ʼE feala ke fakamolemole ʼatatou agahala ʼuhi pe ko te sakilifisio ʼa Sesu ʼi tana liligi ia tona Taʼataʼa. (Efe. 1:7) Kae ʼe ui fenei ʼi te Tohi-Tapu: ‘ ʼI te kataki fualoa ʼa te ʼAtua neʼe ina fakamolemole te ʼu agahala ʼae neʼe fai e te hahaʼi ʼi te temi muʼa.’ Ko tona fakaʼuhiga ʼi muʼa ʼo te foaki e Sesu ia te totogi. (Loma 3:25) ʼE lava fakamolemole feafeaʼi e Sehova ia te ʼu agahala kae ʼe heʼeki fai ia te sakilifisio ʼa Sesu pea mo hoko atu pe tana fakaʼapaʼapa ki ʼana lao faitotonu?

Neʼe fakapapau e Sehova ʼe ʼi ai he “hakoga” ka ina haofaki anai ia natou ʼae ʼe tui kia te ia pea mo ʼana fakapapau. Koia ʼi tana fai te fakapapau ʼaia, neʼe hage pe neʼe kua ʼosi fai ia te totogi. (Sen. 3:15; 22:18) Neʼe tui papau ia, ʼe lotolelei anai tona ʼAlo ʼulu tokotahi ke ina foaki tona maʼuli ko he totogi ʼi tona temi totonu. (Kal. 4:4; Hep. 10:7-10) ʼI te nofo ʼa Sesu ʼi te kele, neʼe ina fakafofoga ia te ʼAtua pea neʼe foaki age e te ʼAtua ia te fealagia ʼae ke ina fakamolemole te ʼu agahala kae neʼe heʼeki foaki ia te totogi. Neʼe ina fai te fahaʼi ʼaia ke feala kia natou ʼae neʼe tui ki tana Tamai ke natou maʼu ia te ʼu lelei ʼo te sakilifisio ʼae ka ina fakahoko anai.​—Mat. 9:2-6.