1. He koʼe ʼe feala ke tou ui ʼe ko he tapuakina moʼoni tatatou kau ki te kautahi ʼa Sehova?

 ʼE KO he tapuakina moʼoni tatatou kau ki te kautahi ʼa Sehova ʼi te ʼu ʼaho fakamuli mo faigataʼa ʼaeni. Kua ʼaʼasili faigataʼa te maʼuli ʼo te malama ʼaeni, kae ʼe foaki mai e Sehova hotatou famili fakalaumalie ʼe logo tahi. (Pes. 133:1) ʼE ina fakaha mai pe ʼe feafeaʼi he fakamalohiʼi ʼo he ʼu felogoi fakafamili. (Efe. 5:33–6:1) Pea ʼe ina foaki mai te fakasiosio poto pea mo te poto ke tou logoʼi ai te tokalelei moʼoni ʼo te loto.

2. Kotea ʼae ʼe tonu ke tou fai, pea kotea tona tupuʼaga?

² ʼE tonu ke tou fai he ʼu faiga malohi ke tou haga tauhi agatonu kia Sehova. Kotea tona tupuʼaga? Koteʼuhi ʼe feala ke tou mamahi ʼuhi ko he ʼu palalau peʼe ko he ʼu aga ʼe fai e ʼihi. ʼE feala ke tou toe lotovaivai ʼosi ʼuhi pe ko ʼatatou lakahala, tafito la mo kapau ʼe tou toe fai pe. Kae ʼe tonu ke tou faʼa kataki ʼi tatatou tauhi ae kia Sehova tafito la (1) moka fakamamahiʼi tatou e he tehina peʼe ko he tuagaʼane, (2) moka fakamamahiʼi tatou e totatou hoa pea (3) moka tou mamahi pe ʼuhi ko tatou totonu. ʼI te alatike ʼaeni, ʼe tou vakaʼi anai te ʼu aluʼaga takitahi ʼaia. ʼE tou toe vakaʼi anai pe kotea ʼe feala ke tou ako mai te faʼifaʼitaki ʼo he tahi ʼi te Tohi-Tapu neʼe nofo agatonu.

KE KE FAʼA KATAKI MOKA ʼE FAKAMAMAHIʼI KOE E HE TEHINA PEʼE KO HE TUAGAʼANE

3. Kotea ia te ʼu aluʼaga faigataʼa ʼe feala ke tou tau mo ia?

³ Te fihifihia. ʼE ʼi ai te ʼu vaivaiʼaga ʼo ʼotatou tehina mo tuagaʼane ʼe fakatupu ita kia tatou. Neʼe lagi fakamamahiʼi tatou e niʼihi pe neʼe mole natou tokagaʼi mo agalelei mai kia tatou. Pea ʼe feala ki  te kau tagata ʼafea ke natou toe fai ni lakahala. Ka hoko ia te ʼu taʼi aluʼaga ʼaia, pea feala leva ki ʼihi ke mole kei natou falala ki te kautahi ʼa Sehova. ʼE feala pe ke mole kei natou fakatahi mo natou ʼae neʼe natou fakamamahiʼi natou peʼe mole kei natou kau ki te ʼu Fono. Koia, ʼe mole kei natou haga tauhi ki te ʼAtua “fakatahi” mo ʼonatou tehina mo tuagaʼane. (Sofo.  3:9) ʼE ko he aga fakapotopoto anai koa? Tou vakaʼi pe kotea ʼae ʼe feala ke tou ako mai te faʼifaʼitaki ʼo he tahi ʼi te Tohi-Tapu neʼe tau mo te taʼi fihifihia ʼaia.

4. Kotea ia te ʼu aluʼaga faigataʼa neʼe tau pea mo Paulo?

⁴ Te faʼifaʼitaki ʼi te Tohi-Tapu. Neʼe iloʼi e te apositolo ko Paulo ʼe mole haohaoa ʼona tehina mo tuagaʼane. Neʼe palalau kovi ʼihi ia natou ʼo ʼuhiga mo ia kae neʼe heʼeki fualoa tana kamata fakatahi mo te kokelekasio. (Gaue 9:26) Ki muli age, neʼe faiga ia natou ʼo te kokelekasio ke natou ʼulihi tona matagafua ʼo natou fatufatuʼi ia ia. (2 Ko. 10:10) Neʼe sio neʼe fai e he tehina ʼe nofo mo ʼona pilivilesio he tonu ʼe mole lelei, pea neʼe feala ke tukia ai te tokolahi. (Kal. 2:11, 12) Pea neʼe ʼi ai hona kauga gaue neʼe felogoi lelei mo ia, ko Maleko, neʼe ina fakamamahi ʼosi ia ia. (Gaue 15:37, 38) ʼI te ʼu aluʼaga takitahi ʼaia, neʼe feala pe ke mole toe fakatahi mo natou ʼae neʼe natou fakamamahiʼi ia ia. Kae neʼe ina taupau ia he manatu ʼe lelei ʼo ʼuhiga mo ʼona tehina mo tuagaʼane, pea neʼe maʼumaʼua ia ʼi tana tauhi kia Sehova. Kotea ʼae neʼe tokoni ki ai ke faʼa kataki?

5. Kotea ʼae neʼe tokoni kia Paulo ke lotofakamolemole ki ʼona tehina mo tuagaʼane pea ke felogoi lelei mo natou? (Kolose 3:13, 14) (Vakaʼi mo te pāki.)

⁵ Neʼe ʼofa ia Paulo ki ʼona tehina mo tuagaʼane. Pea ko tona ʼofa ʼaia kia natou neʼe tokoni ai ki ai ke ina tokagaʼi ʼonatou kalitate kae mole ko tonatou ʼuhiga agahala. Neʼe toe tokoni tona ʼofa ki ai ke ina maʼuliʼi te ʼu palalau ʼaeni neʼe ina tohi ia Kolose 3:13, 14. (Lau.) Ohage la, tou vakaʼi pe neʼe feafeaʼi te aga ʼa Paulo kia Maleko. Logo la neʼe liʼaki ia ia e Maleko ʼi tana ʼuluaki faifolau misionea, kae neʼe mole ita ia ki ai. Ki muli age, neʼe ina fai hana tohi fonu ʼi te ʼofa ki te kokelekasio ʼo Kolose, pea neʼe palalau lelei ai ʼo ʼuhiga mo Maleko. Neʼe ina ui ko hona kauga gaue maʼuhiga, “ko he tokoni malohi” kia ia. (Kol. 4:10, 11) Pea ʼi tana pilisoni ʼi Loma, neʼe ina kole tonu ke haʼu ia Maleko ʼo tokoni ki ai. (2 Tim. 4:11) ʼE mahino ia, neʼe lotofakamolemole ia Paulo ki ʼona tehina mo tuagaʼane pea neʼe felogoi lelei mo natou. Kotea te ako maʼa tatou?

6-7. ʼE feafeaʼi hatatou haga fakaha totatou ʼofa ki ʼotatou tehina mo tuagaʼane logo la tonatou ʼuhiga agahala? (1 Soane 4:7)

⁶ Te ako. ʼE loto e Sehova ke tou faʼa kataki tuʼumaʼu ʼo fakaha totatou ʼofa ki ʼotatou tehina mo tuagaʼane. (Lau 1 Soane 4:7.) Kapau ʼi he ʼaho ʼe mole fai e ʼotatou tehina mo tuagaʼane te  aga ʼae ʼe tonu ke fai e he Kilisitiano maʼa tatou, koʼe ʼe mole ke maʼu ia te manatu ʼae neʼe mole ina fia fakamamahiʼi tatou, pea neʼe mole ina fakakaukauʼi te meʼa ʼae neʼe ina fai? (Taag. 12:18) ʼE ʼofa ia Sehova ki ʼana kaugana agatonu logo la tonatou ʼuhiga agahala. Ka tou fai ni lakahala ʼe hoko atu pe tona kaumeʼa mo tatou pea ʼe mole ita ia kia tatou. (Pes. 103:9) Koia ʼe maʼuhiga ʼaupito ke tou faʼifaʼitakiʼi tatatou Tamai ʼo tou lotofakamolemole ki ʼihi.​—Efe. 4:32–5:1.

⁷ Pea tahi, ke ke manatuʼi kua ovi mai te fakaʼosi, pea ʼe tonu ke tou taupau maʼu he ʼu felogoi lelei mo ʼotatou tehina mo tuagaʼane. Tou nofo teuteu he ʼe feala ke ʼaʼasili totatou fakatagaʼi, pea ʼe feala pe ke pilisoniʼi tatou ʼuhi ko tatatou tui. Kapau ʼe hoko te fahaʼi ʼaia, pea ʼe ʼaoga lahi anai kia tatou te tokoni ʼo ʼotatou tehina mo tuagaʼane. (Taag. 17:17) Tou vakaʼi te aluʼaga neʼe hoko kia Josep, a ko he tagata ʼafea ʼe maʼuli ʼi Sepania. Ko ia mo ʼihi tehina neʼe pilisoniʼi fakatahi natou he neʼe mole natou fia olo ʼo solia. ʼE ina ui fenei: “ ʼI te pilisoni ʼe matou maʼuʼuli fakatahi fuli kae faigafua pe tamatou feiitaʼaki. Neʼe tonu ke matou fekatakiʼaki pea mo fefakamolemoleʼaki. Neʼe tokoni mai ai kia matou ke matou logo tahi pea mo fepuipuiʼaki ia matou. Pea tahi, neʼe ʼi ai foki mo he kau pilisoni ʼe mole tauhi kia Sehova. ʼI te tahi ʼaho, neʼe lavea toku nima pea neʼe simaʼi. Neʼe mole kei au lava fai ʼihi meʼa kae neʼe ʼi ai he tahi ʼi ʼoku tehina neʼe ina fo ʼoku mutuʼi meʼa, pea mo tokoni mai ʼi ʼihi atu aluʼaga. Neʼe au logoʼi ʼosi ia te ʼofa moʼoni ʼo ʼoku tehina ʼi te temi ʼae neʼe au tau ai mo he fihifihia. Koia, ʼe mole kei ʼaoga ke tou maʼu takuʼaki ʼi te temi nei.” ʼE feala pe ke tou fakatokatoka fuli ʼotatou fihifihia.

KE KE FAʼA KATAKI MOKA FAKAMAMAHIʼI KOE E TOU HOA

8. Kotea ia te ʼu fihifihia ʼe tau mo natou ʼae kua ʼohoana?

⁸ Te fihifihia. ʼE ui lelei mai ʼi te Tohi-Tapu ko natou fuli ʼae kua ʼohoana ʼe natou felaveʼi anai mo “he ʼu mamahi ʼi ʼonatou kakano,” ko tona fakaʼuhiga ʼe natou tau anai mo he ʼu fihifihia. (1 Ko. 7:28) Kotea tona tupuʼaga? Koteʼuhi ko te ʼohoana ʼe ina fakatahiʼi he foʼi toko lua ʼe heʼe haohaoa. ʼE nā tahi alu pe mo tona agaaga mo te ʼu meʼa ʼe nā leleiʼia. ʼE mole tatau ʼanā agaʼi fenua ʼo feia mo tonā faʼahiga akoʼi. Pea ʼaki te temi, ʼe feala leva ke ʼasi ʼihi aga ʼe mole lelei, neʼe mole nā sisio ki ai ʼi muʼa ʼo tanā ʼohoana. Pea ʼe feala ke hoko ai he ʼu ke ʼi tonā maʼuli fakataumatuʼa. Pea tahi, ka tau he taumatuʼa mo he ʼu fihifihia, ʼi ʼihi temi ʼe nā fetukugakoviʼiʼaki pe. Kae ʼe mole nā tahi fakaha ʼe ʼi ai tona ʼu maʼua pea mo faiga ʼo fakatokatoka ʼonā fihifihia. Pea ʼe feala leva ke nā manatu ko te puleʼaki pe ʼe tahi ke nā tahi nofo peʼe mavete. Kae, ʼe ko te puleʼaki lelei koa ʼaia? b Tou vakaʼi te faʼifaʼitaki ʼo he fafine agatonu ʼi te temi muʼa, neʼe maʼuli mamahi ʼosi ʼi tonā maʼuli fakataumatuʼa kae neʼe ina fakaha aipe te faʼa kataki.

9. Kotea te aluʼaga faigataʼa neʼe tau mo Apikaile?

⁹ Te faʼifaʼitaki ʼi te Tohi-Tapu. Neʼe ʼohoana ia Apikaile mo Napale. ʼE ui ʼi te Tohi-Tapu neʼe ko he tagata neʼe agafefeka mo agakovi. (1 Sam. 25:3) ʼE mahino ia, neʼe mole faigafua kia ia tona maʼuli mo he tagata feia. Neʼe maʼu koa e Apikaile he ʼu faigamalie ke mavete ai mo tona ʼohoana? ʼEi, neʼe ina maʼu te faigamalie ʼaia ʼi te temi ʼae neʼe fia matehi ai e Tavite, ʼae ka hau anai ki Iselaele, ia tona ʼohoana, he neʼe ina laukoviʼi ia ia pea mo ʼana tagata. (1 Sam. 25:9-13) Neʼe feala pe ke hola kae ʼe ina tuku ia Tavite ke ina fakahoko tana fakatuʼutuʼu. Kae, neʼe mole ina fai te fahaʼi ʼaia. Neʼe ina fakalotoʼi ia ia ke ʼaua naʼa ina matehi tona ʼohoana. (1 Sam. 25:23-27) Kotea ʼae neʼe ina uga ia ia ke ina fai ia te fahaʼi ʼaia?

10. Kotea ʼae neʼe ina uga ia Apikaile ke mole mavete mo tona ʼohoana logo la neʼe maʼuli mamahi?

 ¹⁰ Neʼe ʼofa ia Apikaile ia Sehova pea mo fakaʼapaʼapa ki ʼana lao ʼo ʼuhiga mo te ʼohoana. ʼE mahino ia, neʼe ina iloʼi te meʼa ʼae neʼe ui e te ʼAtua kia Atama mo Eva ʼi Tana fakatapuʼi tona ʼohoana. (Sen. 2:24) Pea neʼe mahino kia ia ko te ʼohoana neʼe taputapu kia Sehova. Neʼe ina fia fakafiafiaʼi te loto ʼo tona ʼAtua. Koia neʼe ina fai ai ia meʼa fuli ʼe ina lavaʼi moʼo haofaki tona famili, mo ʼana kaugana, ʼo feia pe mo tona ʼohoana. Neʼe foimo alu atu aipe ʼo taʼofi ia Tavite ke ʼaua naʼa ina matehi ia ia. Neʼe toe lotolelei ke alu ʼo faifakalelei ki he hala neʼe mole ina fai. Koia, neʼe ʼofa ia Sehova ʼi te fafine lototoʼa ʼaia, pea mo ʼofa moʼoni. Kotea te ako ʼe feala ke taʼofi e te ʼu tagata mo fafine ʼohoana mai te faʼifaʼitaki ʼo Apikaile?

11. (1) Kotea ʼae ʼe loto e Sehova ke fai e te hahaʼi ʼohoana? (Efeso 5:33) (2) Kotea ʼae neʼe ke ako mai te faʼahiga fai ʼa Carmen ki te haofaki ʼo tona maʼuli fakataumatuʼa? (Vakaʼi mo te pāki.)

¹¹ Te ako. ʼE loto e Sehova ke fakaʼapaʼapa te hahaʼi ʼohoana ki te fakapapau ʼae neʼe natou fai ʼi te ʼaho ʼae neʼe natou ʼohoana ai, maʼia pe ʼe mole faigafua te maʼuli mo he tahi ia naua. ʼE fiafia ia ʼi tana sio ki te ʼu faiga ʼe fai e te taumatuʼa moʼo fakatokatoka ʼona fihifihia, mo tanā fefakahaʼaki he ʼofa ʼe moʼoni, pea mo fefakaʼapaʼapaʼaki. (Lau ia Efeso 5:33.) Tou vakaʼi te faʼifaʼitaki ʼo Carmen. Hili pe taʼu ʼe ono ki tanā ʼohoana, neʼe ina ako leva te Tohi-Tapu mo te kau Fakamoʼoni ʼa Sehova, pea neʼe papitema leva. ʼE ina ui fenei: “Neʼe mole leleiʼia ʼosi e toku ʼohoana te tonu ʼae neʼe au fai. Neʼe maheka ʼo ʼuhiga mo Sehova. Neʼe ina tauveleʼi au mo fakamatakuʼi au ʼo ina ui mai ʼe alu anai.” Logo la te ʼu fahaʼi ʼaia, kae neʼe faʼa kataki aipe ia Carmen. Lolotoga taʼu ʼe 50, neʼe ina fai he ʼu faiga malohi ke ʼofa mo fakaʼapaʼapa ki tona ʼohoana. ʼE ina toe ui fenei: “ ʼAki te temi, neʼe au ako ke toe lahi age taku maʼu te fakasiosio poto pea mo palalau ʼaki he aga fakaʼeteʼete ki toku ʼohoana. Neʼe au fai ia meʼa fuli ke tologa toku ʼohoana he neʼe au iloʼi ko te ʼohoana ʼe taputapu kia mata ʼo Sehova. Pea neʼe au ʼofa ʼi toku ʼAtua koia ʼae neʼe mole au holomuli ai.” c Kapau ʼe hoko ʼi tou maʼuli fakataumatuʼa ni fihifihia, ʼe ke tui papau ʼe lagolago atu anai ia Sehova pea mo tokoni atu anai ke ke faʼa kataki.

KE KE FAʼA KATAKI MOKA KE MAMAHI PE ʼUHI KO KOE TOTONU

12. Kapau ʼe tou fai ia he agalala mamafa, kotea ia te aluʼaga ʼae ʼe feala ke tou logoʼi?

¹² Te fihifihia. ʼE feala ke ke lotovaivai ʼosi mo kapau neʼe ke fai he agahala mamafa. Koia, ʼe ui ʼi te Tohi-Tapu ʼe feala pe ke tou mamahi ʼuhi ko ʼatatou agahala. (Pes. 51:17) Lolotoga ni taʼu, neʼe faiga malohi te tehina ʼaeni ko Robert ke liliu ko he tagata faifekau fakaminisitelio. Kae neʼe ina fai he agahala mamafa pea neʼe mahino kia ia neʼe ina kakaʼi ia Sehova. ʼE ina ui fenei: “Neʼe  vevele ʼosi toku leʼo ʼo loto ʼi taku iloʼi te meʼa ʼae neʼe au fai. Neʼe mole kei lelei ʼosi he meʼa kia au. Neʼe au tagi mamahi ʼosi kia Sehova. Neʼe au manatu ʼe mole toe fagono mai anai ki ʼaku kole. He koʼe ʼe ina fakahoko anai te fahaʼi ʼaia, kae neʼe au liʼaki ia ia?” Kapau neʼe ke fai he agahala mamafa, ʼe feala ke ke lotomamahi ʼosi, ʼo ke manatu leva kua liʼaki koe e Sehova. Koia ʼe mole kei he ʼuhiga ʼo tau tauhi kia te ia. (Pes. 38:4) Kapau koia, pea ke manatuʼi ia te faʼifaʼitaki ʼa te apositolo ko Petelo. Neʼe ko he tagata agatonu pea neʼe faʼa kataki ʼi tana tauhi ʼae kia Sehova ʼi tana ʼosi fai ia he agahala mamafa.

13. Kotea ia te agahala mamafa neʼe fai e Petelo? Pea kotea ʼae neʼe tupu ai tana fai ia te fahaʼi ʼaia?

¹³ Te faʼifaʼitaki ʼi te Tohi-Tapu. ʼI te po ʼi muʼa ʼo te matehi ʼo Sesu, neʼe lahi te ʼu lakahala neʼe fai e Petelo ʼo tupu ai ia tana fai he agahala mamafa. ʼUluaki, neʼe falala fau kia ia. Neʼe ina ui kapau ʼe liʼaki e ʼihi apositolo ia Sesu, kae ko ia ia ʼe nofo agatonu pe anai kia te ia. (Mko. 14:27-29) Pea ʼi te ʼoloto ʼo Setesemani, neʼe mole nofo ʼalaʼala, neʼe tuʼa lahi ia tana moe. (Mko. 14:32, 37-41) Hili ʼaia, ʼi te ʼomai ʼa he hahaʼi kauga malie ʼo puke ia Sesu, neʼe ina liʼaki ia ia. (Mko. 14:50) Pea neʼe fakafisi tuʼa tolu leva ʼo ina fakapapauʼi age ʼe mole ina iloʼi ia Sesu. (Mko 14:66-71) Kotea ʼae neʼe fai e Petelo ʼi tana iloʼi ʼae neʼe ina fai he agahala mamafa? ʼE mahino ia, neʼe lotomamahi ʼosi he neʼe ina tukugakoviʼi pe ia ia totonu pea neʼe tagi mamahi. (Mko. 14:72) Fakakaukauʼi age muʼa ia tana lotohoha ʼi te matehi ʼo tona kaumeʼa ko Sesu ʼi ni kiʼi hola pe ki ʼamuli. ʼE mahino ia, neʼe ina logoʼi ʼe mole kei hona ʼuhiga.

14. Kotea ʼae neʼe tokoni kia Petelo ke faʼa kataki ʼi tana tauhi ʼae kia Sehova? (Vakaʼi mo te pāki ʼo )

¹⁴ Kae neʼe lahi te ʼu tupuʼaga neʼe faʼa kataki ai Petelo ʼi tana tauhi ʼae kia Sehova. Tou tokagaʼi neʼe mole nofo tokotahi. Kae neʼe faiga pe ke fakatahi mo ʼona tehina, pea ʼe mahino ia neʼe natou fakalotomalohiʼi ia ia. (Luka 24:33) Pea tahi, neʼe ha ia Sesu kia ia hili tona fakatuʼuake moʼo fakalotomalohiʼi ia ia. (Luka 24:34; 1 Ko. 15:5) Pea neʼe mole valokiʼi ia ia e Sesu kae neʼe ina fakamahino age ʼe foaki anai kia ia ia he ʼu toe gaue maʼuhiga. (Soa. 21:15-17) Neʼe iloʼi e Petelo neʼe ina fai he agahala mamafa, kae neʼe mole ina ui ʼe mole kei ʼi ai he puleʼaki ke fai maʼa ia. Kotea tona tupuʼaga? Neʼe ina iloʼi papau neʼe mole feia te sio ʼa tona Pule ko Sesu kia ia. Neʼe lagolago ʼona tehina kia ia. Kotea te ako ʼe tou taʼofi mai tana faʼifaʼitaki?

15. Kotea ʼae ʼe loto e Sehova ke tou tui papau ki ai? (Pesalemo 86:5; Loma 8:38, 39) (Vakaʼi mo te pāki.)

¹⁵ Te ako. ʼE loto e Sehova ke tou tui papau ʼe ʼofa ia tatou pea ʼe lotofakamolemole mai. (Lau ia Pesalemo 86:5; Loma 8:38, 39.) Ka tou agahala ʼe tou tukugakoviʼi pe ia tatou totonu. ʼE ko te ʼuhiga ia pea ʼe ko he meʼa lelei. Kae ʼaua naʼa tou manatu ʼe mole kei tuha ia ke ʼofaʼinaʼi tatou  peʼe ke fakamolemole mai he tahi. Kae ʼe tonu ke tou foimo kumi tokoni. ʼE ui fenei e Robert ʼae neʼe tou talanoa ki ai ʼi muʼa atu: “Neʼe au agahala he neʼe au falala pe au ki toku malohi fakatagata ʼe au lava tekeʼi anai te fakahala.” Neʼe mahino leva ʼe tonu ke palalau ki te kau tagata ʼafea. Neʼe ina hoko atu fenei: “ ʼI taku fai te fahaʼi ʼaia, neʼe au logoʼi atu aipe te ʼofa ʼo Sehova ʼae neʼe ina fakaha mai ʼaki ia natou. Neʼe natou tokoni mai pea ʼaki ʼanatou palalau neʼe au tui papau ai neʼe mole liʼaki au e Sehova.” ʼE feala mo tatou ke tou tui papau ʼe ʼofa mamahi Sehova ia tatou. ʼE fakamolemole mai moka ʼe tou fakahemala, ʼe tou kumi te tokoni ʼae ʼe ʼaoga kia tatou pea ʼe tou faiga fakamalotoloto ke ʼaua naʼa tou toe fai pe ʼatatou lakahala. (1 Soa. 1:8, 9) Kapau ʼe tou tui papau ki te fahaʼi ʼaia, ʼe hoko atu pe anai tatatou tauhi ki totatou ʼAtua maʼia pe neʼe tou fai he lakahala.

16. He koʼe ʼe ke fakatotonu ke ke faʼa kataki ʼi tau tauhi ʼae kia Sehova?

¹⁶ ʼE fiafia ia Sehova ʼi te ʼu faiga malohi ʼe tou fai ke tou tauhi kia te ia ʼi te ʼu ʼaho fakamuli mo faigataʼa ʼaeni. ʼAki tana tokoni, ʼe feala ke tou faʼa kataki logo la te ʼu mamahi. ʼE feala ke tou haga ʼoʼofa ki ʼotatou tehina mo tuagaʼane pea mo lotofakamolemole kia natou moka ʼe natou fakamamahiʼi tatou. ʼE feala ke tou toe fakaha totatou ʼofa ki totatou ʼAtua pea mo fakaʼapaʼapa ki te ʼohoana ʼae ko he fakatuʼutuʼu taputapu. ʼO feafeaʼi? ʼO tou fai ia meʼa fuli ke tou fakatokatoka ʼotatou fihifihia fakataumatuʼa. Pea kapau ʼe tou fai he agahala, tou kumi te tokoni ʼa Sehova, mo tali tona ʼofa, mo tana fakamolemole pea mo hoko atu tatatou tauhi kia te ia. Pea ʼe tou tui papau ʼe ina tapuakinaʼi anai tatou mo kapau ʼe mole “tou tuku te fai ʼo te meʼa ʼae ʼe lelei.”​—Kal. 6:9.