ALATIKE AKO 10
KATIKO 13 Ko Totatou Faʼifaʼitakiʼaga Ko Kilisito
“Haga Muli” Ia Sesu Hili Tou Papitema
“Kapau ʼe fia muli mai he tahi ia te au, ke fakafisi kia ia totonu pea ke ina toʼo tona pou fakamamahi ʼi te ʼaho fuli pea mo haga muli mai ia te au.”—LUKA 9:23.
TE MANATU TAFITO
ʼE tokoni mai anai te alatike ʼaeni kia tatou fuli ke tou fakakaukauʼi pe ʼe malave feafeaʼi anai ki totatou faʼahiga maʼuli ia te foaki ʼo totatou maʼuli kia Sehova. Pea ʼe toe tokoni tafito anai kia natou ʼe heʼeki fualoa tanatou papitema ke natou nofo agatonu.
1-2. Kotea ia te ʼu lelei ʼe ke maʼu moka ke papitema?
KA PAPITEMA he tahi mo kau ki te famili ʼo Sehova, ʼe ina logoʼi he toe fiafia lahi. ʼE kua ina maʼu te pilivilesio ʼae ke ina maʼu he ʼu felogoi lelei mo ia, pea ʼe mahino ia ʼe manatu tahi mo te ʼu palalau ʼaeni ʼa te tagata faipesalemo ko Tavite: “Manuʼia ia ia ʼae ʼe . . . filifili [e Sehova] mo . . . [ina] taki mai, ke nofo ʼi ʼou malaʼe.”—Pes. 65:4.
2 ʼE mole hoko fakaulu e Sehova he tahi pe ki ʼona malaʼe. Ohage ko tatatou vakaʼi ʼi te alatike kua ʼosi, ʼe ina filifili ke fakaovi kia natou ʼae ʼe natou fakaha age kia te ia ʼe natou fia maʼu te ʼu felogoi lelei mo ia. (Sakp. 4:8) Ka ke foaki tou maʼuli kia Sehova pea mo papitema, ʼe ke fakaovi kia te ia ʼi hona aluʼaga makehe. Pea ʼe mahino ia hili tau fai te faʼahi ʼaia, ʼe ina ‘huaʼi atu anai he tapuakina ke mole ke toe masiva ʼi he meʼa.’—Mala. 3:10; Sel. 17:7, 8.
3. Kotea ʼae ʼe tonu ke fai e he tahi kua ina foaki tona maʼuli kia Sehova pea mo papitema? (Ekelesiasi 5:4, 5)
3 Ko te papitema ʼe ko te kamataʼaga ʼaia ʼo tou maʼuli ʼi tau tauhi kia Sehova. Hili tau fai te faʼahi ʼaia, ʼe ke fia fai anai ia meʼa fuli ʼe ke lavaʼi ke ke mulimuli ki te fakapapau ʼaia neʼe ke fai logo la te ʼu fakahala pea mo te ʼu ʼahiʼahi. (Lau ia Ekelesiasi .) ʼI tou ʼuhiga tisipulo ʼa Sesu, ʼe tonu ke ke faiga ʼo mulimuli lelei ki tana faʼifaʼitaki pea mo fakalogo ki ʼana fakatotonu. ( 5:4, 5Mat. 28:19, 20; 1 Pet. 2:21) Pea ʼe ko te aluʼaga ʼaia ka tokoni atu anai te alatike ʼaeni ke ke fai.
“HAGA MULI” IA SESU LOGO LA TE ʼU ʼAHIʼAHI PEA MO TE ʼU FAKANEKE
4. Kotea ʼae neʼe fia ui e Sesu ʼi tana ui ʼae ʼe toʼo anai ʼana tisipulo te “pou fakamamahi”? (Luka 9:23)
4 Hili tau papitema, ʼe ke tau pe anai mo he ʼu fihifihia. Neʼe fakaha lelei e Sesu ko ʼana tisipulo ʼe natou toʼo anai he “pou fakamamahi.” Pea neʼe ina ui ʼe natou fakahoko anai te faʼahi ʼaia “ ʼi te ʼaho fuli.” (Lau ia Luka 9:23.) Neʼe ina fia ui koa ʼe maʼuli mamahi pe anai ʼana tisipulo? Kailoa. Neʼe ina fakatokagaʼi age pe kia natou ʼe mole natou maʼu pe anai he ʼu tapuakina kae ʼe natou tau anai mo he ʼu fihifihia. Ko ʼihi fihifihia ʼe faigataʼa ʼaupito anai.—2 Tim. 3:12.
5. Kotea ia te ʼu tapuakina ʼe fakapapau e Sesu kia natou ʼae ʼe natou fai he ʼu sakilifisio?
5 Neʼe kua fakafeagai atu koa he tahi ʼi tou famili? Pe neʼe ke fai koa he ʼu sakilifisio ʼi te faʼahi fakapaʼaga ke ke fakamuʼamuʼa ai te Puleʼaga? (Mat. 6:33) Kapau koia, pea neʼe tokagaʼi moʼoni e Sehova ia tau agatonu. (Hep. 6:10) ʼE mahino ia, neʼe ke tokagaʼi ia te moʼoni ʼo te ʼu palalau ʼaeni ʼa Sesu: “Ko he tahi kua ina tuku tona ʼapi, peʼe ko ʼona tehina, peʼe ko ʼona tokolua, peʼe ko tana faʼe, peʼe ko tana tamai, peʼe ko ʼana fanau, peʼe ko ʼana gaueʼaga ʼuhi ko au pea mo te logo lelei, ʼe ina maʼu anai ʼo liuga 100 ʼi te temi nei ni ʼapi, mo ni tehina, mo ni tokolua, mo ni faʼe, mo ni fanau, mo ni gaueʼaga, ʼaki he ʼu fakataga pea ʼe ina maʼu anai mo te maʼuli heʼe gata ʼi te tuʼu ʼo te ʼu faʼahiga meʼa ka hoko mai.” (Mko. 10:29, 30) ʼE mole lahi age koa la te ʼu tapuakina ʼae neʼe ke maʼu ʼi te ʼu sakilifisio ʼae neʼe ke fai?—Pes. 37:4.
6. He koʼe ʼe tonu anai ke ke haga tauʼi “te holi ʼo te kakano” hili tou papitema?
6 Hili tou papitema, ʼe tonu anai ke ke haga tauʼi “te holi ʼo te kakano.” (1 Soa. 2:16) Pea ʼe mole ʼaoga hau punamaʼuli ki te faʼahi ʼaia he ʼe kei ke agahala. ʼI ʼihi temi, ʼe feala ke ke toe logoʼi pe te ʼu meʼa ʼae neʼe logoʼi e te apositolo ko Paulo. Neʼe ina tohi fenei: “ ʼE au leleiʼia moʼoni ia te lao ʼa te ʼAtua ʼi toku loto, kaʼe ʼe au sio ʼi toku sino ki he tahi age lao ʼe fakafeagai ki te lao ʼo toku ʼatamai. Ko te lao ʼaia ʼe ko te agahala ʼae ʼi toku sino pea ʼe ina puleʼi au.” (Loma 7:22, 23) Kapau ʼe ke lotovaivai ʼuhi he ʼe ke tauʼi he ʼu holi ʼe kovi, manatuʼi te fakapapau ʼae neʼe ke fai kia Sehova ʼi tau foaki tou maʼuli kia te ia. ʼE ke lotomalohi anai moʼo fakatotonu ʼe ke tekeʼi ia te fakahala. Koia, ʼe tokoni atu anai kia koe te fakapapau ʼae neʼe ke fai moka fakahalaʼi koe. ʼO feafeaʼi?
7. He koʼe ko tau foaki tou maʼuli kia Sehova ʼe tokoni atu anai ke ke nofo agatonu kia te ia?
7 Ka ke foaki tou maʼuli kia Sehova, ʼe ke fakafisi kia koe totonu. Ko tona fakaʼuhiga ʼe ke liʼaki he ʼu holi mo he ʼu fakatuʼutuʼu ʼe mole leleiʼia e Sehova. (Mat. 16:24) Koia ka ʼahiʼahiʼi koe, ʼe mole ʼaoga anai ke ke feuiʼaki kotea ʼae ʼe tonu ke ke fai. Neʼe kua ke ʼosi iloʼi te meʼa ʼae ʼe tonu anai ke ke fai. Ko tona fakaʼuhiga neʼe kua ke filifili ke ke nofo agatonu kia Sehova. ʼE ke fakatotonu anai ke ke fakafiafiaʼi tona loto. ʼE ke hage anai ko Sopo. Logo la neʼe tau mo ni ʼahiʼahi fakamataku kae neʼe ina fakatotonu malohi fenei: “ ʼE mole au fakafisi anai ki taku agatonu.”—Sopo 27:5.
8. Kapau ʼe ke fakakaukauʼi te faikole ʼae neʼe ke fai kia Sehova ʼi tau foaki tou maʼuli kia te ia, pea ʼe tokoni feafeaʼi atu anai ke ke tekeʼi te ʼu fakahala?
8 Ka ke fakakaukauʼi te faikole ʼae neʼe ke fai kia Sehova ʼi tau foaki tou maʼuli kia te ia, ʼe ke maʼu anai te malohi ʼae moʼo tekeʼi ia he faʼahiga fakahala pe. Ohage la, ʼe ke fakaha anai koa ʼi tau aga ʼe ke fia faiʼakau mo he tahi kua ʼohoana? Kailoa ia. Neʼe kua ke fakapapau kia Sehova ʼe mole ke fai anai he meʼa feia. Koia, ʼaua naʼa ke tuku ke tauaka ʼi tou loto te ʼu manatu kovi ʼaia he ʼe faigataʼa anai ki ʼamuli tona tauʼi. ʼE ke “maliu kehe” mai anai mai “te ala ʼo te kau agakovi.”—Taag. 4:14, 15.
9. Kapau ʼe ke fakakaukauʼi te faikole ʼae neʼe ke fai kia Sehova ʼi tau foaki tou maʼuli kia te ia, pea ʼe tokoni feafeaʼi atu anai ke ke fakamuʼamuʼa ia te ʼu gaue fakalaumalie?
9 ʼE feafeaʼi la mo kapau ʼe foaki atu he gaue ʼe mole ke kau tuʼumaʼu anai ki ʼatatou fono? ʼE mahino ia, ʼe mole ke tali anai. Neʼe kua ʼosi ke fakatotonu ʼe mole ke tali anai he gaue feia ʼi muʼa ia ʼo tona fakaui atu. Koia kapau ʼe ke toʼo he tonu ʼe mole lelei ʼe fua kovi pe anai. Neʼe fakatotonu e Sesu ke ina fakafiafiaʼi te loto ʼo tana Tamai. Koia kapau ʼe ke manatuʼi tana faʼifaʼiataki, ʼe ke foimo liʼaki anai ia meʼa fuli ʼe ina fakamamahiʼi te loto ʼo te ʼAtua ʼae neʼe ke foaki ki ai tou maʼuli.—Mat. 4:10; Soa. 8:29.
10. ʼE tokoni feafeaʼi atu anai ia Sehova ke ke “haga muli” ia Sesu hili tou papitema?
10 Ka kita tau mo he ʼu ʼahiʼahi pea mo he ʼu fakahala, ʼe ke fakaha ai tau fia “haga muli” ia Sesu. Pea kapau ʼe ke haga mulimuli ia te ia, ʼe ke tui papau ʼe tokoni atu anai ia Sehova. ʼE ui ʼi te Tohi-Tapu: “ ʼE agatonu te ʼAtua, pea ʼe mole ina tuku anai ke fakahalaʼi koutou ʼo fakalaka age ʼi te meʼa ʼae ʼe kotou lavaʼi, kae ka hoko mai te fakahala, ʼe ina toe teuteuʼi foki anai he faigamalie ke kotou hao ai, ke feala ai hakotou ʼutakiʼi.”—1 Ko. 10:13.
ʼE FEAFEAʼI HAU HAGA MULI IA SESU?
11. Kotea te tahi faʼahi ʼe lelei ke ke fai ke ke haga mulimuli ai ia Sesu? (Vakaʼi mo te pāki.)
11 Neʼe tauhi ia Sesu ki tana tamai mo tona loto katoa. Pea neʼe tokoni te faikole ki ai ke fakaovi ai kia te ia. (Luka 6:12) Ko te tahi faʼahi ʼe lelei ke ke haga mulimuli ia Sesu hili tou papitema, ʼe ko hau hoko atu pe he ʼu gaue ʼe ke fakaovi ai anai kia Sehova. ʼE foaki mai e te Tohi-Tapu te tokoni ʼaeni: “Tatau aipe pe neʼe tou tuputupu, kaʼe ʼe tonu ke tou haga haʼele ohage pe ko te mahani.” (Flp. 3:16) ʼI ʼihi temi, ʼe ke logo anai neʼe fakatuʼutuʼu e he ʼu tehina mo tuagaʼane ke lahi age te ʼu gaue ʼae ʼe natou fai ʼi tanatou tauhi kia Sehova. ʼE lagi neʼe natou kau ki te Ako ʼo Te kau Faifakamafola ʼo Te Puleʼaga peʼe olo ki he ʼu koga meʼa ʼe ʼaoga ki ai he kau faifakamafola. Kapau ʼe ke sio ʼe ke lava fakahoko he fakatuʼutuʼu feia, ʼaua naʼa ke tuʼania. ʼE fia fakalahi e te kau kaugana ʼa Sehova ia tanatou minisitelio. (Gaue 16:9) Kae kapau ʼe mole ke fealagia ʼi te temi nei, ʼaua naʼa ke manatu ʼe mole ke maʼuhiga age koe ia natou ʼae ʼe natou lavaʼi. Ko te meʼa ʼae ʼe maʼuhiga ʼe ko tau kataki. (Mat. 10:22) ʼAua naʼa ke meʼa noaʼi te maʼuhiga ʼo te ʼu gaue ʼae ʼe ke fai maʼa Sehova. ʼE fiafia ia moka ʼe ke fakahoko ʼo mulimuli ki ʼou fealagia mo tou aluʼaga. ʼE ko he koga maʼuhiga ia ke ke haga mulimuli ia Sesu hili tou papitema.—Pes. 26:1.
12-13. Kotea ʼae ʼe feala ke ke fai mo kapau ʼe mole kei ke faʼafai? (1 Kolonito 9:16, 17) (Vakaʼi mo te ʼa takai “ Haga Hoko Atu Tau Lele.”)
12 Kotea ʼae ʼe tonu ke ke fai mo kapau ʼe ke logoʼi ʼe mole kei fakamalotoloto ʼau faikole peʼe ʼe mole kei ke fiafia ʼi tau faifakamafola ohage ko te temi muʼa? Kapau ʼe hoko te faʼahi ʼaia hili tou papitema, ʼaua naʼa ke manatu ʼe mole kei nofo te laumalie ʼo Sehova mo koe. ʼE feala pe ke fetofetogi ʼau manatu ʼuhi ko tou ʼuhiga agahala. Kapau ʼe mole kei ke faʼafai, metitasio ki te faʼifaʼitaki ʼo te apositolo ko Paulo. Neʼe faiga tuʼumaʼu ke ina faʼifaʼitakiʼi ia Sesu kae neʼe ina tokagaʼi ʼi ʼihi temi neʼe mole ina fia fai te meʼa ʼae ʼe tonu ke ina fai. (Lau ia 1 Kolonito 9:16, 17.) Kae neʼe ina ui fenei: “Tatau aipe pe ʼe au fai fakakinau, kae ʼe au fai pe he ʼe ko te maʼua neʼe tuku mai.” ʼEi, neʼe ina fakatotonu ke ina fakahoko tana minisitelio logo la tana mole fia fai te meʼa ʼae ʼe tonu ke fai.
13 ʼE toe feia pe ʼaua naʼa ke toʼo he ʼu tonu ʼo mulimuli pe ki te ʼu meʼa ʼae ʼe ke logoʼi. Ke ke fakatotonu ke ke fai te meʼa ʼae ʼe lelei logo la ʼe mole ke fia fai te faʼahi ʼaia. Kapau ʼe ke haga fai te meʼa ʼae ʼe lelei, ʼe feala ʼaki te temi ke fetogi te ʼu meʼa ʼae ʼe ke logoʼi. Koia, ka ke haga taupau he ʼu agamahani fakalaumalie ʼe lelei pea ʼe tokoni atu anai ke ke haga mulimuli ia Sesu hili tou papitema. Pea ʼaki tau faʼa kataki, ʼe ke fakalotomalohiʼi ai anai ʼou tehina mo tuagaʼane.—1 Tes. 5:11.
“HAGA VAKAVAKAʼI” IA KOE TOTONU
14. Kotea ʼe tonu anai ke ke fakakaukauʼi tuʼumaʼu ki ai? Pea kotea tona tupuʼaga? (2 Kolonito 13:5)
14 Hili tou papitema, ʼe toe lelei age anai ke ke vakavakaʼi tuʼumaʼu ia koe totonu. (Lau ia 2 Kolonito 13:5.) ʼI ʼihi temi, ʼe lelei ke ke fakakaukauʼi tau ʼu agamahani ʼae ʼe ke fai ʼi te ʼaho fuli. Ohage la, ʼe kei ke faikole tuʼumaʼu koa mo lau mo ako te Tohi-Tapu, mo kau ki te ʼu fono, pea mo te faifakamafola? Faiga ke ke kumi he ʼu faigamalie ʼe ke leleiʼia ʼi te ʼu gaue ʼaia pea mo fua lelei kia koe. Koia ʼe lelei ke ke fai te ʼu fehuʼi ʼaeni: ‘ ʼE au lava fakamahino koa te ʼu akonaki tafito ʼo te Tohi-Tapu? Kotea ʼae ʼe feala ke au fai ke toe lahi age toku fiafia ʼi te faifakamafola? Ka au faikole ʼe au fakaha fuli koa kia Sehova te ʼu meʼa ʼae ʼi toku loto mo falala katoa kia te ia? ʼE au kau tuʼumaʼu koa ki te ʼu fono? ʼE feafeaʼi haku hikihiki taku tokaga lelei ki te ʼu fono pea mo lagolago ki ai?’
15-16. Kotea te ako ʼe ke taʼofi mai te faʼifaʼitaki ʼa he tehina neʼe ina lava tauʼi he fakahala?
15 ʼE toe lelei age anai ke ke vakavakaʼi fakalelei ia koe totonu ke ke iloʼi ai ʼou vaivaiʼaga. Ko te aluʼaga ʼaia neʼe fai e te tehina ʼaeni ʼe higoa ko Robert. ʼE ina ui fenei: “Neʼe au taʼu 20 pea neʼe mole au gaue ʼaho fuli. ʼI te tahi ʼaho, ʼi te ʼosi ʼo te gaue neʼe fakaafe au e hoku kauga gaue fafine kio ia. Neʼe ina ui mai ko maua ʼateaina pe pea ʼe ‘lelei anai toma kiʼi afiafi.’ ʼI te kamata, neʼe au maʼu takuʼaki ke ʼaua naʼa au ui age te moʼoni kae hili ia neʼe au fakafisi age pea mo fakamahino age tona tupuʼaga.” Neʼe lava tauʼi e Robert te fakahala pea ʼe ko he meʼa lelei ia. Kae ki muli age, neʼe ina toe fakakaukauʼi te aluʼaga ʼae neʼe hoko pea mo ina tokagaʼi neʼe feala pe ke ina fai he tahi age aluʼaga. ʼE ina ui fenei: “Neʼe mole au fakatotonu malohi pea mo au foimo fakafisi atu aipe ki toku fakaafe e toku kauga gaue fafine, ohage ko tona fai e Sosefo ki te ʼohoana ʼo Potifale. (Sen. 39:7-9) ʼEi, neʼe au punamaʼuli ʼi taku sio ʼae neʼe faigataʼa kia au taku fakafisi. Neʼe tokoni mai te aluʼaga ʼaia ke au mahino ʼe tonu ke au fakamalohiʼi ʼaku felogoi ʼae mo Sehova.”
16 ʼE mahino ia ʼe tonu anai ke ke vakavakaʼi lelei te meʼa ʼae ʼe ke loto ki ai ohage ko Robert. Kapau neʼe ke lava tauʼi he fakahala, ʼe lelei ke ke fai te fehuʼi ʼaeni: ‘Neʼe au foimo fakafisi atu aipe koa peʼe kailoa?’ Kapau ʼe ke tokagaʼi ʼe ʼaoga anai ke ke fai he ʼu fetogi, ʼaua naʼa ke lotovaivai. Kae ke ke fiafia ʼi tau iloʼi ʼae tou vaivaiʼaga. Faikole ʼo ʼuhiga mo te faʼahi ʼaia, pea mo fai hau ʼu fakatuʼutuʼu moʼo fakamalohiʼi ia tau fia fakalogo ʼae ki te ʼu lao ʼa Sehova ʼo ʼuhiga mo te aga ʼae ʼe tonu ke fai.—Pes. 139:23, 24.
17. ʼI te aluʼaga ʼae neʼe hoko kia Robert, neʼe kotea ʼona fua ki te huafa ʼo Sehova?
17 Tou hoko atu pe mo te hisitolia ʼo Robert. ʼE ina hoko atu fenei: “ ʼI taku ʼosi fakafisi ki tana fakaafe au, neʼe ina ui mai, ‘Neʼe mole ke to ki taku fakahala!’ Neʼe au fehuʼi age ki ai pe kotea neʼe ina fia ui mai. Neʼe ina fakamahino mai neʼe ʼi ai hona kaumeʼa tagata neʼe ko he Fakamoʼoni ʼa Sehova. Pea neʼe ina ui age ka maʼu he faigamalie pea ʼe faifakafufu e te kau tupulaga fuli ʼae ko he kau Fakamoʼoni ʼa Sehova ia he ʼu aga ʼe kovi. Pea neʼe ina tali age leva ki tona kaumeʼa ʼe ina fakahalaʼi anai ia au ke sio pe ʼe au feia anai. Neʼe au fiafia ʼosi ʼi taku fakakololiaʼi ia te huafa ʼo Sehova.”
18. Kotea ʼae ʼe ke fakatotonu ke ke fai ? (Vakaʼi mo te ʼa takai “ He ʼu Alatike ʼe Lua ʼe Ke Leleiʼia Anai.”)
18 Ka ke foaki tou maʼuli kia Sehova pea mo papitema, ʼe ke fakaha ai ʼe ke fia fakatapuha tona huafa tatau aipe pe kotea ʼae ʼe hoko. Ke ke tui papau ʼe ina iloʼi pe kotea te ʼu ʼahiʼahi mo te ʼu fakahala ʼae ʼe ke tau mo ia. ʼE ina tapuakinaʼi anai ʼau faiga ʼae ke ke nofo agatonu kia te ia. Pea ʼe mahino papau ia, ʼaki tona laumalie maʼoniʼoni ʼe ina foaki atu anai te malohi moʼona fakahoko. (Luka 11:11-13) Koia, ʼaki tana tokoni, ʼe ke lava mulimuli anai ia Sesu hili tou papitema.
ʼE KE TALI FEAFEAʼI ANAI?
-
Kotea te fakaʼuhiga ʼae ʼe toʼo e te kau Kilisitiano he “pou fakamamahi ʼi te ʼaho fuli”?
-
ʼE ke lava “haga muli” feafeaʼi ia Sesu hili tou papitema?
-
Ka ke fakakaukauʼi te faikole ʼae neʼe ke fai kia Sehova ke ke foaki tou maʼuli kia te ia, ʼe tokoni feafeaʼi atu anai ke ke nofo agatonu?
KATIKO 89 ʼE Tapuakinaʼi Te Fakalogo