te Tohi-Tapu te fakamatala ʼaia? ʼE mahino ia, neʼe loto ia ke faʼifaʼitakiʼi e te ʼu pule famili. Neʼe ui fenei e Sesu: “Neʼe au tuku atu te faʼifaʼitaki, ohage pe ko taku fai kia koutou, ke kotou toe fai feia mo koutou.” (Soa. 13:12-17) Logo la neʼe ko ia te pule, kae neʼe mole loto ia ke tauhi ia ia. Kae neʼe ina tauhi ia te hahaʼi.—Mat. 20:28.
11. ʼE lava faʼifaʼitaki feafeaʼi e he pule famili te agavaivai ʼa Sehova pea mo Sesu?
11 Kotea te ʼu ako maʼa tatou. ʼE feala ki he pule famili ke ina fakaha tana agavaivai ʼi he ʼu aluʼaga kehekehe. Ohage la, ʼe mole ina fakamaʼua age ki tona ʼohoana mo ʼana fanau ke natou fai he ʼu meʼa ʼe mole natou lavaʼi. Tatau aipe pe ʼe mole natou manatu tahi mo ia, kae ʼe fagono lelei ia ki ʼanatou manatu. ʼE ui fenei e te tuagaʼane ko Marley, ʼe maʼuli ʼi Amelika: “ ʼE mole alu tahi tuʼumaʼu taku manatu mo ʼae ʼo toku ʼohoana, kae ʼe au iloʼi ʼe ina tokagaʼi au pea mo fakaʼapaʼapa kia au. Koteʼuhi ʼe ina fia iloʼi taku manatu mo fakakaukau ki ai, ʼi muʼa ʼo hana toʼo he tonu.” Pea tahi ʼae, ko he tagata ʼohoana ʼe ina fai anai te ʼu gaue ʼo tona loto fale, tatau aipe pe ʼi te koga meʼa ʼae ʼe maʼuli ai, ʼe manatu te hahaʼi ko te hahaʼi fafine pe ʼae ʼe tonu ke natou fai te ʼu gaue ʼaia. Kae ʼe mole lagi faigafua anai kia ia. Kotea tona tupuʼaga? ʼE ui fenei e te tuagaʼane ko Rachel: “ ʼI taku agaʼi fenua, kapau ʼe tokoni he tagata ʼohoana ki te fai fulu meʼa peʼe ko te fakamaʼa ʼo te loto fale, ʼe ui anai e te ʼu vahaʼa fale peʼe ko te ʼu famili, ʼe mole ‘ko he tagata’ ia. Pea ʼe natou manatu ʼe kaugana ia ki tona ʼohoana.” Kapau ko te manatu ʼaia ʼa te hahaʼi ʼo te koga meʼa ʼae ʼe ke maʼuli
ai, ke ke manatuʼi neʼe fufulu e Sesu te ʼu vaʼe ʼo ʼana tisipulo, logo la neʼe ko he gaue neʼe tonu ke fakahoko e he kaugana. Ko he pule famili ʼe lelei, ʼe mole faiga anai ke leleiʼia ia ia e te hahaʼi, kae ʼe tokaga tafito ke maʼuli fiafia tona kiʼi famili. Koia, ko he pule famili ʼe tonu ke agavaivai. Kae kotea te tahi kalitate ʼe tonu ke ina maʼu?12. Kotea ʼae ʼe ha ai ʼe ʼofa ia Sehova mo Sesu kia tatou?
12 Te ʼofa. ʼE fai e Sehova ia meʼa fuli ʼaki te ʼofa. (1 Soa. 4:7, 8) ʼE ʼofa ia tatou he ʼe ina foaki te meʼa ʼae ʼe ʼaoga kia tatou ʼi te faʼahi fakalaumalie ʼaki tana Folafola, pea mo tana kautahi. ʼE ina fakaha ʼi tana aga mo ʼana palalau, ʼe ʼofa ia tatou. ʼE loto ke tou lotofimalie. Pea ʼe ina foaki mai te ʼu meʼa ʼae ʼe ʼaoga ʼi te faʼahi fakasino. ʼEi, ʼe ina “foaki lahi mai kia tatou te ʼu meʼa fuli ʼae ʼe tou fiafia ai.” (1 Tim. 6:17) ʼE ina fakatonutonuʼi tatou moka tou lakahala, kae ʼe hoko atu pe tona ʼofa ʼae kia tatou. Neʼe ina foaki te sakilifisio ʼo tona ʼAlo moʼo totogi ʼo tatou ʼuhi ʼae ko tona ʼofa ʼae kia tatou. Neʼe ʼofa mamahi ia Sesu kia tatou ʼo ina foaki tona maʼuli. (Soa. 3:16; 15:13) ʼE mole feala ki he meʼa ke ina fakagata te ʼofa ʼo Sehova pea mo Sesu kia natou ʼae ʼe agatonu kia naua.—Soa. 13:1; Loma 8:35, 38, 39.
13. He koʼe ʼe maʼuhiga ki he pule famili ke ina fakaha tona ʼofa ki tona kiʼi famili? (Vakaʼi mo te fakamatala ʼae ʼi te ʼa takai “ Te ʼu Meʼa ʼe Feala Ke Fai e He Tagata Neʼe Hoki ʼOhoana Ke Fakaʼapaʼapaʼi Ai e Tona ʼOhoana.”)
13 Kotea te ʼu ako maʼa tatou. ʼE fai anai e he pule famili ia meʼa fuli maʼa tona kiʼi famili ʼuhi he ʼe ʼofa ia natou. He koʼe ʼe maʼuhiga te faʼahi ʼaia? ʼE tali fenei e te apositolo ko Soane: “Ko ia ʼae ʼe mole ʼofa ki tona tehina [peʼe ko tona kiʼi famili] ʼae ʼe sio ki ai, ʼe mole feala ke ʼofa ki te ʼAtua ʼae ʼe mole sio ki ai.” (1 Soa. 4:11, 20) Ko he tagata ʼe ʼofa ki tona kiʼi famili pea mo fia faʼifaʼitakiʼi ia Sehova mo Sesu, ʼe tokaga ki tonatou maʼuli fakalaumalie, mo ina fakaha age ʼi tana aga mo ʼana palalau ʼe ʼofa ia natou, pea mo toe tokaga ki tonatou maʼuli fakasino. (1 Tim. 5:8) ʼE ina akoʼi ʼana fanau pea mo fakatonutonuʼi ia natou. ʼE faiga anai ke ina toʼo he ʼu tonu ʼe fiafia ai ia Sehova pea mo tona kiʼi famili. Tou vakavakaʼi te ʼu faʼahi takitahi ʼaia, pea mo feafeaʼi ki he pule famili ke ina faʼifaʼitakiʼi ia Sehova mo Sesu.
TE ʼU MEʼA ʼAE ʼE TONU KE FAI E HE PULE FAMILI
14. Kotea ʼae ʼe tonu ke fai e he pule famili ke tokaga ai ki te maʼuli fakalaumalie ʼo tona kiʼi famili?
14 Ke tokaga ki te maʼuli fakalaumalie ʼo tona kiʼi famili. Ohage ko Sehova, neʼe tokaga ia Sesu ke fafaga ia natou ʼae ʼe fakalogo kia ia ʼi te faʼahi fakalaumalie. (Mat. 5:3, 6; Mko. 6:34) ʼO toe feia pe mo he pule famili, ʼe tonu muʼa ke tokaga ki te maʼuli fakalaumalie ʼo tona kiʼi famili. (Tet. 6:6-9) Koia ʼe faiga anai ke ina lau mo ako te Tohi-Tapu mo tona kiʼi famili, ke natou kau ki te ʼu fono mo faifakamafola, pea mo natou maʼu he ʼu felogoi lelei mo Sehova.
15. Kotea ʼae ʼe feala ke fai e he pule famili ke logoʼi e tona kiʼi famili ʼe ʼofa ia natou?
15 Ke logoʼi e tona kiʼi famili ʼe ʼofa ia natou. Neʼe fakaha e Sehova tona ʼofa ʼae kia Sesu ia muʼa ʼo te hahaʼi. (Mat. 3:17) ʼO toe feia mo Sesu, neʼe ina fakaha ki ʼana tisipulo tona ʼofa, ʼi tana aga mo ʼana palalau. Pea neʼe natou toe fakaha mo natou tonatou ʼoʼofa ʼae kia Sesu. (Soa. 15:9, 12, 13; 21:16) ʼE feala ki he pule famili ke ina fakaha tona ʼofa ki tona kiʼi famili ʼi tana aga, ohage la ko tana ako te Tohi-Tapu mo natou. ʼE tonu foki ke ina ui age ʼe ʼofa ia natou pea ʼe natou maʼuhiga kia ia. Pea kapau ʼe ʼaoga, ʼe ina vikiʼi anai natou ia muʼa ʼo te hahaʼi.—Taag. 31:28, 29.
16. Kotea te tahi age meʼa ʼe tonu ke fai e he pule famili? Pea he koʼe ʼe tonu ke fakapotopoto?
16 Ke tokaga ki te maʼuli fakasino ʼo tona kiʼi famili. Neʼe foaki e Sehova ki te kau Iselaele te ʼu meʼa fuli ʼae neʼe ʼaoga ki tonatou maʼuli fakasino. Pea neʼe ina fai te faʼahi ʼaia maʼia pe la ʼi tana ʼosi tauteaʼi natou ʼuhi ko tanatou talagataʼa. (Tet. 2:7; 29:5) ʼE toe foaki e Sehova ia ʼaho nei te ʼu meʼa ʼae ʼe ʼaoga ki ʼana kaugana. (Mat. 6:31-33; 7:11) ʼO toe feia mo Sesu, neʼe ina fafaga te hahaʼi ʼae neʼe fagono kia ia. (Mat. 14:17-20) Neʼe toe tokaga ki tonatou malolo fakasino, pea mo fakamalolo natou. (Mat. 4:24) ʼE tonu ki he pule famili ke tokaga ki te maʼuli fakasino ʼo tona kiʼi famili ke leleiʼia ia ia e Sehova. Kae ʼe tonu ke fakapotopoto. ʼE tokaga anai ke mole lahi fau tona temi ʼae ki tana gaue, ʼo mole kei tokaga ai ki te maʼuli fakalaumalie ʼo tona kiʼi famili pea ke mole kei fakatahi ai mo natou.
17. ʼE akoʼi mo fakatonutonuʼi feafeaʼi tatou e Sehova pea mo Sesu?
17 Ke ina foaki he ʼu tokoni ʼaki te ʼofa ki tona kiʼi famili. ʼE akoʼi mo fakatonutonuʼi tatou e Sehova he ʼe loto ke tou fiafia. (Hep. 12:7-9) Ohage ko tana tamai, ʼe akoʼi e Sesu ʼaki te ʼofa ia natou ʼae ʼe fakalogo kia ia. (Soa. 15:14, 15) Logo la ʼe fakahagatonu ia Sesu moka palalau, kae ʼe agalelei ia. (Mat. 20:24-28) Pea ʼe mahino kia Sesu ʼe tou fai fuli ni lakahala he ʼe tou agahala.—Mat. 26:41.
18. Kotea ʼae ʼe tonu ke manatuʼi e he pule famili ʼe lelei?
18 Ko he pule famili ʼe ina faʼifaʼitakiʼi ia Sehova pea mo Sesu, ʼe ina manatuʼi ʼe mole haohaoa Kol. 3:19) Kae ʼe faiga ia ke mulimuli ki te pelesepeto ʼae ʼe tuʼu ia Kalate 6:1, ʼo ina fakatonutonuʼi natou “ ʼaki he agamalū.” ʼE ina toe manatuʼi ʼe toe agahala foki mo ia. Ohage ko Sesu, ʼe ina iloʼi ʼe ina akoʼi lelei anai tona kiʼi famili mo kapau ʼe ina tuku he faʼifaʼitaki lelei.—1 Pet. 2:21.
tona ʼohoana mo ʼana fanau. ʼE mole ‘ita kovi ia kia natou.’ (19-20. Ka fai e he pule famili he tonu, ʼe feafeaʼi hana faʼifaʼitakiʼi ia Sehova pea mo Sesu?
19 Ke ina toʼo he ʼu tonu ʼe fua lelei ki tona kiʼi famili. Ka fai e Sehova he ʼu tonu ʼe ina fai ke fiafia ai ʼihi. Ohage la, ʼi tana fakatupu te tagata, neʼe mole ina fai ke fua lelei pe kia ia totonu. Kae neʼe ina fia vaevae mo tatou te maʼuli. Pea neʼe mole ʼi ai he tahi neʼe ina fakakinauʼi ia ia ke ina foaki tona ʼAlo ko he sakilifisio moʼo fakamolemole ʼatatou agahala. Neʼe ina fai te faʼahi ʼaia he neʼe fia tokoni mai kia tatou. Neʼe toe fai foki e Sesu he ʼu tonu neʼe fua lelei ki ʼihi. (Loma 15:3) Ohage la, ʼi te tahi ʼaho neʼe kovi ʼosi tona gaʼegaʼe. Logo la te faʼahi ʼaia, neʼe mole alu ia ʼo malolo kae neʼe ina akoʼi te hahaʼi.—Mko. 6:31-34.
20 ʼE iloʼi e he pule famili ʼe lelei, ʼe ko tona maʼua ko te fai ʼo he ʼu tonu ʼe fua lelei ki tona kiʼi famili. ʼE mahino kia ia te maʼuhiga ʼo te faʼahi ʼaia. ʼE mole ina toʼo tokotahi pe te ʼu tonu peʼe mulimuli ki te ʼu meʼa ʼae ʼe ina logoʼi. Kae ʼe ina tuku pe ke akoʼi ia ia e Sehova. * (Taag. 2:6, 7) Koia ʼe ina kumi muʼa te meʼa ʼae ʼe lelei ki ʼihi kae mole kia ia totonu.—Flp. 2:4.
21. Kotea ʼae ka tou vakaʼi anai ʼi te alatike ka hoa mai?
21 Neʼe foaki e Sehova ki te ʼu pule famili he gaue ʼe mole faigafua. ʼE fakaʼamu ia Sehova ke natou fakahoko leleiʼi tonatou ʼuhiga pule. Kae kapau ʼe faiga he pule famili ke ina faʼifaʼitakiʼi ia Sehova pea mo Sesu, ʼe liliu anai ko he pule famili ʼe lelei. Pea kapau ʼe fakahoko e tona ʼohoana ʼona maʼua pea ʼe nā fiafia anai. Kotea te manatu ʼe tonu ke maʼu e he fafine ʼohoana ʼo ʼuhiga mo te pule ʼo tona ʼohoana? Kotea te ʼu faigataʼaʼia ʼe feala ke tau mo ia? ʼE tali anai te alatike ʼae ka hoa mai ki te ʼu fehuʼi ʼaia.
KATIKO 16 Ke Vikiʼi Sehova ʼUhi Ko Tona ʼAlo Fakanofo
^ pal. 5 Ka ʼohoana he tagata, ʼe liliu ko te pule ʼo tona kiʼi famili. ʼE tou vakaʼi anai ʼi te alatike ʼaeni pe ʼe kotea te fakaʼuhiga ʼo te pule, he koʼe neʼe fakatuʼu e Sehova te pule, pea mo te ʼu ako ʼe feala ke taʼofi e te ʼu pule famili mai te faʼifaʼitaki ʼa Sehova pea mo Sesu. Pea ʼe toe palalau anai ʼi te ʼu alatike ʼe lua ʼae ka hoa mai ki te faʼahi ʼaia. ʼE fakaha mai ʼi te lua alatike, pe ʼe kotea te ʼu ako ʼe feala ke maʼu e he taumatuʼa mai te faʼifaʼitaki ʼa Sesu pea mo ʼihi atu kaugana ʼa Sehova ʼi te Tohi-Tapu. Pea ʼi te tolu alatike leva, ʼe tou vakaʼi anai pe ʼe feafeaʼi te faʼahiga fakahoko ʼo te pule ʼi te kokelekasio.
^ pal. 7 Ko te ui ʼae ʼe lelei ki he tagata tana gaohi koviʼi tona ʼohoana, ʼe ha ʼi te televisio pea mo te ʼu ʼata. Koia, ʼe lagi manatu ai te hahaʼi ʼe mole kovi ia moka ʼe agamalohi he tagata ki tona ʼohoana.
^ pal. 20 Vakaʼi te alatike “Kotou Fai He ʼu Tonu ʼe Fakakolōliaʼi Ai Ia Te ʼAtua” ʼi Te Tule Leʼo ʼo te ʼaho 1 ʼo Apelili 2011, pasina 17-21.