1. Kotea ʼae ʼe lotolotolua ai ʼi ʼihi temi ia te ʼu kaugana agatonu ʼa Sehova?

 ʼE FAKALOTOFIMALIE tatatou iloʼi ʼae ʼe fiafia ia Sehova ʼo ʼuhiga mo ʼana kaugana fuli. Koia, ʼe ui fenei ʼi te Tohi-Tapu: “ ʼE ʼofa ia Sehova ʼi tana hahaʼi.” (Pes. 149:4) Kae ʼi ʼihi temi ʼe feuiʼaki e ʼihi moka ʼe natou lotovaivai: ‘ ʼE fiafia koa ia Sehova ʼo ʼuhiga mo au?’ ʼI te temi muʼa, tokolahi te ʼu kaugana ʼa Sehova neʼe natou lotolotolua feia.​—1 Sam. 1:6-10; Sopo 29:2, 4; Pes. 51:11.

2. Ko ai ʼae ʼe fiafia ki ai ia Sehova?

² ʼE fakaha lelei ʼi te Tohi-Tapu logo la totatou ʼuhiga agahala kae ʼe feala ke fiafia te ʼAtua ʼo ʼuhiga mo tatou. Kotea ʼae ʼe tonu ke tou fai? ʼE tonu ke tou tui kia Sesu pea mo papitema. (Soa. 3:16) ʼAki te papitema, ʼe tou fakaha ki te kauga malie kua tou fakahemala ki ʼatatou agahala pea neʼe tou fakapapau ki te ʼAtua ʼe tou fai anai tona finegalo. (Gaue 2:38; 3:19) ʼE fiafia ʼosi ia Sehova ʼi tana sio mai ʼae ʼe tou fakahoko te ʼu aluaga ʼaia ke tou liliu ai ko hona ʼu kaumeʼa. Kapau ʼe tou fai te ʼu meʼa ʼae ʼe tou lavaʼi moʼo fakahoko tatatou fakapapau, pea ʼe fiafia anai ia Sehova ʼo ʼuhiga mo tatou pea mo tou maʼu anai he ʼu felogoi lelei mo ia.​—Pes. 25:14.

3. Kotea ʼae ka tou vakaʼi ʼi te alatike ʼaeni?

³ Logo la te ʼu fahaʼi ʼaia, kae he koʼe ʼe manatu ʼihi ʼe mole fiafia ia Sehova ʼo ʼuhiga mo natou? ʼE fakaha feafeaʼi mai e Sehova ʼe fiafia ʼo ʼuhiga mo tatou? Pea kotea ʼe feala ke fai e he tehina ke tui moʼoni ʼe fiafia ia Sehova ʼo ʼuhiga mo ia?

 HE KOʼE ʼE MANATU ʼIHI ʼE MOLE FIAFIA IA SEHOVA ʼO ʼUHIGA MO NATOU?

4-5. Logo la neʼe ke maʼu he ʼu manatu ʼe mole lelei ʼo ʼuhiga mo koe totonu, kae kotea ʼae ʼe feala ke ke tui papau ki ai?

⁴ Tokolahi ia tatou ʼe tou tauʼi he ʼu manatu ʼe mole lelei ʼo ʼuhiga mo tatou totonu talu mai tatatou kei veliveli. (Pes. 88:15) ʼE ui ui fenei e te tehina ko Adrián: “Neʼe au logoʼi tuʼumaʼu ʼe mole hoku ʼuhiga. ʼI taku kei veliveli, neʼe au faikole ke nofo toku kiʼi famili ʼi te Palatiso, kae neʼe au tui papau au ʼe mole tuha ia mo au ke au nofo ai.” ʼE ui fenei e Tony ʼae neʼe lahilahi ake ʼi he loto fale mole tauhi kia Sehova: “Neʼe mole he temi neʼe ui mai ai e ʼaku matuʼā ʼe nā ʼoʼofa ia au, peʼe nā fiafia ʼo ʼuhiga mo au. Koia neʼe au manatu ai mole fiafia naua moka au fai he meʼa.”

⁵ Kapau ʼe ke tauʼi te manatu ʼae ʼe mole hou ʼuhiga, ke ke manatuʼi ʼe ko Sehova totonu ʼae neʼe ina taki mai koe kia te ia. (Soa. 6:44) ʼE sio ia ki te meʼa ʼae ʼe lelei ia koe kae lagi ʼe mole ke iloʼi koe pea ʼe ina iloʼi lelei ia koe. (1 Sam. 16:7; 2 Klk. 6:30) Koia ke ke tui kia te ia moka ʼe ina ui atu ʼe ke maʼuhiga kia te ia.​—1 Soa. 3:19, 20.  

6. Kotea ia te manatu ʼae neʼe maʼu e Paulo ʼo ʼuhiga mo ia totonu?

⁶ ʼE tukugakoviʼi e ʼihi ia natou totonu ʼo natou manatu ki te meʼa ʼae neʼe natou fai ʼi muʼa ʼo tanatou iloʼi ia te moʼoni. (1 Pet. 4:3) Pea ʼe ʼi ai pe la mo he ʼu tehina mo tuagaʼane ʼe natou tauʼi honatou ʼu vaivaiʼaga. Kae feafeaʼi kia koe? ʼE tauteaʼi koa koe e tou loto? Kapau koia, manatuʼi ʼe mole ko koe pe, neʼe ʼi ai ʼihi kaugana ʼa Sehova neʼe natou toe logoʼi pe te fahaʼi ʼaia. Ohage la, neʼe ui e te apositolo ko Paulo ko he tagata fakaʼofaʼofa moka ʼe manatu ki ʼona vaivaiʼaga. (Loma 7:24) ʼE moʼoni, neʼe fakahemala ki ʼana agahala pea mo papitema. Kae neʼe ina ui ʼe ko ia “ ʼae ʼe veliveli ʼosi ʼi te kau apositolo” pea ʼe “kovi age” ia ʼi te kau agahala.​—1 Ko. 15:9; 1 Tim. 1:15.

7. Kotea ʼae ʼe tonu ke tou manatuʼi tuʼumaʼu ʼo ʼuhiga mo ʼatatou agahala ʼae neʼe tou fai ʼi muʼa atu?

⁷ Kapau ʼe tou fakahemala pea ʼe fakapapau mai e tatatou Tamai ʼae ʼe ʼi selo ʼe fakamolemole mai anai. (Pes. 86:5) Koia kapau ʼe ke fakahemala moʼoni ki ʼau agahala ʼae neʼe ke fai ʼi muʼa atu, ke ke tui papau kua fakamolemole atu e Sehova.​—Kol. 2:13.

8-9. ʼE feafeaʼi hau liʼaki te manatu ʼae ʼe mole ke feʼaugaʼia anai te meʼa ʼe ke fai moʼo fakafiafiaʼi ia Sehova?

⁸ ʼE tou fia fai ia meʼa fuli ʼe tou lavaʼi moʼo tauhi kia Sehova. Kae ʼe manatu ʼihi ʼe mole natou feʼaugaʼia te meʼa ʼae ʼe natou fai ke fiafia ai ia Sehova ʼo ʼuhiga mo natou. ʼE ui fenei e te tuagaʼane ko Amanda: “Neʼe au manatu tuʼumaʼu kapau ʼe au fia foaki ia te meʼa ʼae ʼe lelei tukupau maʼa Sehova pea ʼe tonu ke lahi age tuʼumaʼu te ʼu meʼa au fai maʼa ia. Koia ʼae ʼe au faiga tuʼumaʼu ke lahi age te meʼa au fai kae au sio atu pe mole au lavaʼi. Ka au mole au lavaʼi, ʼe au ita pe kia au pea mo au feuiʼaki ʼe toe maʼu e Sehova te manatu ʼaia.”

⁹ ʼE feafeaʼi hau liʼaki te manatu ʼae ʼe mole ke feʼaugaʼia anai te meʼa ʼae ʼe ke fai moʼo fakafiafiaʼi ia Sehova? Ke ke manatuʼi ʼe mole fefeka fau ia Sehova ʼo ina fakamaʼua mai he meʼa ke tou fai ʼe mole tou lavaʼi. Ko te maʼuhiga ke ke fai te meʼa ʼae ʼe ke lavaʼi he ʼe ina leleiʼia te ʼu meʼa fuli ʼe ke foaki age kia te ia. ʼE feala hau toe metitasio ki te faʼifaʼitaki ʼo ni hahaʼi ʼi te Tohi-Tapu, neʼe natou tauhi kia Sehova mo tonatou loto katoa. Ohage la ko Paulo. Lolotoga ni taʼu, neʼe alu ia kilometa ʼe lauʼi afe pea neʼe lahi te ʼu kokelekasio neʼe ina fakatuʼu. Kae ʼi te fetogi leva ʼo tona aluʼaga pea mo tana mole kei lava faifakamafola ohage ko te temi muʼa, neʼe mole kei fiafia koa ia Sehova ʼo ʼuhiga mo ia? Kailoa. Neʼe ina haga fai pe te meʼa ʼae neʼe ina lavaʼi. Koia, neʼe tapuakiʼi ai e  Sehova. (Gaue 28:30, 31) ʼE toe feia pe, ʼe feala ke fetogi te meʼa ʼae ʼe ke lava foaki kia Sehova. Kae ko te meʼa ʼae ʼe maʼuhiga kia te ia, ʼe ko te tupuʼaga ʼo tau fai ia te ʼu fahaʼi ʼaia. Tou vakaʼi leva he ʼu aluʼaga ʼe fakaha ai e Sehova ia tona fiafia.

ʼE FAKAHA FEAFEAʼI E SEHOVA TONA FIAFIA?

10. ʼE feafeaʼi hau ‘logo’ ki he ui atu e Sehova ʼe fiafia ʼo ʼuhiga mo koe? (Soane 16:27)

¹⁰ ʼAki te Tohi-Tapu. Neʼe fakaha e Sehova ia tona fiafia kia natou ʼae ʼe ʼofa ai. Neʼe tuʼa lua ia tana ui ko Sesu ʼe ko tona ʼAlo Tona ʼofaina ʼae ʼe fiafia ai. (Mat. 3:17; 17:5) ʼE ke loto koa ke ui atu e Sehova ʼe fiafia ʼo ʼuhiga mo koe? ʼE mole palalau fakahagatonu atu ia Sehova kae ʼe ina fakaʼaogaʼi ia tana Folafola. ʼE feala ke ke ‘logo’ ki hana ui atu ʼe fiafia ʼo ʼuhiga mo koe moka ke lau te ʼu palalau neʼe fai e Sesu ʼi te ʼu Evaselio. (Lau ia Soane 16:27.) Ko te agaaga ʼo Sesu neʼe ko te ʼata lelei pe ʼaia ʼo tana Tamai. Neʼe tuʼa lahi te ui e Sesu ki ʼana tisipulo agatonu mo heʼe haohaoa ʼe fiafia ʼo ʼuhiga mo natou. Ka ke lau ʼana palalau pea ʼe feala hau fakakaukauʼi ʼe ko Sehova pe ʼae ʼe ina fai atu te ʼu palalau ʼaia kia koe.​—Soa. 15:9, 15.

11. He koʼe ʼe mole tonu ke ke manatu ka ke tau mo ni ʼahiʼahi pea ʼe mole kei fiafia ia Sehova ʼo ʼuhiga mo koe? (Sakopo 1:12)

¹¹ ʼAki ʼana gaue. ʼE fia tokoni mai ia Sehova ʼo ina foaki mai te ʼu meʼa ʼe aoga kia tatou ʼi te faʼahi fakasino. ʼI ʼihi temi, ʼe ina tuku ke tou tau mo ni ʼahiʼahi ohage ko tana fai kia Sopo. (Sopo 1:8-11) Kae ʼe mole fakaʼuhiga leva ka ke tau mo ni ʼahiʼahi, pea ʼe mole kei fiafia ia Sehova ʼo ʼuhiga mo koe. Kae ʼe ko he faigamalie ʼaia ke ke fakaha ʼe ke ʼofa pea mo falala kia te ia. (Lau ia Sakopo 1:12.) Pea ʼe ko he tahi faigamalie ʼaia ke ke sio ʼe ʼofa ia Sehova ia koe pea ʼe tokoni atu.

12. Kotea ʼae ʼe ke ako mai te faʼifaʼitaki ʼa Dmitri?

¹² Tou vakaʼi te faʼifaʼitaki ʼa Dmitri ko he tehina mai Asia. Neʼe mole kei gaue pea neʼe faigataʼa kia ia hana toe maʼu atu aipe hana tahi gaue. Koia neʼe ina fakatotonu ai ke tuku tana falala kia Sehova. ʼO feafeaʼi? ʼAki tana fakaʼaogaʼi lahi tona temi ki te faifakamafola. Neʼe fakalaka te ʼu mahina pea neʼe heʼeki maʼu hana gaue. Pea neʼe mahaki leva ʼo tuku lalo. Neʼe ina kamata feuiʼaki leva ʼe mole kei ina fakahoko lelei tona ʼuhiga tagata ʼohoana pea mo tamai. Pea neʼe manatu ʼe mole kei fiafia ia Sehova ʼo ʼuhiga mo ia. ʼI te tahi po, neʼe toho e  siʼona ʼofafine he pepa ʼe tuʼu ai te vaega ʼo Esaia 30:15: “ ʼE kotou malolohi anai mo kapau ʼe mole kotou hoha kae ʼe kotou falala.” Pea neʼe alu avage ki ai kae takoto ʼi te palepale, neʼe ina ui fenei age: “Papa, ko te ʼaho ʼae ʼe ke nofo ai mo he ʼu manatu ʼe mole lelei, pea ʼe ke maʼu anai he fakalotofimalie ʼi te vaega ʼaeni.” Neʼe mahino kia Dmitrii neʼe maʼu tuʼumaʼu pe te kiʼi famili hanatou meʼa kai mo honatou meʼa laofi mo ʼonatou nofoʼaga ʼuhi ko Sehova. ʼE ina ui fenei: “Ko te meʼa ʼae neʼe tonu ke au fai, ke mole au hoha kae ke au haga falala pe ki siʼoku ʼAtua.” Kapau ʼe ke tau mo he aluʼaga feia ke ke tui papau ʼe tokaga moʼoni ia Sehova kia koe pea ʼe tokoni atu anai ke ke faʼa kataki.

13. Ko ai ʼae ʼe fakaʼaogaʼi e Sehova ke tou iloʼi ʼe fiafia ʼo ʼuhiga mo tatou? Pea ʼe ina fakahoko feafeaʼi te fahaʼi ʼaia?

¹³ ʼAki ʼotatou tehina mo tuagaʼane. ʼE fakaʼaogaʼi e Sehova ʼotatou tehina mo tuagaʼane ke tou logoʼi ai ia tona ʼofa ʼae kia tatou. Ohage la, ʼe feala ke ina uga natou ke natou fai mai he ʼu palalau fakalotomalohi ʼi tona temi totonu. Ko te aluʼaga ʼaia neʼe hoko ki he tuagaʼane ʼi Asia. Neʼe mole kei gaue pea neʼe mahaki kovi leva. Neʼe fai leva e tona ʼohoana he agahala mamafa pea neʼe mole kei tagata ʼafea. Neʼe ina ui fenei: “Neʼe mole au mahino pe koʼe neʼe hoko fuli mai kia au te ʼu fahaʼi ʼaia. Neʼe au manatu neʼe lagi au fai he meʼa ʼe kovi pea ʼe mole kei fiafia ia Sehova ʼo ʼuhiga mo au.” Neʼe tagi mamahi kia Sehova ke ina fakalotofimalieʼi ia ia. Neʼe tali feafeaʼi age ia Sehova ki ai? ʼE ina ui fenei: “Neʼe fakalotofimalieʼi au e te kau tagata ʼafea pea mo tokoni mai ke au mahino ʼe ʼofa ia Sehova ia au.” Ki muli age, neʼe ina toe kole kia Sehova ke ina fakalotofimalieʼi ia ia. ʼE ina fakamatala fenei: “ ʼI te ʼaho pe ʼaia, neʼe au maʼu he tohi fakalotomalohi mai he ʼu tehina mo tuagaʼane. ʼI taku lau te tohi ʼaia, neʼe toe malohi age taku tui ʼae ʼe fagono mai ia  Sehova.” Koia ʼe fakaʼaogaʼi tuʼumaʼu e Sehova ʼana kaugana moʼo fakaha mai ʼe fiafia ia ʼo ʼuhiga mo tatou.​—Pes. 10:17.

14. ʼE toe fakaha feafeaʼi e Sehova ia tona fiafia ʼae ʼo ʼuhiga mo tatou?

¹⁴ ʼE toe fakaha e Sehova tona fiafia ʼaki ia te ʼu tokoni ʼe foaki mai e ʼotatou tehina mo tuagaʼane. Ohage la, ʼi te ʼuluaki sekulo neʼe fakaʼaogaʼi e Sehova ia Paulo ke ina tohi ia tohi ʼe 14 ki te ʼu kokelekasio. ʼE maʼu ʼi te ʼu tohi ʼaia, he ʼu tokoni neʼe foaki fakahagatonu pea mo fonu ʼi te ʼofa. He koʼe neʼe uga e Sehova ia Paulo ke ina foaki te ʼu tokoni ʼaia? Koteʼuhi ʼi tona ʼuhiga Tamai agalelei ʼe ina fakatotonuʼi ʼana fanau “ ʼofaina.” (Taag. 3:11, 12) Koia ka fai atu he tokoni ʼe fakatafito ki te Tohi-Tapu pea ʼe ko he fakamoʼoni lelei ʼaia ʼe fiafia ai ia Sehova ʼo ʼuhiga mo koe. (Hep. 12:6) Kotea ʼihi atu aluʼaga ʼe ha ai ʼe fiafia ia Sehova ʼo ʼuhiga mo tatou?

KO ʼIHI FAKAMOʼONI ʼO TE FIAFIA ʼO SEHOVA

15. Ko ai ʼe foaki ki ai e Sehova tona laumalie maʼoniʼoni? Pea he koʼe ʼe fakalotofimalie kia tatou?

¹⁵ ʼE foaki e Sehova ia tona laumalie maʼoniʼoni kia natou ʼae ʼe fiafia ai. (Mat. 12:18) ʼE feala ke tou feuiʼaki fenei: ‘Neʼe au lava fakaha koa ʼihi kalitate ʼo te laumalie maʼoniʼoni?’ Ohage la, lagi neʼe ke tokagaʼi kua ke faʼa kataki age mo ʼihi ʼi muʼa ʼo tau iloʼi ia Sehova? Koia kapau ʼe ke fakaha ia te ʼu kalitate ʼo te fua ʼo te laumalie , pea ko te laumalie ʼaia ʼe gaue ia koe. Koia ʼe fiafia ia Sehova ʼo ʼuhiga mo koe. Vakaʼi te ʼa takai “ Ko Te Fua ʼo Te Laumalie ʼe . . . ”

16. Ko ai ʼae ʼe foaki ki ai e Sehova te gaue ʼae ʼe ko te tala ʼo te logo lelei? Pea kotea te fahaʼi ʼae ʼe ke logoʼi? (1 Tesalonika 2:4)

¹⁶ Neʼe tuku e Sehova ia te gaue ʼae ko te tala ʼo te logo lelei kia natou ʼae ʼe fiafia. (Lau ia 1 Tesalonika 2:4.) Tou vakaʼi pe neʼe fua lelei feafeaʼi ki totatou tuagaʼane ko Jocelyn ia te faifakamafola. ʼI te tahi ʼaho, neʼe ʼala ake mo he ʼu manatu fakalotovaivai. ʼE ina ui fenei: “Neʼe mole kei ai hoku malohi pea neʼe au logoʼi mole hoku ʼuhiga. Kae neʼe au pionie pea ʼi te ʼaho ʼaia, neʼe au fakatuʼutuʼu ke au alu ʼo faifakamafola. Koia neʼe au faikole ai pea neʼe au alu.” ʼI te uhu ʼaia, neʼe au felaveʼi mo Mary, ko he fafine agalelei neʼe ina tali ke ina fai hana ako. Hili ki ai ni mahina, neʼe ui age e Mary neʼe lolotoga faikole ki te ʼAtua ke tokoni age pea mo tana tukituki age ʼi tona matapa. ʼI te iloʼi e Jocelyn te fahaʼi ʼaia, kotea ʼae neʼe ina logoʼi? ʼE ina ui fenei: “Neʼe hage pe neʼe ui fenei  mai e Sehova kia au: ‘ ʼE au fiafia ʼo ʼuhiga mo koe.’ ” ʼE mahino ia, ʼe mole tali anai e te hahaʼi fuli te logo ʼae ʼe tou tala. Kae ʼe feala hau tui papau, ʼe fiafia ia Sehova ʼi tana sio ʼae ʼe ke fai ia meʼa fuli ke ke tala te logo lelei.

17. Kotea ʼae ʼe tou ako mai te faʼifaʼitaki ʼa Vicky? (Pesalemo 5:12)

¹⁷ ʼE foaki e Sehova ia te ʼu lelei ʼo te sakilifisio ʼa Sesu kia natou ʼae ʼe fiafia ai. (1 Tim. 2:5, 6) Kotea ʼe feala ke ke fai mo kapau ʼe ke tui ki te totogi pea mo kua ke papitema? Kae ʼe faigataʼa tau tui ʼe fiafia ia Sehova ʼo ʼuhiga mo koe. ʼAua naʼa galo kia koe ʼe tonu ʼi ʼihi temi ke tou tokakaga ki te ʼu meʼa ʼae ʼe tou logoʼi. Kae ʼe feala pe ke tou falala kia Sehova. ʼE faitotonu kia te ia ia natou ʼae ʼe tui ki te totogi pea ʼe ina fakapapau ʼe ina tapuakiʼi ia natou ʼaia. (Lau ia Pesalemo 5:12; Loma 3:26) Ka fakakaukauʼi e Vicky ia te totogi pea neʼe tokoni lahi kia ia. ʼE ina ui fenei: “Neʼe mahino kia au neʼe faʼa kataki ʼosi ia Sehova ʼo ʼuhiga mo au. . . . Kae neʼe hage pe neʼe au ui kia Sehova: ‘ ʼE mole feala ke ke ʼofa ki he tahi ohage ko au. ʼE mole feala ki te sakilifisio ʼo tou ʼAlo ke ina ʼuʼufi ʼaku agahala.’ ” ʼI tana metitasio ki te meʼa ʼofa ʼae ko te totogi neʼe ko tana hoki logoʼi ʼaia te ʼofa ʼo Sehova. ʼE toe feia pe mo koe, ʼe feala hau logoʼi ʼe ʼofainaʼi koe pea ʼe fiafia ia Sehova ʼo ʼuhiga mo koe moka ʼe ke fakakaukauʼi ia te sakilifisio ʼo Sesu.

18. Kotea ʼae ʼe tou tui papau ki ai mo kapau ʼe tou haga ʼoʼofa ki tatatou Tamai ʼae ʼi selo?

¹⁸ Logo la ʼe ke faiga ke ke maʼuliʼi te ʼu tokoni ʼo te alatike ʼaeni, ʼe lagi feala pe ke ke lotovaivai pea mo feuiʼaki pe ʼe fiafia ia Sehova ʼo ʼuhiga mo koe. Kapau koia, ke ke manatuʼi ʼe fiafia ia ʼo ʼuhiga mo “natou ʼae ʼe haga ʼoʼofa kia te ia.” (Sakp. 1:12) Koia ke ke nofo ovi tuʼumaʼu kia te ia pea mo tokagaʼi lelei te ʼu aluʼaga ʼae ʼe ina fakaha ai ʼe fiafia ʼo ʼuhiga mo koe. Pea ke ke manatuʼi tuʼumaʼu ʼe mole mamaʼo ia Sehova “ia tatou takitokotahi.”​—Gaue 17:27.